وَحی 20
20
هزار سال
1بعد اُ یَک فرشتَهای اُمدی که از آسِمو زیر اَدامَه، و کِلیل چاه هاویَه و یَک زانجیر گاتی شُ تِک دست هاد. 2فرشتَه مِ اَژدَهائا، مِ مار کَدیمِنا، مِکِه ابلیس و شیطونِه، اُشگِرِت و اَسِی هزار سال اسیر اُشکِه. 3و اُ آنا شُ تِک چاه هاویَه بِست و دَرا شابَست و شُ لو مُهر و موم کِه، تَ دِگَه اُ ملتیا گول نِزاد تا زَمونی که مِ هزار سالا تَموم بِبِه. بعد از آنا باید اَسِی یَک مدت کامی آزاد بِبِه.
4مِ موکَوا ما تختِی اُمدی که کسِی شُ لو اُداستادِت که اِکتدار حُکم کِردَ اُ آنایا دَدَ بُستاد. هَمینا هم جون کَسِییا اُمدی که وَخاطر شهادت دَدَ دربارَهِ عیسی و وَخاطر کلوم خدا سِرَیّاشو بُلِدَ بُستاد. آنایا مِ جونوَر وحشِنا یا بُتُش شُنِپَرستِدِستاد و نِشونَهاش، لِی پِشانی یا دستشو کَبول شُنِکِردِستاد. آنایا دوبارَه زندَه آبُدِت و هزار سال خاد مسیح حُکمرانی شُکِه. 5بَکیَه مُردَیّا زندَه آنِبُدِت تا موکَهای که مِ هزار سالا تَموم بو. اِ اوّلین زندَه آبُدَ از مُردَیّائِه. 6مُتبارک و مکدّسِه کسی که تِی اوّلین زندَه آبُدَ از مُردَیّا شریکِه. مرگ دوّم لِی اینا کسِی هیچ کُدرتی اُشنی، بلکه آنایا کاهِنِی خدا و مسیح اَبِت و هزار سال خاد آنا حُکمرانی اَکنِت.
شکست شیطون
7وَختی که مِ هزار سالا تَموم بِبِه، شیطون از زندانُش آزاد اَبِه 8و دَر اَدا تا اُ ملتیا که از چهارگوشَه زِمی هِت گول بِزاد. آنا، جوج و ماجوجیا که تعدادشو کَدِ شِنِی دریائِه، اَسِی جنگ جمع اَدَکو. 9آنایا تِی دشت وسیع زِمی جلو چِدِت، و دور تا دور اردوگاه مکدّسیا و مِ شهر عزیزا شُگِرِت، ولی تَش از آسِمو بَرِئِست و اُ آنایا اُشسُخِنَه و شا لاگ کِه. 10و ابلیس، که شُ آنایا گول زادِستاد تِک دریاچَهای از تَش و گوگرد بِستَه بو، جَی که مِ جونوَر وحشِنا و نَبِنِ دارُوِنا بِستَه بُستادِت. آنایا شاو و راز تا اَبَدالآباد عذاب اَکَشِت.
محاکمَه بُدَ جلووِ تخت سَفید گات
11مِ موکَوا ما یَک تخت سَفید گاتی و اُ آناکِه شُ لو اُداستاد اُمدی. آسِمو و زِمی از حضور آنا گُروختِت و جَی اَسِی آنایا آدی نِمَ. 12اُ مُردَیّا اُمدی چه گات و چه کینگِلِه، که جلووِ مِ تختا وَایستَدِستادِت. و دفتریا واز آبو. مِ موکَوا یَک دفترِیدو واز آبو که دفتر زندگیه. مُردَیّا اُ وسیلَه مِ چِی که تِی دفتریا نوشتَه بُستاد، طِبک مِ چِی که اَنجوم شُدَدِستاد، محاکمَه بُدِت. 13دریا اُ مُردَهئِی که شُ تِک هادِت تحویل اُشدَ، مرگ و دنیای مُردَیّا هم، مُردَهئِی که شُن تِک هادِت شُن تحویل دَ، و هر یَکشو طِبک مِ چِی که اَنجوم شُدَدِستاد محاکمَه بُدِ. 14مِ موکَوا مرگ و دنیای مُردَیّا اُ تِک دریاچَه تَش بِستَه بُدِت. دریاچَه تَش، مرگ دوّمِه. 15هرکَه اسمُش تِی مِ دفتر زندگِنا نوشتَه نِبُستاد، اُ تِک دریاچَه تَش بِستَه بو.
Markert nå:
وَحی 20: LAB
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
@ 2024 Korpu Company
