نامَه دوّم تِسالونیکِنیا 3
3
اَسِی اَما دعا بِکنی
1آخر کَر، اَی کاکَیّا، اَسِی اَما دعا بِکنی تا کلوم خداوند وَ سرعت جلو اُچِه و اُ آنا حرمت بِکنِت، هَموناکِه بین شما بو. 2و تا اَما از آدامِی شریر و نِ وَلم خلاص بِبِم. اَسِی که هَمَه ایمون شُنی. 3ولی خداوند وفادارِه. آنا اُ شما پابَرجا اَکو و جلووِ مِ شَریرا از شما محافظت اَکو. 4اَما تِی خداوند از شما خاطرمو جَمعِه که مِ چِییَی که اُ شما حُکم اَکنِم اَنجوم دَدای و اِلا مِم بعد هم اَنجوم اَتی. 5و بِهِر خداوند دلیاتو اُ محبت خدا و پایدارِنِ مسیح هدایت بِکو.
هشدار وَ ضد تَلانتی
6اَلَه اَی کاکَیّا، وَ اسم خداوندمو عیسی مسیح اُ شما حُکم اَکنِم که از هر کاکَی که تَلانتی اَکو و طِبک رسمی که از اَما تُگِرِتِه، رفتار ناکو، دوری بِکنی. 7اَسِی که شما خوتو اَدانی چینا باید از اَما اُلگو بِگِری، اَسِی که اَما موکَهای که خاد شما هادِم، نِه تَلانت هادِم، 8و نِه نُنِ کَسیا مُفت مُخَردِ، بلکه وَ سختی و زحمت شاو و راز کَر مُکِه تَ سَربار هیچیَکتو نِبِم. 9نِه وَخاطر اِکِه اَما اِ حَکّا مُنی، بلکه تا از خومو اُ شما یَک نَمونَه هاتِم تا اُلگو بِگِری. 10اَسِی که حتی موکَهای که خاد شما هادِم اِئا مُن شما حُکم کِه که: «اَگَه کسی اُشنائِه کَر بِکو، نو هم نِخَه.»
11اَسِی که شُنُفتائِم که از بینتو مُشتی تَلانتی اَکنِت، اِیا کَر ناکنِت، بلکه تِی کَر بَکیَه فضولی اَکنِت. 12اَلَه اُ اینا آدامِی تِی خداوندْ عیسی مسیح حُکم اَکنِم و تشویکشو اَکنِم که بی سر و صدا کَر خوشو بِکنِت و نُنِ خوشو دَر بیارِت. 13ولی شما اَی کاکَیّا، از خوبی کِردَ خستَه مَبی.
14اَگَه کسی از مِ چِی که اَما تِی اِ نامَهوا اَگائِم اطاعت اُشنِکِه، لِی مِ آداما یَک نِشونَه هُنِسی و خاد آنا رفت و آمد مَکنی، تَ خَجالَت زادَ بِبِه. 15وَ عنوان دشمن اُ آنا چَش مَکنی، بلکه چُنِ یَک کاکَ اُ آنا هشدار هاتی.
دعای خیر
16اَلَه خداوند صلح و سلامتی خوش، همیشَه از هر نظر اُ شما صلح و سلامتی هادَ. خداوند خاد هَمَهِ شما بِه.
17ما، پولُس، اِ سلاما وَ دست خوم اَنِوِسام. اِ نِشونَه ما تِی هَمَهِ نامَهیّامِه. ما اینا اَنِوِسام.
18فیض خداوندمو عیسی مسیح خاد هَمَهِ شما بِه.
Markert nå:
نامَه دوّم تِسالونیکِنیا 3: LAB
Marker
Del
Sammenlign
Kopier
Vil du ha høydepunktene lagret på alle enhetene dine? Registrer deg eller logg på
@ 2024 Korpu Company