DANIEL 4
4
Nebuchadnezzar Mang Pahnihnak
1Siangpahrang Nebuchadnezzar in phunkip, hnamkip le ṭongkip hnenah a tanglam thu hi a cah: “Nan parah daihnak um ko seh! 2Cungnungbik Pathian in ka hnenih a langtermi mangbangza le khawruahhar thil pawl hi rak ruat ciar hnik uh.
3“Pathian ih in hmuhmi mangbangza pawl hi ziangtlukinso a maksak!
Khawruahhar a tuahmi hi ziangtlukinso huham a neih!
Pathian cu kumkhua in siangpahrang a si ding, sanikhuk in a uk ding.
4“Ka inn ah nunnuamzet le neinungzet in ka rak um ṭheu. 5Asinain voikhat cu ka ih laiah ṭihnungza mang ka man ih tuksumza thil ka hmu. 6Cuih ka mangih tican i simfiangtu dingah Babilon peng sungih siangpahrang thuronmi pawl kokhawm dingah thu ka pek. 7Kutṭial zohthiam pawl, pol pawl, mitkher thiam pawl le arsi zohthiam pawl an ra ih ka mang cu ka sim naón a sullam zohman in in simfiang thei lo. 8Cule Daniel a ra. (Daniel cu ka khawzing hmin suangin Belteshazzar ti tla in kawh a si.) A sungah khawzing thianghlim pawl ih thlarau a um ih a hnenah ka mang cu ka sim. A hnenah: 9Belteshazzar, kutṭial zohthiam pawl hotu, na sungah khawzing thianghlim pawl ih thlarau a um ih thil mangbangza le thil thuuk na thei thei, ti ka thei. Ka mang cu hihi a si; a tican i sim aw!
10“Ka ih laiah langnak ka hmu ih leilung pumpi laifangah thingkung tumpi pakhat ka hmu. 11Cuih thingkung cu a ṭhang deuhdeuh a sang deuhdeuh ih a ziik in van a dai ih leitlun mi hmuahhmuah in an hmu thei a si. 12A hnah pawl cu an mawi ngaingai, a rah a tam ngaingai ih leilung pumpi ei khopin a tam. Ramsa pawl a hneem ah an bok, vate pawl in a hnge ah bu an sak ih a nungmi tinkim in a rah cu an ei.
13“Cuih langnak ih thu ka ngaihtuah rero laiah van ihsin felzet le ralring zetih khua a tangmi vancungmi pakhat a rung ṭum. 14Aw ringzet in thu a run phuang ih, ‘Zanthing hi hau uhla a hnge pawl tan ṭheh uh. A hnah pawl hleuh thluh uhla a rah pawl ṭhekdarh ṭheh uh. A hnen ihsin ramsa pawl le a hnge ihsin vate pawl dawihlo ṭheh uh. 15Sikhalsehla a sumhmui le a hram cu thir le dar cikcin thawn khit uhla leilung ah taan uh. Cutawkah hrampi lakah cun taanta uh.
“‘Atu ihsin himi pa ih parah dai tla-aw sehla ramsa le thingkung le hrampi lakah umseh. 16Kum sarih sung milai thinlung keng lo in ramsa thinlung sawn a keng ding. 17Himi cu a fel ih a ralringzet vancungmi ih thurelcat mi a si. Cuti a si ruangah leilungtlun khuazakip mi in thei hai seh: Cungnungbik Pathian in minung ih ram uknak tlunah thu a nei ih cuih ram uknak cu a duhmi hnenah a pek, leitlun mi nauta bik hnen khalah a pek thei a si, a ti.
18“Himi hi ka mang cu a si. Atu-ah Belteshazzar, ka mangih tican i sim aw. Ka thuronmi pawl pakhat hman in a tican in sim thei lo; a sinan nang cun na sim thei ding, ziangahtile khawzing thianghlim pawl ih thlarau na sungah a um a si,” tiah a ti.
19Cumi a theih tikah Belteshazzar ti khalih kawhmi Daniel cu a thin a phang ih zianghman a ṭong thei lo. Cutikah siangpahrang in a hnenah, “Belteshazzar, ka mang le a tican in lo phangter hlah seh,” tiah a ti.
Belteshazzar cun, “Siangpahrang bawipa, na mang le a tican hi na hrangah si loin na ral pawl ih hrangah sisehla ka va duh so! 20Thingkung a sangzet ih a ziik in van a daimi cu leilungtlun mi hmuahhmuah in an hmu thei. 21A hnah pawl cu an mawizet ih a rah cu leilung pumpuluk ih eikhop dingin a tam. A hnuai ah ramsa pawl an bok ih a hnge ah vate pawl in bu an sak.
Daniel In Mang A Simfiang
22“Maw siangpahrang bawipa, a sangzetmi le a hngetzetmi thingkung cu nangmah hi na si. Na nasazet ih van na dai; na cahnak huham cu leilung pumpuluk ah a thleng. 23Siangpahrang bawipa, nangmah in na zoh laiah van ihsin vancungmi a rung ṭum ih, ‘Thingkung hi hau uhla cekkuai ṭheh uh; a sinan a sumhmui cu leilung ah taanta uh. Thir le dar cikcin in khit uhla hramlakih hrampi lakah cun taanta uh. Hi pa parah dai tla-aw sehla cutawkah ramsa thawn kum sarih sung um hai seh,’ a ti.
24“Maw siangpahrang bawipa, na mangih tican cu hiti in a si ih Cungnungbik Pathian in na parih a rathleng dingmi cu a phuang zo. 25Minung umnak khua le ram ihsin dawihlo na si ding ih ramsa lakah na um ding. Kum sarih sung cawcang bangin hrampi na ei ding; hramlakah na it ding ih dai in a lo tlak ding. Cule minung ram uknak tlunah Cungnungbik Pathian in thu a nei timi le cuih ram uknak cu a duhmi hnenah a pek timi hi na thei ngah ding. 26Sumhmui cu leilung ih taanta dingah vancungmi in thu a pek. A tican cu Pathian in leilung pumpi a uk a si, ti na theih ngah tikah siangpahrang na cangsal ding, tinak a si. 27Curuangah siangpahrang bawipa, thu ka lo simmi hi ngai aw. Sualnak tuah nawn hlah, a dikmi tuah awla mifarah pawl zaangfah aw. Cuticun na ṭhangso vivo ding,” a ti.
28A tivek cun siangpahrang Nebuchadnezzar parah a kim ṭheh. 29Thla hleihnih hnuah, Babilon khua a siangpahrang inn parih a toihvah rero laiah, 30“Zohhnik uh, Babilon a maksakzia hi! Ka khawpi ah ka tuah ih ka huham le ka cahnak, ka sunlawinak le ka maksaknak langter dingah ka din a si,” tiah a ti.
31A ṭongmi hman a ṭong thluh man hlanah van ihsin aw in, “Siangpahrang Nebuchadnezzar, ka simmi hi ngai aw! Na siangpahrang huham cu na hnenih sin lakhlo a si zo. 32Minung umnak khua le ram ihsin dawihlo na si ding; hramlak ramsa lakah na um ding ih kum sarih sung cawcang bangin hrampi na ei ding. Cule Cungnungbik Pathian in minung ram uknak tlunah thu a nei ih cuih ram uknak cu amah ih duhmi hnenah a pe thei, tihi na thei ngah ding a si,” tiah a ti.
33A tivek cun a kim ngaingai. Nebuchadnezzar cu minung umnak khua le ram ihsin dawihlo a si ih cawcang vekin hrampi a ei ngaingai. A taksa parah dai a tla; a sam cu muvanlai thlahmul tlukin a sau ih a tin cu vate tin vekin a hriam.
Nebuchadnezzar In Pathian A Thangṭhat
34“Kum sarih a kim tikah van khi ka hun zoh ih ka thinlung a kim sal. Cungnungbik Pathian cu ka thangṭhat ih kumkhua ih a nungmi hnenah cun upatnak le sunlawinak ka pek a si,” tiah siangpahrang cun a ti.
“Kumkhua in a uk ding,
A uknak cu kumkhua in
a hmun ding.
35Leitlun minung pawl cu
zianghmanlo ah a zoh hai.
Van ih vancungmi le leitlun ih
minung pawl cu,
Amah in a uk thluh a si.
Zohman in a duhnak an el thei lo;
A thiltuahmi khal thu an sut
thei lo.
36“Ka thinlung a kim sal tikah cun ka hminthannak, ka maksaknak, ka sunlawinak le ka ram uknak pawl cu ka hnenah pek ṭheh an si sal. Ka kuthnuai ih bawi a rak si mi le ka minung phun-u pawl khal in in rak cohlangsal ih ka siangpahrang thuneihnak tla cu a hlan hnakih nasa sawn in ka hnenah pek a si sal.
37“Atu-ah cun keimah Nebuchadnezzar in vancung siangpahrang ka cawimawi, ka upat ih ka sunloih fawn a si. A tuahmi hmuahhmuah cu a ding le a dikmi an si ih puarthau zetih thil a tuahtu cu a ṭhum a si,” tiah siangpahrang in a ti.
Markert nå:
DANIEL 4: FCL
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Falam Bible Revision © Bible Society of Myanmar, 2002.