Lucas 1
1
Diidza bzooje Lucas kie' Teófilo
1Ziaane chi gulazu'gulabë'e luzooje ka'teez guk le Dios chi beene len ro'u, 2ka'teez gulagixhji'ide ro'u bënni gulale'ide ka guk kati gzulau, len guluzua'ke lu naa'ke lagixhjë'ke diidza ni. 3Lekz'ka' neda chi bubë'buguiilja gaazludzë' ka gzulau len ben bayuudx bukua'a ba'a na'ar gzooja kiu' Teófilo le naku bënni blou, 4na'ar gnëëz'du dxia'a yëla li le chi guluseed'de li'.
Gbaaz La'ay kie' Dios rgixhjë'e ki gaalje Juan
5Dza kati gnabe'e Herodes lu yëdz kieke bënni judío, gzue' tue' pxuuz gxhi' le' Zacarías, le' nake tza'xhën len pxuuz bënni za'ke dia'dza kie' Abías, nguul kie' le'nu Elisabet, za'nu dia'dza kie' Aarón. 6Groopteke glake bënni dxia'a lau'e Dios len guluzenaag'ke ka'teez rna xhba kie' Xanru, ti benn nu bi gna kieke. 7San ti nakua'bi bi kieke koma Elisabet guknu nguul wëëdx len groopteke chi nak'ke bënni guul.
8Tu dza bënni nak'ke tza'xhën len pxuuz Zacarías, gla'la'ake lakua'ke lau'e Dios, 9len ka chi gulaleeb'de tuune pxuuz ni, gula laaze Zacarías tzaazie latj la'ay ki gdou' kie' Xanru na'ar gzegie yaal. 10Tzal ryeegi yaal ni, gdu yëdz nakua'ke rayu'u tui'leene diidza Dios. 11Len ni' blui'lau'e gbaaz La'ay kie' Xanru ga zue' Zacarías, latj yubeel ki pku'gu ki yaal. 12Kati ble'ide gbaaz La'ay ni, Zacarías bubaan'de len guudxi'tzki'de, 13ati Gbaaz La'ay ni gne':
—Zacarías, ti gaadx'du, koma Dios chi byëën'de le rnaab'du'ne ati nguul kiu' Elisabet gunn'nu'bi kiu' tuubi bi'dau', bi gzu laabi Juan. 14Gdze'iz li' yëla ruzakalaadxi'i, len zian'ke ludziij'de le gaalj'bi, 15koma bi kiu' ni wak'bi xhën lau'e Xanru, ti gia'aj'bi nup uva lekz'ka' ti gia'aj'bi le rzuudxi bunach len kati zia'a gaalj'bi udze'iz leebi le Bë' La'ay kie' Dios. 16Guune ga bunach zian ki yëdz Israel lubi'ilaadxi'ike len Xanke Dios. 17Le' Juan ni tziije lau'e Xanru su'këëze ka glëëze Elías len gape yëla wak ka gdape Elias, bënni be'e diidza ulaz kie' Dios, naar ludzaag'ke dxia'a xuuzke len bi kieke, ati nu ku tabëëz dxia'a luseed luzenaag. Ki' guune upe'e yëdz na'ar lazi'ke Xanru.
18—Zacarías bnaab'de gbaaz La'ay ni:
—¿Nakxh guuna gnëëzda ki wak'z le ni? Koma neda len nguul kia' chi nak'tu bënni guul.
19Gbaaz La'ay ni bubi'e diidza:
—Neda naka Gabriel, len ruuna xchiine Dios; le' psë'le'e neda gui'leena li' diidza len kixhji'ida li' diidza dxia'a ni. 20San na'a, le ti gyajle'u le chi guudxa li', tir gak gui'u diidza nakati gdxinr dza gak yugute' le ni.
21Tzal rue'e diidza gbaaz La'ay len Zacarías, bunach nakua'ke rayu'u tabëëze le' len tunaabi lza'ake bixhkia' rdzei'tzki'de urooje lu latj la'ay. 22Kati brooje, ti rak gui'e diidza; na gulak'be'ide ki lu latj la'ay blui'ide le' Dios le rala gak, run'z ni'a' ne'e rui'leene leke diidza, ki' gzue' ti guk gui'e diidza.
23Kati buudx beene dxin lu gdou', Zacarías zuwëëje liidxe. 24Na buudx'a, nguul kie' Elisabet gzeenu zi'i, gdu gayu beu' ti brooj'nu liidx'nu, len gnaanu: 25«Na'a, Xanru beene ki' kia' naar bunach tir labiaj'je'ide neda.»
Tue' Gbaaz La'ay rgixhjë'e gaalj'bi bi Jesús
26Kati guk xop beu' seenu zi'i Elisabet, Dios psë'le'e Gbaaz La'ay Gabriel tu yëdz ki Galilea nazi' lei' Nazaret, 27ga zuaabi tuubi bi nguul raban'dou#1:27 Raban'dou Diidza ni re'e'ni gna: ki bi nguul ni' ti zui'leemi'ne bënni. Ti numbe'ibine bënni. leebi María, chi nazi' lu naa'bi sua'leemi'ne tue' bënni le' Jose, xi'in'xhzue' David bënni gnabe'e. 28Gbaaz la'ay gyaazie ga zuaabi bi María len re'bi:
—¡Padiuxh, Dios nudze'iz'de li' yëla rak'len kie'! Len Xanru zue' len li'.
29Bi María bubaani'bi ki diidza ni, len rnaabi'bi kuimi bixh re'e'ni gna' diidza ni. 30Le' Gbaaz la'ay re'bi:
—María, ti gaadx'du, chi bde'li'i li' yëla rak'len kie' Dios. 31Na'a uze'u zi'i len suabi kiu' tuubi bi'dau' len gzu laabi Jesús. 32Gake tue' bënni xhën len le'e le' Xi'ine Dios Xhën'te, len Xanru Dios guune ga gnabe'e ka beene kie' xuuz xhtau'bi guul David, 33na'ar gnabe'e tzalzu yëdz kie' Jacob. Yëla rnabe' kie' ti tzu'u lu'udx ki.
34María bnaabi'bi'ne gbaaz La'ay'a:
—¿Nakxh'kz gak le ni xhki neda ti zua'leena'ne bënni?
35Le' Gbaaz La'ay bubi'e diidza:
—Bë' La'ay kie' Dios dusue' len li', len yëla wak kie' Dios Xhën'te duxua li'. Lena'a, bi'dau'a gaalj'bi si' laabi Xi'ine Dios len gak'bi La'ay. 36Lekz'ka' nguul xhiil'u Elisabet uzuabi kieenu tuubi bi'dau', zala chi ziiji'nu iz, nguul'a tanáke ti rak lakua'bi bi kieenu, na'a chi ziaj xop beu' seenu zi'i. 37Gat'ga de le ku saki'ide Dios guune.
38Ati María gnaanu:
—Neda naka nguul wendxin kie' Xanru, Dios gunne len neda ka chi gnou'.
Chi nak ka, gbaaz la'ay ni zuwëëje.
María rayuunu Elisabet
39Larakz dza niiz ziubz'nu María gyaj'nu tu yëdz ki gia'a ki Judea, 40gyaaz'nu liidxe Zacarías len gnaanu: ¡Padiuxh Elisabet! 41Kati Elisabet byëëni'nu María, bi we'en'du yu'ubi le'enu pxiti'ibi yëla rudziiji len bdze'iz leenu le' Bë' La'ay kie' Dios. 42Len zidzj gnaanu:
—¡Dios benla'ay're' li' ka yugute'nu nguul len benla'aye'bi bi kiu'! 43¿Nuxh naka neda, giid'nu kia' xhne'e Xaana? 44Kati byëën'da gneu', bi kia' yu'ubi le'a pxiti'ibi tzka budziiji'bi, 45¡Bixhgabou' li' gyajle'u ki ulak yugute' le gudxe li' Xanru.
46María gnaanu:
«Laadxa'a rgu'u ba yëla xhën kie' Xanru;
47ruzakalaadxa'a len Dios, nu ruslá neda.
48Dios byue' neda, nguul wendxin nëxhj'laadxi'i kie'
len na'a lazulau'ke lanáke kia', bixhgaba'nu nguul ni;
49koma xhën'te nak le chi beene kia', Bënni Nape Gdu Yëla Wak,
¡La'ay nake Le'!
50Dios ruwechilaadxi'itekze
nu riijilaadxi'i Le'.
51Yëla wak xhën chi beene:
pkin'je le zjake tuune bënni tanëëzi kuin'ke xhën,
52gdue' yëla rnabe' kieke bënni tunabe'ke,
len bzue' ga xhën bënni nëxhj'laadxi'i.
53Bënni yechi beene ga ga'ta bi ga'ta kieke
ati bënni de'tzka xhdumi'ke, busa'ze ka leke.
54Guk'leene yëdz Israel, bënni wendxin kie',
len ti gul'laadxe'e wechilaadxe'e leke.
55Ka' pxënelaadxi'ike bënni guul kieeru zia'at,
le' Abraham len xi'in'xhzue'.»
56María bga'an'nu len Elisabet ka tson beu', na buudx'a zuwaj'nu liidx'nu.
Guulje Juan bënni rkiile nis bunach
57Kati bdxin dza gdza'nu Elisabet, gzua'bi kieenu tuubi bi bënni'du. 58Bënni nakua'gake ga'la'az ga zuaanu len lekz'ka' bënni bë'chi' lza'anu yajyu'ke'nu len guludziij'de len leenu kati gulanëëzde ki Xanru buechilaadxe'enu. 59Kati guk xuunu dza, guluche'ke'bi bi'dau' ni ki luchuuge xhpeela'bi ka naleeb'kde tuune bënni judío len gle'en'de luzua'ke laabi Zacarías, ka le' xuuzbi. 60San xhna'bi gnaanu:
—Ti gak. Juan rala si' laabi.
61Na' gulubi'e diidza gulanake:
—Nutunu zua kieeli le' Juan.
62Na' tun'z ni'a' naa'ke gulunaab'de xuuzbi bi'dau' ni, nakxh re'en'de gzue' laabi. 63Xuuzbi bnaabe tu blaag ki gzooje, na bzooje: “Juan leebi.” Len yugute'ke gulubaan'de. 64Na'teez Zacarías bui'e diidza, len gzulau'e rgu'e ba Dios. 65Yugute'ke bënni nakua'gake ga'la'az gulubaan'de, len gdu'te gia'a yeego ki yëdz Judea gulagixhjë'e le guk. 66Yugute'ke bënni'a tayëën'de, tunaabi lza'ake: «¿Nuxh gak'bi bi'dau' ni?» Koma le nak'te, Dios rlui'e yëla wak kie' len leebi.
Zacarías rgu'e ba Dios
67Zacarías, xuuzbi bi'dau' ni, le' Bë' La'ay kie' Dios nudze'iz'de le' len be'e diidza ulaz kie' Dios, gne':
68«¡La'ay nake Xanru, Dios ki yëdz Israel,
koma bdxiine usle' yëdz kie'!
69Psë'le'e kieeru bënni nape yëla wak usle' ro'u,
tue' xi'in'xhzue' David, bënni wendxin kie'.
70Le ni nak le pxënelaadxi'iru zia'at
ka'teez gulanake bënni glui'ke diidza ulaz kie' Dios:
71Ki Le' usle' ro'u lu naa'ke bënni'a ti tadzaage ro'u dxia'a
len ki dera'ke bënni talei'de ro'u.
72Len wechilaadxe'e xuuz xhtau'ru guul
len ti gal'laadxe'e diidza pxënelaadxi'ike.
73Diidza ni nak le pxënelaadxe'e guune
kie' xuuzru Abraham:
gunne kieeru lsenz
74ti suaru len yëla raadxi,
usle' ro'u lu naa'ke bënni'a ti tadzaage ro'u dxia'a,
naar gun'ru xchiine
75len yëla rbëëz dxia'a len yëla li,
len suaru lau'e gdu yëla naban kieeru.
76Ati li', xi'ina'du,
bunach le'ke li', bënni rue'e diidza ulaz kie' Dios Xhën'te,
koma li', nëëru lau'e Xanru
ki gpo'u xhnëëze.
77Len guunu ga gnëëzi yëdz kie'
ki Dios rnit'lau'e xhtu'la'ake
len rusle' leke.
78Koma Dios lu yëla ruwechilaadxi'i xhën kie'
rsë'le'e kieeru gbiidz ki ye tu dza kub,
79naar gnëëdzj lni' kieke bënni nakua'gake
ga nak'tzka chul,
len kche'e ro'u
lu nëëz ki yëla rë'dxi.»
80Bi'dau' ni gxhë'mi len rak'bi tzutzu len Dios, gzua'bi lu latj yu biidx, kati bdxin'r dza blui' lau'bi lau'gake bunach yëdz Israel.
Markert nå:
Lucas 1: PZD
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Sociedad Biblica de México AC