EZEKIEL 48
48
Ram An Zem Aw
1-7Saklam ramri cu Mediterranean Tifinriat ihsin nisuahnak lamah a feh pei ih Hethlon khua in Hamath Tlangkawn ah, cutawk in Enon khua ihsin Damaskas ram le Hamath ramih ramri tiang a si pei. Nisuahnak lam ramri ihsin nitlaknak lam ramri Mediterranean Tifinriat tiang ram ṭhenmi cu Israel hrin khat in ṭhenkhat fingfing an co ding ih a tanglam hrin pawl in ramṭhen cu saklam in thlanglam ah a sangsang in an co ding a si:
Dan hrin
Asher hrin
Naftali hrin
Manasseh hrin
Efraim hrin
Reuben hrin
Judah hrin
A Hleice Ih Retmi Ramṭhen
8Cun Judah hrin pawl ram a hun sangtu ramṭhen cu a hleice ih hman dingah a dangte ih ret a si ding. Cuih ramṭhen cu saklam in thlanglam ah peng hra a si ding ih, a kauhlam cu an hrin pawl ih an ṭhenmi nisuahnak lam ihsin nitlaknak lam ram tia a si ding. Hi ramṭhen sungah hin Biakinnpi a um ding.
9Hi ramṭhen a laifangah ramṭhen a hleice in peng hra sau le peng riat kau cu Bawipa ih hrangah pekmi ram a si ding. 10Hi ramṭhen thianghlim sungah puithiam pawl ih comi ram a um ding. Cuih an ram cu nisuahnak lam ihsin nitlaknak lamah peng hra kau a si ding ih saklam in thlanglam ah peng li sau a si ding. Hi ramṭhen laifangah Bawipa ih Biakinn a um ding. 11Hi ram thianghlim cu Zadok ih tesinfa puithiam pawl hrangah a si ding. Annih pawl cu rinsantlak zetin ka hna an ṭuan; Israel mi pawl in thilsual an tuah tikah Levi hrin pawl cu an tel ve naón Zadok hrin puithiam pawl cu an tel ve lo. 12Curuangah Levi mi pawl ih ram sangtu ah ram an nei ding ih a thianghlim bik ram a si ding. 13Levi hrin pawl khal in a hleice in ram an nei ding ih puithiam pawl ih ram ihsin thlanglam ah a si ding. Nisuahnak lam ihsin nitlaknak lamah peng hra a kau ding ih saklam ihsin thlanglam ah peng li a sau ding. 14Bawipa hnenih pekmi ram cu ramṭhen dang pawl lakah a ṭhabik ram a si ih zuar theih, thleng theih le ṭhin theih khal a si lo. Ram thianghlim a si ih Bawipa ih ta a si.
15Cuih ramṭhen sungin a taang hrihmi ram, peng hra a kaumi le peng hnih a saumi cu ram thianghlim a si lo; asinain misenpi hrangah a ṭulnak vekih hman dingmi ram a si. Cuih ramṭhen sungah an duh ahcun an um thei ih a hman khal an hmang thei. Cuih ramṭhen laifangah khawpi a um ding, 16a tung le a vang a can-aw ding ih kap khatah dong thawngli le zanga a si ding. 17Hi khawpi kapah a kimvel in dong zahnih le sawmnga kau hmunlawng a um ding. 18Khawpi an din ngah hnu ih a taang hrihmi ram, hmun thianghlim timi ih thlang, nisuahnak lamah peng li sau le peng hnih kau, nitlaknak lamah peng li sau le peng hnih kau ram cu khawpi sungih um mi misenpi pawl ih lo thlawh ding ram a si ding. 19Khawsungih a ummi hmuahhmuah in zo hrin an si hmanah hi ram cu an thlo thei ding.
20Curuangah ramṭhen laifangah a hleice ih retmi ram cu a tung le a vang can-aw a si ding ih kap khatah peng hra fingfing a si ding; hi sungah khawpi dinnak hmun tla a telcih ding a si.
21-22Hi ramṭhen, Biakinn le puithiam pawl ram le Levi mi pawl ram le khawpi dinnak hmun pawl umnak ram lengah nisuahnak lam le nitlaknak lamih a ummi ram pawl cu mi-uk bawi ih ta a si. A ram cu nisuahnak lamah nisuahnak lam ramri tiang, nitlaknak lamah Mediterranean tifinriat tiang a si ih saklam ah Judah comi ram thawn an ramri aw ding ih thlanglam ahcun Benjamin comi ram thawn an ramri aw ding a si.
Hrin Dang Hrangih Ramṭhen
23-27Hi a hleice ih retmi ramih thlanglam ram cu a taang hrihmi Israel hrin dang pawl ih co dingmi a si; nisuahnak lam ramri ihsin nitlaknak lamah Mediterranean Tifinriat tiang ram cu saklam in thlanglam ah a tanglam ih hrin pawl hin a sangsang in an co ding.
Benjamin hrin
Simeon hrin
Issakhar hrin
Zebulun hrin
Gad hrin
28Gad hrin ih comi ramṭhen thlanglam ah thlanglam ramri cu thlanglam nitlaknak lamah a feh ih Tamar in Kadesh ram ih ramcaar tipuut tiang, cule saklam nitlaknak lamah a feh ih Izipt ramri in Mediterranean Tifinriat tiang a si.
29Cungnungbik Bawipa in, “Hi bangtuk in ram cu Israel hrin pawl ih co dingah nan ṭhen pei ih nan zem-aw ding a si,” tiah a ti.
Jerusalem Kotka Pawl
30Jerusalem khawpi sung luhnak ah kotka hleihnih a um. Khawpi cu a kapli in phardawl in a kulh ih kapkhat cu dong thawngli le zanga fingfing a sau. 31Kap khatah kotka pathum fingfing an um ih kotka pakhat in Israel hrin khatih hmin an keng ciar. Saklam kotka pathum cu Reuben, Judah le Levi hmin suangin an sak. 32Nisuahnak lam kotka pawl cu Josef, Benjamin le Dan hmin suangin an sak. 33Thlanglam kotka pawl cu Simeon, Issakhar le Zebulun hmin suangin an sak. 34Cule nitlaknak lam kotka pawl cu Gad, Asher le Naftali hmin suang ih sakmi an si. 35Khawpi kimvel phardawl pali cu a zatein dong thawng hleiriat a sau. Cuih caan ihsin hi khawpi hmin cu ‘Khinah Bawipa A Um,’#Khinah Bawipa A Um ti cu Yahweh-Shammah tiah an ti. ti a si ding.
Markert nå:
EZEKIEL 48: FCL
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Falam Bible Revision © Bible Society of Myanmar, 2002.
