نامَه رومِنیا 13
13
اطاعت از صاحبِی مَکام و منصب
1بِهِر تَ هرکَه، مطیع صاحبِی مَکام و منصبی که لِی کَرِت بِه. اَسِی که هیچ صاحب مَکام و منصبی نی، غیر از اِکِه از طرف خدا بِه، و آنایایی که هِت، از طرف خدا معین بُستِت. 2پَ هرکَه وَ ضد آنایاکِه صاحب مَکام و منصب هِت اَوَایستِ، وَ ضد مِ چِی که خدا معین اُشکِردِ، اَوَایستِ؛ و آنایاکِه اینا کَری اَکنِت، محاکمَه اَبِت. 3اَسِی که آدامِی درستکار از حاکمیا تِرسی شُنی، ولی آدامِی بَدکار از آنایا اَتِرسِت. تَئِه از کسی که صاحب مَکام و منصبِه تِرسی اُتنِبِه؟ پَ مِ چِی که وَلمِه، اَنجوم هادِ که آنا تعریف تُز اَکو. 4اَسِی که آنا نوکر خدائِه اَسِی خیریتُت. ولی اَگَه کَر بَد اَکنِش، بِتِرس، اَسِی که آنا شمشیرا اَلَکی اُمرَهِ خوش نابَه. اَسِی که آنا نوکر خدائِه، کَسیه که انتکام اَگِرِ و خشم خدائا اَسِی کسی دارِ که کَر نِ وَلم اُشکِردِ. 5پَ آدام باید از کُدرتمندیا اطاعت بِکو، نِه فَکَط وَخاطر دوری از خشم خدا، بلکه هَمینا هم وَخاطر وجدان.
6اَسِی که وَخاطر هَمِ مالیات اَتی، اَسِی که آنایاکِه صاحب مَکام و منصب هِت خادمِی خدا هِت و اُ خوشو وَکف هَمِ کَرا شُکِردِ. 7دِین هرکَه که تُن گَردِئِه اُجا بیاری: اُ آناکِه دِین مالیات دَدَ تُهَه، مالیات هاتی؛ اُ آناکِه دِین خَراج دَدَ تُهَه، خَراج هاتی؛ اُ آناکِه دِین احترام نَدَ تُهَه، احترام هُنِسی؛ و اُ آناکِه دِین حرمت نَدَ تُهَه، حرمت هُنِسی.
اَنجوم دَدَهِ شریعت اُ واسطَهِ محبت
8زِرِ دِین هِسکَه مَبی، غیر از اِکِه اُ یَکُدو محبت بِکنی. اَسِی که کسی که اُ یِکِیدو محبت اَکو، شریعتا اَنجوم اُشدَدِ. 9اَسِی که حُکمِی ’زنا مَکو‘، ’کَتل مَکو‘، ’دُزی مَکو‘، ’طَمَع مَکو‘، و هر حکمِیدو، هَمَه تِی اِ کلوما خلاصَه اَبِه که «خاطر هُمسادَت چُن خوت اُتبِئِه.» 10محبت، اُ هُمسادَش بَدی ناکو؛ پَ محبت اُ اَنجوم رَسِدَهِ شریعتِه.
11علاوَه بَر اِ، شما اَدانی که تِی چه زَمونی هی. اَسِی که ساعتُش رسِدِ که از خُو آپابی، اَسِی که آلَه از مِ موکَهای که اوّل ایمون مُئو، نجات اُ اَما نَزیکتَئِه. 12شُو تَمومِه، راز نَزیکِه. پَ بِلگی کَرِی بَد تاریکیا اُدَر هُبِئِم و زِرَهِ نور اُبار کِنِم. 13بِلگی اونا وَلم رفتار بِکنِم که لایِک کَسِیه که تِی راز روشنِت. وَختمو وَ عیاشی و عَرَک خوری و بیعفتی و هَوسبازی و جَر و مُرافِعَه و حسودی نِگذَرِنِم. 14بلکه خداوند عیسی مسیحا چُن جُمَه اُبار کِنی و اَسِی جسم هیچ تدارکی مَبِنی که خواستَهیّاشو اُجا بیاری.
Markert nå:
نامَه رومِنیا 13: LAB
Marker
Del
Sammenlign
Kopier
Vil du ha høydepunktene lagret på alle enhetene dine? Registrer deg eller logg på
@ 2024 Korpu Company
