نامَه یعکوب 3
3
مَهار کِردَهِ زابو
1کاکَئِی ما، بُری از شما اَزدُمبالَهِ اِ نِبِت که معلم بِبِت، اَسِی که اَدانی اَسِی اَما که یاد اَتِم، کضاوت سختتَه اَبِه. 2اَسِی که هَمَهِ اَما تِی بُری چِییا خطا اَکنِم. اَگَه کسی تِی حرف زادَش خطا نِکو، آدام کاملیه و شَشابِه هَمَهِ بَدنُش مَهار بِکو.
3اَما اُ بُچ اسپیا مَهار اَدَبانِم، تا آنایا از اَما اطاعت بِکنِت، و کُل هیکل حیوونا هم اُ هر طرف که مُبِئِه اَبرِم. 4اُ کَشتِنِیا هم چَش بِکنی، با اِکِه بُری گاتِت و بادِی کَوی شُن حرکت دَر دارِت، ولی وَ یَک سُکّان کینگِلِه، اُ هر طرف که ناخدا شَئِه هدایت اَبِت. 5هَمینا هم، زابو عضو کینگِلِهایه، ولی ادعائِی گات اُشَه. چینا یَک جَرَکَه کینگِلِه یَک جنگل گاتیا تَش اَزاد. 6زابو تَشِه؛ یَک دنیا شرارتِه. زابو یَک عضویه بین اعضای بَدنمو، که کُل بَدنا لُش اَکو و تَموم دُورَهِ زندگیا اُ تَش اَکَشِه - تَشی که از جَهَنام شُعلَه اَگِرِ!
7اَسِی که آدامیزاد شَشابِه اُ مَ رَکَم حیوون وحشی و پرندَه و خزندَه و جونوَر دریا اهلی بِکو و اُشکِردِ، 8ولی هیچ آدامی اُشناشابِه اُ زابو اهلی بِکو. زابو شَرّیِه که آروم ناگِرِ و پُر از زهرِ کُشَندَئِه!
9وَ اِ زابُنا، اُ خداوندمو و بای آسِمونیمو حمد و ستایش اَکنِم و خاد هَمِ زابُنا، اُ مردمی که اُ شباهت خدا نَک بُدِستِت، لعنت اَکنِم. 10از یَک کَپ، هم حمد و ستایش دَر اَدا، هم لعنت! اَی کاکَئِی ما، اِ چِییَهوا نِ وَلمِه اینا بِه. 11مَ اَبِه از یَک چشمَه، هم هاوِ شِری دَر بیاد، هم هاوِ سور؟ 12اَی کاکَئِی ما، مَ اَبِه درخت انجیر، زیتون ثَمَر هادَ؟ یا درخت انگور، انجیر هادَ؟ هَمینا هَم چشمَهِ هاوِ سور، اُشناشابِه هاوِ شِری هادَ.
حکمت از بَرا
13بین شما حکیم و دانا کِی؟ بِهِری مِ آداما اِئا خاد وَلم زندگی کِردَش نِشو هادَ. وَ کَریاش که خاد اُفتادَگیه و از حکمت اَدا. 14ولی اَگَه تِک دلتو حسودِنِ تَهر و خودخواهی تُهَه، اُ خوتو افتخار مَکنی و وَ ضد حکیکت حرف مَزنی. 15اینا حکمتی از آسِمو نِدا، بلکه زِمِنی و نَفسانی و شیطونیه. 16اَسِی که هرجا حسودی و خودخواهی بِه، آنکا بی نظمی اَبِه و مَ رَکَم رفتار زشت هم هَه.
17ولی مِ حکمتی که از آسِموئِه، اوّل پاکِه، بعد صلح اَدارِ و آروم و نصیحتپذیرِه، و پُر از رحمت و ثَمَرَهِ خَشِه، و بین هِسکَه فرق نانِسِه و بی ریائِه! 18صالح بُدَ، ثَمَرَهایِه که تِی صلح و صفا، و اُ دست آدامِی که اَزدُمبالَهِ صُلحِت کِشتَه اَبِه.
Markert nå:
نامَه یعکوب 3: LAB
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
@ 2024 Korpu Company