پیدأیش ۱۳
۱۳
لوطٚ سیوأ بوستن ابرامٚ جَا
1 ابرام خو زنأی سارای و لوطٚ اَمرأ و هر اونچی کی دأشتی، کوچ بوکوده کنعانٚ جونوبٚ ور نِگِبٚ میأن. 2 ابرام خٚیلی مأل و مینألدأر بو. اون طلأ و نوقره و دٚدأرٚ گلّه دأشتی. 3 ابرام و اونی اَمرأ آدمأن نگبٚ جَا رأ دکفتٚده، دأل بٚدأل، بوشؤده بیتئیلٚ ور و بیتئیل و عایٚ رأ میأن او جیگأ کی پیشترأن اویَه موقت سأمأن بیگفته بود، چأدر بٚزِده. 4 اَن هو جیگأ بو کی ابرام پیشترأنٚ رِه اویَه ایتأ مذبح چأکوده و خوداوندٚ نأمَ دؤخأده.
5 لوطٚم خٚیلی گأب و گوسوٚند و غولأم دأشتی. 6 ابرام و لوط نتأنستیدی پیله گلّهیأنٚ دأشتنٚ وأسی کسکسٚ اَمرأ ایتأ جیگأ سأمأن بیگیرٚد، چونکی اَشأنٚ گلّهیأنٚ چرستنٚ رِه اوندر کی وٚست بٚبه دشتی نٚنأبو 7 و ابرام و لوطٚ چوپأنأنٚ میأن دعوأ رأ دکفتی. او زمأتٚ میأن کنعأنیأن و فرّزیأنٚم او سرزیمینٚ میأن سأمأن دأشتیدی. 8 پٚس ابرام لوطَ بوگفته: «اَمأن فکٚ فأمیلیم و اَمی چوپأنأن نوأستی کسکسٚ اَمرأ دعوأ بیگیرٚد. 9 خورومٚ کأر اَن ایسٚه کی کسکسٚ جَا سیوأ بیبیم. اَسه ایتأ پیله دشت اَمی پیشٚ سٚر نٚهأ. هرتأ ورَ کی خأیی اینتخأب بوکون و منم شٚم تی او روبرو. اگه بیشی چپٚ ور، من شٚم رأستٚ ور و اگه رأستٚ ورَ اینتخأب بوکونی، من شٚم چپٚ ور.»
10 بأزون لوط دؤرٚوٚرَ ایتأ نیگأ تأوٚدأ و تومأمٚ اُردنٚ روخأنٚ درهیَ فأندرسته. تومأمٚ او سرزیمین تأ صوغر، عدنٚ بأغ و مصرٚ مأنستَن سرسبز بو. خوداوند هنو سدوم و عموره شهرأنَ جٚه بین نٚبرده بو. 11 لوط تومأمٚ اُردنٚ درهیَ اینتخأب بوکوده و کوچ بوکوده شرقٚ ور. اَطؤیی بو کی اون و ابرام کسکسٚ جَا سیوأ بوبوستد. 12 پٚس ابرام کنعانٚ سرزیمینٚ میأن بِئیسأ و لوط بوشؤ اُردنٚ درّه شهرأنٚ ور و ایتأ جیگأ میأن سدومَ فأنرٚسه سأمأن بیگیفته. 13 سدومٚ آدمأن خٚیلی فأسید بود و خوداوندٚ رِه گونأ کودیدی.
14 اونی پٚسی کی لوط ابرامٚ جَا سیوأ بوبوسته، خوداوند ابرامَ بٚفرمأسته: «تی دؤرٚوٚرٚ خُب فأندر! 15 تومأمٚ اَ سرزیمینَ کی دِئندری، اَبدٚ رِه تٚرَه و تی نتأجَ بٚخشم. 16 تی نتأجَ زیمینٚ خأکٚ مأنستَن زیأدَ کونٚم. 17 ویریز و تومأمٚ اَ سرزیمینٚ اَسر تأ او سرٚ میأن کی اونَ تٚرَه بٚخشم، بٚگرد.» 18 بأزون ابرام ویریشته و خو چأدرَ جمَ کوده، کوچ بوکوده حبرونٚ دورون ممری بلوط دأرأنٚ میأن. ابرام اویَه خوداوندٚ رِه ایتأ مذبح چأکوده.
Markert nå:
پیدأیش ۱۳: GCB
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
The Gilaki Contemporary Bible is a Product of Transform Iran © 2024. All rights reserved. www.kelisayejame.org