نامَه اوّل تِسالونیکِنیا 3
3
1پَ وَختی دِگَه مُنِشابو طاکَت بیارِم، راضی بُدِم تِی شهر آتِن اُ اَما تنها هُنِسِت. 2و اَما اُ تیموتائوس، که کاکَموئِه و تِی کَر انجیل مسیح همکار خدائِه، مُفرِستَ تَ اُ شما تِی ایمونتو پابَرجا و تشویک بِکو، 3تا هِسکَه وَخاطر اِ مصیبتیا سُست نِبِه، اَسِی که شما خوتو اَدانی که اَما اَسِی هَمِ تعیین بُدِستِم. 4اَسِی که وَختی خاد شما هادِم، هَی وَ جلو مُن شما اَگُت که اَما باید عذاب و مصیبت بِبِنِم، و هَمونا هم که اَدانی اینا بُدِ. 5وَخاطر هَمِ، وَختی دِگَه اُمنِشابو طاکَت بیارام، تیموتائوسا مُحَد فِرِستَدی تا از ایمونتو خبر بِگِرام، اَسِی که تِرس اِ اُمهاد که مِ وسوسه کنندَهوا، یعنی ابلیس وَ یَک طوری وسوسه اُشکِردِسبی و زحمتمو اُ هدر چِدِسبِه.
خبرِی دلگرمکنندَه تیموتائوس
6ولی اَلَه تیموتائوس از طرف شما مُنحَد اُندِ، و اَسِی اَما خبر خَش ایمون و محبتتو شَئوردِ، و خبر شَئوردِ که شما همیشَه از اَما وَ مهربونی یاد اَکنی و مُشتاک دِدَهِ اَما هی، هَموناکِه اَما هم مُشتاک دِدَهِ شما هِم. 7وَخاطر هَمِ، اَی کاکَیّا، اَما تِی هَمَهِ پریشونیمو و مصیبتمو، وَخاطر ایمونتو از شما دلگرم آبُدِستِم. 8اَسِی که اَلَه اَگَه شما تِی خداوند پابَرجا وامانی، مِ موکَوائِه که اَما زندگی اَکنِم. 9اَسِی که اَما چینا ماشابِه خدائا اَسِی شما شکر بِکنِم، اَسِی اِ هَمَه احساس خارامِنی که وَخاطر شما تِی حضور خدامو مُهَه؟ 10اَما شاو و راز از دل و جو دعا اَکنِم تَ اُ شما رودَررو بِبِنِم و چِی که تِی ایمونتو کامِه، رفع بِکنِم.
11اَلَه بِهِر، بای آسِمونیمو خدا خوش و خداوندمو عیسی، رَهِ اَمائا اُ طرف شما واز آکو، 12و هَموناکِه محبت اَما اُ شما بِشتَه اَدَبِه، خداوند محبت شمائا نسبت اُ یَکُدو و اُ هَمَه مردم زیاد و فَراوون بِکو، 13تا اینا، دلِی شمائا پابَرجا بِکو تا موکَهای که خداوندمو عیسی اُمرَهِ هَمَهِ مکدّسیاش اَدا، تِی حضور خدامو، بای آسِمونی، بیعیب و مکدّس بی.
Markert nå:
نامَه اوّل تِسالونیکِنیا 3: LAB
Marker
Del
Sammenlign
Kopier
Vil du ha høydepunktene lagret på alle enhetene dine? Registrer deg eller logg på
@ 2024 Korpu Company