پیدأیش ۱۱
۱۱
بابِلٚ بورج
1 تومأمٚ دونیأ آدمأن او دؤرأنٚ میأن ایتأ زوأنٚ اَمرأ گب زئیدی. 2 دونیأ آدمأن ایپچهایپچه زیأدَ بوستیدی و مردوم شرقٚ ور کوچ کودیدی. آخرپٚسی اوشأن فأرٚسِده بابِلٚ میأن ایتأ پیله صأرأیییَ و اویَه سأمأن بیگیفتٚد. 3 اوشأن کسکسٚ اَمرأ مشوٚرت بوکوده، بوگفتٚده: «بأیید خشت چأکونیم و اوشأنَ خُب بٚپچیم» او سأمأنٚ میأن سنگٚ عوض خشت و ملأتٚ عوض قیر کأر کودید. 4 بأزون بوگفتٚده: «بأیید اَمِرِه ایتأ پیله شهر بٚنأ بوکونیم و ایتأ پیله بورج اونی میأن چأکونیم کی اونی لچه فأرٚسه آسمأنٚ جؤر کی نأمدأر بیبیم. اَ کأر ولأنه کی اَمأن پٚخش و پلأ بیبیم.» 5 ولی خوداوند بأمؤ بیجیر کی شهر و او بورج کی مردوم بٚنأ کودأندوبودَ بیدینه. 6 خوداوند بٚفرمأسته: «مردوم کسکسٚ اَمرأ ایتأ بوبوستده و همٚتأن ایتأ زوأنٚ اَمرأ گب زٚنٚده. جٚه اَنٚ پٚسی هرتأ کأر کی بٚخأیٚد تأنٚده بوکوند. 7 پٚس بأیید بیشیم بیجیر و اوشأنٚ زوأنَ عوضَ کونیم کی کسکسٚ گبَ نفأمٚد.» 8 چونکی اَ زوأنَ نفأمستیدی اوشأن شهرٚ چأکودنٚ جَا دٚس اوسأدٚد و اَطؤیی بو کی خودا اَشأنَ زیمینٚ رو پٚخش و پلأ بوکوده. 9 هنٚ وأسی او شهرَ بابِل نأم بٚنأده، چونکی اویَه بو کی خوداوند اَشأنٚ زوأنَ دؤرشین وأرشینَ کوده و اَشأنَ زیمینٚ رو پٚخش و پلأ بوکوده.
جٚه سامٚ تأ ابرام
10 اَن سامٚ نتأجٚ تأریخچه ایسٚه: طوفأنٚ جَا دو سأل بوبوسته پٚسی، او وخت کی سام ۱۰۰ سأل دأشتی، اونی پٚسر ارفکشاد بودونیأ بأمؤ.
11 ارفکشادٚ تولدٚ پٚسی، سام ۵۰۰ سأل دِه زٚندیگی بوکوده و چنتأ پٚسر و دؤخترٚ صأب بوبوسته.
12 او وخت کی ارفکشاد سی و پنج سأل دأشتی، اونی پٚسر شالح بودونیأ بأمؤ 13 شالحٚ تولدٚ پٚسی، ارفکشاد ۴۰۳ سأل دِه زٚندیگی بوکوده و چنتأ پٚسر و دؤخترٚ صأب بوبوسته.
14 او وخت کی شالح ۳۳ سأل دأشتی، اونی پٚسر عابر بودونیأ بأمؤ. 15 عابرٚ تولدٚ پٚسی، شالح ۴۰۳ سأل دِه زٚندیگی بوکوده و چنتأ پٚسر و دؤخترٚ صأب بوبوسته.
16 او وخت کی عابر سی و چأر سأل دأشتی، اونی پٚسر فِلِج بودونیأ بأمؤ. 17 فِلِجٚ تولدٚ پٚسی، عابر ۴۳۰ سأل دِه زٚندیگی بوکوده و چنتأ پٚسر و دؤخترٚ صأب بوبوسته.
18 فِلِج سی سأل دأشتی کی اونی پٚسر رعو بودونیأ بأمؤ. 19 رعو تولدٚ پٚسی، فِلِج ۲۰۹ سأل دِه زٚندیگی بوکوده و چنتأ پٚسر و دؤخترٚ صأب بوبوسته.
20 او وخت کی رعو سی و دو سأل دأشتی، اونی پٚسر سروج بودونیأ بأمؤ. 21 سروجٚ تولدٚ پٚسی، رعو ۲۰۷ سأل دِه زٚندیگی بوکوده و چنتأ پٚسر و دؤخترٚ صأب بوبوسته.
22 او وخت کی سروج ۳۰ سأل دأشتی، اونی پٚسر ناحور بودونیأ بأمؤ. 23 ناحورٚ تولدٚ پٚسی، سروج ۲۰۰ سأل دِه زٚندیگی بوکوده و چنتأ پٚسر و دؤخترٚ صأب بوبوسته.
24 او وخت کی ناحور بیست و نه سأل دأشتی، اونی پٚسر تارح بودونیأ بأمؤ. 25 تارحٚ تولدٚ پٚسی، ناحور ۱۱۹ سأل دِه زٚندیگی بوکوده و چنتأ پٚسر و دؤخترٚ صأب بوبوسته.
26 تارح هفتأد سأل دأشتی کی سهتأ پٚسرٚ صأب بوبوسته کی اوشأنی نأم ابرام، ناحور و هاران بو.
تارحٚ نتأج
27 اَن تأرَحٚ نتأجٚ تاریخچه ایسٚه: ابرام، ناحور و هارانٚ پِئر تارح بو و لوطٚ پِئر هاران بو.
28 هاران هو جأ دورون کی بودونیأ بأمؤ (ینی اورٚ کلدانیأنٚ میأن) جوأنی سنٚ سألٚ دورون خو پِئرٚ چومأنٚ ورجأ بٚمٚرده.
29 ابرام و ناحور عروسی بوکودٚد. ابرامٚ زنأکٚ نأم سارای و ناحورٚ زنأکٚ نأم مِلکه بو. مِلکه و اونی خأخور یسکه، ناحورٚ برأر ینی هارانٚ دؤخترأن بود. 30 سارای نأزأ زنأی بو و زأی نأشتی.
31 تارح خو پٚسر ابرام، خو نوه لوط و خو عروس سارایَ اوسأده و اورٚ کلدانیأنَ بٚنأ و بوشؤ کنعأن. ولی او وخت کی اوشأن فأرٚسِده حرانٚ شهرٚ میأن اویَه بِئیسأده. 32 تارح ۲۰۵ سأل سن دأشتی کی حرانٚ میأن بٚمٚرده.
Markert nå:
پیدأیش ۱۱: GCB
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
The Gilaki Contemporary Bible is a Product of Transform Iran © 2024. All rights reserved. www.kelisayejame.org