Lukka 16
16
Ijamajako tee labbi ab maa tee hakki
1Dukur Yesu kelem nee Swahaba too ijamajako ligo kelem. “Kaan fih naa ragi wayyi ab tajir uwo kaan endis ajol ab ggi chunnga sokolinna too. Yom wayyi ajol jaa-jaa asiki ragi ab kaan ggi chunnga dee nee tajir gali uwo fih ggi karab sokolinna takki. 2Yaa, ragi ab tajir dee naadi ajol ab kaan ggi chunnga sokolinna dee ligo uwo ggi kelem gali, Dee sunu yaa anaa ggi asmma fogo itaa? Ruwa kee itaa adul kabar tee sokolinna tayi kee itaa jibu naana, kalam itaa kalas maa agddear chunnga sokolinna tayi.
3Dukur ajol ab kaan ggi chunnga sokolinna feker fih too uwo kelem gali, Sunu yaa kee anaa soh kalam siddu tayi ggi turuju anaa fih kazi.? Anaa maa endis guddrra too soh kazi mee kaman anaa ggi asmma haaya fih asaadu. 4Aseede anaa faham sunu tee soh! Kaan gidaam tayi kalas anaa bi endis sabiya ab ggi karibisha anaa fih beyy tomon.
5Yaa, ragi ab ggi chunnga sokolin dee naadi annas kuul ab banja tee siddu too. Uwo asaadu ajol tee awlan, Siddu tayi banja itakkum?
6Ajol dee ggibisha uwo ligo oggi kelem gali, uwo ggi banja anaa dikin lita elfu talata usabamiya
7Dukur ajol ab kaan ggi chunnga sokolin asadul ajol tee tinen dee, Siddu tayi ggi banja itakkum? Ajol dee ggibisha uwo gali, uwo ggi banja ab kilo ishirin tee ngano. Ajol ab ggi chunnga dee kelem noowo, kabar tee sokolinna takki fih yaa dee mee kede itaa katif tamanin.
8Wakati siddu too asmma kalama ab uwo soo uwo ab maa ata hakki uwo abdu, kalam uwo adul sokolin too tee karni seme weede ggi weeri gali annas ab maa ggi leyin nee Rabbana ggi geni neegi mee annas taanin ab fih jee ummon lakin annas tee Rabbana maa ggi soo ummon neegi.
9Dukur Yesu ruwa gidaam mee kelem noomon gali, Utajiri ab itakkum endis bi kun mee itakkum ladi, fih jeede, tummiya ligo lissa fih-fih duniya fih adul sabiyan kalam kaan itakkum lasulu fih bakaan tee mmana ummon bi kun fih-fih karibisha itakkum. 10Ajol kaan tee hakki fih ab sakar uwo kaman bi kun tee hakki fih sokolin ab kebirin, lakin kaan ajol dee maa tee hakki fih sokol ab sakar uwo kaman maa bi kun tee hakki fih sokolinna ab kebirin. 11Yaa fih jeede, kaan itakkum maa tee hakki fih chunnga utajiri tee duniya, dukur Rabbana bi amin itakkum maa mee utajiri tee samayi. 12Kaan itaa maa endis hakki fih utajiri tee ajol taani, dukur Rabbana bi wedi neetaa maa utajiri takki kalam itaa maa agddear chunnga. 13Mafih labbi ab agddear soh kidima nee sidiyan tinen fih saa wayyi. Kalam kaan uwo bi soh jeede, uwo endis tee aba wayyi kede uwo aju taani dee amaa kede uwo hishima wayyi dukur taani dee kede uwo alis. Fih nammna wayyi dee. Itaa maa agddear soh nee Rabbana mee tagirin fih saa wayyi”
Sharia tee Musa mee mamlaka tee Rabbana.
14Dukur wakati Farasin ab kaan aju ssente asmma kalama ab Yesu kaan ggi kelem, ummon atakku uwo. 15Lakin Yesu kelem noomon gali, “itakkum ggi beenu nedif fih gidaam annas, lakin Rabbana arfu fikila takkum ab batal. Sokolinna ab annas ggi sulu tee hishima maa tee hishima nee Rabbana.
16Sharia tee Musa mee sunu ab Nebbiya katif itakkum ladi Yokana ab batiza jaa. Lakin min wakati naade kabar ab kuweesi tee mamlaka tee Rabbana alim mee annas ggi jarrib zaidi dakal fogo. 17Lakin rayisi zaidi samayi mee duniya kalas shinda nukkta wayyi tee sharia fih kalas.
18Fih nammna wayyi, kaan ragi talagu mariya too dukur uwo jooju mariya taani, uwo ggi soh zina mee ragi ab ggi jooju mariya ab mee talagu ggi kun uwo soh zina.”
Ragi ab tajir mee Lazaaro.
19Dukur Yesu kelem noomon ijamajako wedede, “Kaan fih naa ragi ab tajir zaidi ligo uwo ggi lebisi gumasa tee beyy zaidi ab kuweesi uwo kaan ggi sayim mee akil ab kuweesi killa yom. 20Mee kaman kaan fih ragi ab miskiin asmma too Lazaaro. Uwo kaan endis dabara fih gildu too kuul. Annas taanin kaan ggi jibu uwo fih babbu tee ragi ab tajir dee. 21Lazaaro kaan jaani zaidi ladi uwo kaan aju akul akil ab wagga-wagga min meza tee tajir dee. Fih jeede kelli jaa alassu dabara too dee.
22Fih mwisho ragi miskiin jaa muttu. Malaika sulu uwo fih dusu tee Ibrayim. Dukur mee ragi ab tajir kaman jaa muttu dofun uwo mee annas hishima uwo. 23Ligo uwo ruwa fih magabil uwo kaan fih-fih warja ab tee guddrra. Dukur uwo ayinu foo uwo ayinu Ibrayim boyyi zaidi mee Lazaaro ligo geni geeri mowo. 24Yaa, ragi ab tajir dee kore mee sauti tee foo ligo kelem gali, Babba tayi Ibrayim, anaa fih-fih warja tee guddrra fih naari wedede! Ayinu huruma tayi. Kelem nee Lazaaro kede ketisi nyereku idda too fih moyo kede uwo lasulu anaa kee baari lisani tayi.
25Lakin Ibrayim kelem noowo gali, Nyereku tayi, kumbuka wakati ab itaa hayyi, itaa ligo killa sokolinna ab kuweesi, lakin Lazaaro ligo sokolinna ab batal. Mee saade Lazaaro ligo raha ligo itaa ggi futu fih warja tee guddrra. 26Maa mee wedede barraw, fih taabu kebir fih ustu tayi mee itaa. Yaa mafih ajol ab bijja nee itaa min ini mee mafih ajol ab bijja nee inna min naa.
27Dukur ragi ab tajir dee ggibisha uwo ligo oggi kelem gali, Anaa ggi naangu itaa, Babba tayi Ibrayim akeri rasul Lazaaro fih juwa tee Babba tayi. 28Kalam anaa endis akwaana tayi kamsaa ab ggi geni naa, kelem nee uwo kede uwo ruwa kelem noomon kede ummon taala min zambi tomon misani ummon kede maa jaa fih bakaan tee warja tee guddrra. 29Lakin Ibrayim ggibisha ummon gali, Akwaana takki endis sharia tee Musa mee sunu ab Nebbiya katif noomon. Yaa kelem ummon leyin noowo!
30Ragi ab tajir dee kelem, Babba tayi Ibrayim gali wedede maa ggi tim! Lakin kaan ajol ab muttu ruwa noomon, ummon bi taala min zambi tomon.
31Lakin Ibrayim kelem noowo gali, Kaan ummon maa leyin nee sharia tee Musa mee sunu ab Nebbiya katif, dukur ummon maa bi rudu taala min zambi tomon salakun ajol gum min metinin ruwa fih kelem noomon.”
Markert nå:
Lukka 16: KCN
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Nubi Bible by Beyond Translation is licensed under Creative Commons Attribution-ShareAlike 4.0 License.
