نامَه رومِنیا 5
5
صلح خاد خدا اُ واسطَهِ ایمون
1پَ، اَسِی که اُ واسطَهِ ایمون، صالح اُ حساب اُندِستِم، اُ واسطَهِ خداوندمو عیسی مسیح خاد خدا صلح مُهَه. 2اَما اُ واسطَهِ آنا، خاد ایمون، اِ فیضا هم که شُ تِک پابَرجا هم مُن دست اَئوردِ، و تِی مِ امیدی که اُ جلال خدا مُهَه، خارامی اَکنِم. 3نِه فَکَط اِ، بلکه تِی عذابیامو هم خارامی اَکنِم، اَسِی که اَدانِم که عذاب، پایداری و تحمل اُ بار دارِ. 4و پایداری و تحمل، شخصیت اُ بار دارِ، و شخصیت امید اُ بار دارِ. 5و امید اُ اَما خَجالَت زادَ ناکو، اَسِی که محبت خدا اُ واسطَهِ روح کدّوسُش که اُ اَما دَدَ بُدِ، تِی دلیامو لِتَه بُدِ.
6اَسِی که موکَهای که اَما هَنو ضعیف هادِم، مسیح تِی یَک زَمون وَلم، اَسِی آدامِی بیدین جونُش اُشدَ. 7اَسِی که بُری کام آدی اَدا که یَک نفر اَسِی یَک آدام صالح جونُش هادَ، با اِکِه شاید یَک نفر اِ دِلِرزِنا اُشبِه که حتی جونُش وَخاطر یَک آدام خَش هادَ. 8ولی خدا محبتُش اُ اَما اینا نِشو اَدَ که وَختی اَما هَنو گُنَهکار هادِم، مسیح وَخاطر اَما مُرد. 9پَ، اَلَه که اُ واسطَهِ خون آنا صالح اُ حساب اُندِستِم، چاد بِشتَه اُ واسطَهِ آنا از خشم خدا نجات پیدا اَکنِم. 10اَسِی که اَگَه مِ موکَوا که دشمن هادِم، اُ واسطَهِ مرگ پُسُش خاد خدا صلح دَدَ بُدِم، چاد بِشتَه اَلَه که خاد خدا صلح مُهَه، اُ واسطَهِ زندگِنِ پُسُش نجات پیدا اَکنِم. 11نِه فَکَط هَمِ، بلکه اَما هم اُ واسطَهِ خداوندمو عیسی مسیح که اَلَه اُ واسطَهِ آنا خاد خدا صلح دَدَ بُدِستِم، تِی خدا خارامی اَکنِم.
مرگ اُ واسطَهِ آدام، زندگی اُ واسطَهِ مسیح
12پَ هَموناکِه گناه اُ واسطَهِ یَک آدام اُ تِک دنیا اُمَ، و اُ واسطَهِ گناه، مرگ اُمَ، و اینا بو که مرگ دامنگیر هَمَهِ آدامیا بو، اَسِی که هَمَه گناه شُکِه 13اَسِی که واکعاً کَبل از اِکِه شریعت دَدَ بِبِه، گناه تِک دنیا هاد، ولی جَی که شریعت نِبِه، گناه اُ حساب نِدا. 14با اِ حالا، از آدام تا موسی پیغامبر، مرگ اُ هَمَه حُکمرانی اُشکِه، حتی اُ آنایایی که گناهیاشو چُنِ خطای آدام نِهاد. آدام، نَمونَه مِ کسی هاد که باید اُندِستاد.
15ولی هَدیَه خدا چُنِ مِ خطا وا نی. اَسِی که اَگَه وَخاطر خطای یَک آدام، خیلیا مُردِت، چاد بِشتَه فیض خدا و هَدیَهای که اُ واسطَهِ فیض یَک آدام، یعنی عیسی مسیح فراهم بو، فَراوون اُ خیلیا دَدَ بو. 16اِ هَدیَهوا، چُنِ نتیجَه گناه مِ یَک نفرا یعنی آدام نی. اَسِی که محاکمَهای که بعد از یَک خطا اُمَ محکومیت شَئو، ولی هَدیَهای که بعد از خطائِی زیاد اُمَ صالح اُ حساب اُندَهوا شَئو. 17اَسِی که اَگَه وَخاطر خطای یَک آدام، مرگ اُ واسطَهِ مِ یَک آداما حُکمرانی اُشکِه، چاد بِشتَه آنایایی که فیض بی حَد و اندازَه خدا و هَدیَه صالحی اُ آنایا دَدَ اَبِه، اُ واسطَهِ مِ یَک آداما، یعنی عیسی مسیح، تِی زندگی حُکمرانی اَکنِت.
18پَ هَموناکِه یَک خطا باعث محکومیت هَمَهِ آدامیا بو، هَمونا هم یَک کَرِ صالح باعث صالح اُ حساب اُندَ و زندگِنِ هَمَهِ آدامیا اَبِه. 19اَسِی که هَموناکِه اُ واسطَهِ نافَرمُنِنِ یَک آدام، خیلیا گُنَهکار بُدِت، هَمونا هم اُ واسطَهِ فَرمو بُردَهِ یَک آدام، خیلیا صالح اَبِت.
20اَلَه، شریعت اُمَ تا خطا بُری بِبِه؛ ولی جَی که گناه بُری بو، فیض بی حَد و اندازَه بُری بو. 21تا هَموناکِه گناه تِی مرگ حُکمرانی اُشکِه، فیض هم اُ واسطَهِ صالح بُدَهای که اُ زندگِنِ اَبَدی اَرَسِه، حُکمرانی بِکو، اُ واسطَهِ خداوندمو عیسی مسیح.
Markert nå:
نامَه رومِنیا 5: LAB
Marker
Del
Sammenlign
Kopier
Vil du ha høydepunktene lagret på alle enhetene dine? Registrer deg eller logg på
@ 2024 Korpu Company
