کارَلِ رسولَل 6
6
هَف نفر سی خذمت جیا ایابون
1مِنِه ای روزَل که عدۀ شاگردَل زیاد ایابی، یَهودییَلِ یونانی زُوون وَ یَهودییَلِ عبرانی زُوون گِلَهای کِردِن که بیوَهزَنَلِشون وَ جیرۀ روزانۀ غذا بی بَهر ایابون. 2اوسِه او دُوازَه رسول، تَمومِ شاگردَلَه صیا کِردِن وِ گُتِن: «یِه سی ایما دِرُس نی که وَ موعظۀ کلامِ خدا دَس وَگِریم وِ بیُفتیم وَ بَهر کِردَنِ غذا. 3پَ ای کَکایَل، وَ مِلِی خِتون هَف نفرِ خُشنومَه که پُر وَ روحالقدس وِ حکمت بون جیا کِنیت تا ای کارَ بِئیم وَ دَسِشون 4وِ ایما خِمونَه وقفِ دعا وِ خذمتِ کلامِ خدا ایکِنیم.»
5ای گَپ وَ دلِ هَمَه نِشَس.اوسِه اِستیفانَ که مِردی بی پُر وَ ایمون وِ روحالقدس، بِی فیلیپُس، پُرُوخُرُس، نیکانُر، تیمُن، پَرمیناس وِ نیکولائوس، که وَ یهودی وابییِهیَلِ اَنطاکیَه بی، انتخاب کِردِن. 6ای مِردَلَه آوُردِن طِی رسولَل وِ رسولَل دعا کِردِن وِ سی خِذمت وَشون دَس نَهان.
7وِ هَمیطو کلامِ خدا هَمَه جا اعلام ایابی وِ عِدۀ شاگردَل مِنِه اورشلیم خیلی زی یِکِلی وابی وِ جَمِ زیادی وَ کاهنَل هَم ایمون آوُردِن.
گرفتار وابییَنِ اِستیفان
8اِستیفان پُر بی وَ فیض وِ قویَت، وِ معجزهیَل وِ نِشونهیَلِ گَپویی مابینِ مردم ایکِه. 9امّا یِهپارهای وَ اَعضِی کنیسهای که معروف بی وَ «کنیسۀآزاد وابییَهیَل»، که وَ یَهودییَلِ قیرَوان وِ اسکندریَه وِ هَم عِدِهای وَ مَردِمونِ کیلیکیَه وِ منطقۀ آسیا بییِن، وَریسان وِ باش شروع کِردِن وَ جَرِبَحث. 10امّا در برابرِ حکمت وِ روحالقدس که اِستیفان باش گَپ ایزَه، نیتَرِسِن وِیسِن. 11پَ یِهپارهای نَه یَواشَکی واداشتِن تا بِگُن: «ایما اِشنُفتیم که اِستیفان وَ موسی وِ خدا کُفر ایگُت.
12اونگَل مردم وِ شیخَل وِ معلملِ توراتَه تحریک کِردِن وِ رِتِن وَ سَرِ اِستیفان، وِّ نَه گِرُتِن وِ آوُردِن وَ شورِی یَهود. 13چَن تا شاهدِ دِروکِنَم آوُردِن که ایگُتِن: «ای آیَم یِهدَقَه وَ گَپ زَیَن وَ ضدِ ای جِی مقدّس وِ شریعتِ یَهود نیوِیسِه. 14سییِکِه خِمون اِشنُفتیم که ایگُت عیسِی ناصری وِچِنَه خراب ایکِنِه وِ رسمِ رسومَلی نَه که موسی وَ دَسِ ایما دایِه، عوض ایکِنِه.» 15مِنِه ای موقَع، تَمومِ حاضرین مِنِه شورا تییَه دُتِن وَ اِستیفان وِ دییِن ریش مِی ری فرشتهیَل وابییِه.
Markert nå:
کارَلِ رسولَل 6: SLB
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
@ 2024 Korpu Company
