यहून्ना 15
15
ईसु सच्ची अंगूर की बेल
1 सच्ची अंगूर की बेल मैं हौं, और मेरो अब्बा किसान है। 2हर डुग्गी जो मैं मैई है और ना फलै है, बाकै बौ काट देवै है, और हर डुग्गी जो फलै है बाकै बौ छाँटै है कै बौ और फलै। 3तुम बा बचन के बजै सै सुद्द हो चुके हौ जो मैंनै तुमसै कैई है। 4तुम मैं मैई बने रौह और मैं तुम्मै। जैसे डुग्गी अगर अंगूर की बेल मै बनी ना रैहबै है तौ अपने आप सै ना फल सकै है, बैसेई तुम बी अगर मैंई मै ना बने रैहए तौ ना फल सकौ हौ।
5 “मैं अंगूर की बेल हौं और तुम डुग्गी हौ। जो मैं मै बनो रैहबै है, और मैं बामै, बौ भौत फल लाबै है, कैसेकै मैंसै अगल होकै तुम कुछ बी ना कर सकौ हौ। 6अगर कोई मैं मै ना बनो रैहबै है, तौ बौ बा डुग्गी के हाँई फैंक दओ जावै है, जो सूक जावै है, और आदमी बाकै इखट्टो करकै आग मै जोर देवै हैं और बे जर जावै हैं। 7अगर तुम मैंई मै बने रौह, और मेरे बचन तुम्मै बने रैंह तौ जो चाँहे माँगौ, बौ तुमरे ताँई हो जागो। 8तुम भौत फल लाऔ और मेरे चेला बने रौह, इसई सै मेरे अब्बा की बड़ाई होवै है।
9 “जैसो अब्बा नै मैंसै पियार करो है, मैंनै बी तुमसै बैसोई पियार करो है। मेरे पियार मै बने रैहओ। 10अगर तुम मेरी आगियाँऔ कै मानौगे तौ तुम मेरे पियार मै बने रौहगे, बैसेई जैसो मैं अपने अब्बा की आगियाँऔ कै मानौ हौं और बाके पियार मै बनो रैहबौं हौं। 11जे बात मैंनै तुमसै इसताँई कैई हीं कै मेरी खुसी तुम्मै बनी रैह, और तुमरी खुसी पूरी हो जाय। 12#यहून 13:34; 15:17; 1 यहून 3:23; 2 यहून 1:5मेरी आगियाँ जौ है कै जैसो मैंनै तुमसै पियार करो, बैसोई तुम बी एक दूसरे सै पियार करौ। 13इस्सै महान पियार और किसी को ना है, कै कोई अपने दोस्तौ के ताँई अपनी जान दे दे। 14जो आगियाँ मैं तुमकै देवौ हौं, अगर बाकै मानौ तौ तुम मेरे दोस्त हौ। 15अब सै मैं तुमकै गुलाम ना कैंगो, कैसेकै गुलाम ना जानै है कै बाको मालिक का करै है, पर मैंनै तुमकै दोस्त कैई है, कैसेकै बे सब बात जो मैंनै अपने अब्बा सै सुनी हैं तुमकै बता दंई हैं। 16तुमनै मैं ना चुनो, पर मैंनै तुम चुने और तुमकै ठैराओ बी है, कै तुम फल लाऔ और तुमरो फल बनो रैह, कै तुम मेरे नाम सै जो कुछ अब्बा सै माँगौ बौ तुमकै देगो। 17मैं तुमकै जे आगियाँ इसताँई देवौ हौं कै तुम एक दूसरे सै पियार करौ।
दुनिया की नफरत
18 “अगर दुनिया तुमसै नफरत करै है, तौ तुम जानौ हौ, कै बानै तुमसै पैले मैंसै नफरत करी है। 19अगर तुम दुनिया के होते, तौ तुमकै दुनिया अपनौ के जैसे पियार करती, पर इसताँई कै तुम दुनिया के ना हौ और मैंनै तुमकै दुनिया मै सै चुनकै लिकार लओ है इसताँई दुनिया तुमसै नफरत करै है।
20 #
मत्ती 10:24; लूका 6:40; यहून 13:16 “बौ बचन जो मैंनै तुमसै कैओ है, याद रक्खौ ‘नौकर अपने मालिक सै बड़ो ना है।’ अगर उनौनै मैं सताओ तौ बे तुमकै बी सतांगे। अगर उनौनै मेरी बात मानी तौ बे तुमरी बात बी मानंगे। 21पर जे सब बात बे मेरे नाम के बजै सै तुमरे संग करंगे, कैसेकै बे बाकै ना जानै हैं जिसनै मैं भेजो हौं। 22अगर मैं ना आतो और उनसै बात ना करतो, तौ बे पापी ना ठैरते, पर अब अपने पाप के ताँई उनके धौंरे कोई बहानो ना है।
23 “जो मैंसै नफरत करै है बौ मेरे अब्बा सै बी नफरत करै है। 24अगर मैं उनके बीच मै बे काम ना करतो, जो किसी और नै ना करे, तौ बे पाप के दोसी ना होते, पर अब तौ उनौनै देखे हैं। फिर बी बे मैंसै और मेरे अब्बा दौनौ सै नफरत करैं हैं। 25पर उनौनै ऐंसो इसताँई करो कै बौ बचन पूरो हो जो उनके नियम मै लिखो है, ‘उनौनै बिना बजै सै मैंसै नफरत करी।’
26 “जब बौ सायता कन्नै बारो आगो जिसकै मैं अब्बा की ओर सै तुमरे धौंरे भेजंगो, यानी सच्चाई की आत्मा जो अब्बा सै लिकरै है, बौ मेरी गभाई तुमकै देगो। 27और तुम बी मेरी गभाई दोगे, कैसेकै तुम सुरू सैई मेरे संग रैहए हौ।”
Markert nå:
यहून्ना 15: TKB
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
New Life Compute Institute [NLCI] - CC BY-NC-ND 4.0
