मत्ती 19

तलाकोन बारामा शिक्षा

(मरकुस 10:1-12)

1जेतार येसु जे वाते कोय देदू, ती गलील जिल्लामा गोथू जात रोयू; एने यरदन नोंदीन पोरले धोळे यहुदान प्रदेशमा आव्यु. 2तेत्यार मोटीत गोरदी तेरे पोछोव चाल पोडी, एने चू चा तीनु काजे वारू कोऱ्यु. 3तेत्यार फरुशी तेरी परीक्षा कोरणे कोरीन कोतरा साते आवीन कोये बाज गोया, “काय हर एक वोजेसी आपनी लाडी काजे पुछनो वारू छे?” 4चू जोवाब आप्यू, “काय तुमु नी भोन्या कि जू तीनुक बोनाव्यू, चू सुरुसी नोर एने नारी कोयू, 5इना वोजेसी माणूस आपना आसी-बासा गोथू ओलोग होयीन आपनी लाडी पुठी रोयसे एने चे दुयु एक डील होयसे, 6आखरी चे हिमी दुय नी, बाकीन एक डील छे इनान कोरता जीनुक परमेश्वर जुळलु छे, तीनु काजे माणसे ओलोग नी कोरनो.” 7फरुशी तीना काजे कोया, “ती मुसा यो काहा ठेरावलु कि छुळनेन चिट्ठी आपीन तिनीक आपीन छुळ देणे?” 8चू तीना काजे कोयू, “मुसा तुमरा मोनोन कानलान वोजेसी तुमुक आपनी लाडी काजे छुळनेन आग्या आप्यू, बाकीन सुरुमा गोथो ओसो नी होतो.” 9एने मे तुमु काजे कोयो, कि जू कुदु व्यभिचार काजे छुळीन एने ओवी काहना वोजेसी आपनी लाडी काजे छुळीन दिसरी पुठी वियाव कोरे, चू व्यभिचार कोरतेलू; एने जू तिनी छुळली लाडी पुठी वियाव कोरे, चू बी व्यभिचार कोरतेलू.

10चेला येसु काजे कोया, “ओगर ओदमी बायरी पुठी ओसला भुंडला वाते कोरे, ती वियाव कोरनो वारू नी होय” 11येसु तीनु काजे कोयू, “आखा यो वचन स्वीकार नि कोरतेला, नि ते चे तीनु काजे दान आपलो छे.” 12काहाकि कुदु नपुसक ओसा छे, जे आशोन खुवामा गोथा ओसात जोनायला छे; एने काहनास ओसा छे, तीनु काजे माणसे नपुसक बोनाया; एने काहनास नपुसक ओसा छे, जे सोरगोन राजोन कोरता खुदो काजे नपुसक बोनावला छे जू इना काजे स्वीकार कोर सोकतला, चू ग्रहण कोरे.

पुऱ्या काजे आशिष

(मरकुस 10:13-16; लुका 18:15-17)

13तेत्यार माणसे पुऱ्या काजे तेरेनचा लीन आव्या कि चू तीनु पोर हात मेके एने प्रार्थना कोरे, बाकीन चेला तीनु काजे लोळ्या. 14येसु कोयू, “पुऱ्या काजे मारेंचा आवने देवू, एने तीनु काजे मोना मा कोरु, काहाकि सोरगोन राज ओसला जून छे”. 15एने चू तीनु पोर हात मेकीन चा गोथू जात रोयू.

मालदार पुऱ्यु एने ओमोरकाईन जीवन

(मरकुस 10:17-31; लुका 18:18-30)

16एक जुवान माणूस येसुनचा आव्यु एने तीना काजे, पुछु “हे गुरु, मे काहनो वारलो काम कोरो कि ओमोर जीवन जोळसे?” 17येसु तीना काजे कोयू, “तू मेसेक भोलायीन बारामा काहा पुछतलु? वारलो ते एकुत छे, बाकीन ओगर तू जीवनमा जाणेन कोरतू होय ती आग्या काजे मान्य कोर.” 18जुवान माणूस तीना काजे कोयू, “कानली आग्या? येसु कोयू, जो कि खुन नी कोरनो, व्यभिचार नी कोरनो चुरी नी कोरनो, झुटी गोवा नी आपनो, 19आपना बास एने आपनी आशोन मान कोरनो, एने आपना साते वावा साते आपनेन तोसो मोंग कोरजी.” 20चू जुवान माणूस तीना काजे कोयू, “इनी आखा काजे मे ते मानतलु, हिमी मारेमा काहणी वातोन कोमी घोटी छे?” 21येसु तीना काजे कोयू, ओगर तू तीयार होय ती जा आपनु माल वेचीन गोरीबो काजे आप दे, एने तुसेक सोरगोमा धोन जोळसे; एने आवीन मारे पोछोव चाल. 22बाकीन चू जुवान माणूस जी वात सोमवीन नाराज होयीन जात रोयू, काहाकि चू घोनु मालदार होतु.

23तेत्यार येसु आपना चेला कोयू, “मे तुमु काजे छाचलीन कोयू कि मालदारोन सोरगोन राजमा जानो काठलो छे. 24तुमु काजे एने कोयो कि परमेश्वरोन राजमा मालदार जाणो उटळान सुयीन नाकोमा गोथो निकवीन जाणो सोपो छे.” 25यो सोमवीन चेला घोणा वाहरायीन कोया, “ती ओवतेन कुनीन छुटकारू होय सोकतलू?” 26येसु तिंदरे भूनीन भावीन कोयू, “माणसोसी ते यो नी होय सोकतलु, बाकीन परमेश्वर सी आखो काहना होय सोकतलु.” 27इनापोरसी पतरस तीना काजे कोयू, “देख आमु ते आखो काहीन छुळीन तारे पोछोव आवला छे; ती आमुक काय जोळसे?” 28येसु तीनु काजे कोयू, “मे तुमु काजे छाचलीन कोयो कि नोवली जोगोमा जेतार माणसोन पुऱ्यु आपनी महिमान सिहासन पोर बोठसे, ती तुमु मारे पोछोव आवला छे, बारा सिहासन पोर बोसीन इस्राईलोन बारा पिढीन नियाव कोरसू. 29एने कुदू घोर, एने भाशो एने, बहोनिश एने, बास एने, पुऱ्या-पारीक एने, खेतोक मारो नावोन कोरता छुळ देदला छे, तीनुक सोव गुणा जोळसे, एने चू ओमोरकाई जीवनोन अधिकारी होयसे. 30बाकीन घोणा सोवटा छे जे पेहेला छे, चे पोछला होयसे एने जे पोछ्ला छे, चे पेहला होयसे.”

Markert nå:

मत्ती 19: BFBNT

Marker

Del

Sammenlign

Kopier