मत्ती 16

फरुशीन लारे येसुन पारख

(मरकुस 8:11-13; लुका 12:54-56)

1फरुशी एने सदुकी तेरेनचा आव्या एने तीनाक पारखनेन कोरता तीनाक कोया, “आमुक सोरगोन निशाणी देखाळ.” 2येसु तीनु काजे जोवाब आप्यू, “सांतले टेमे तुमु कोयतेला, मोसोम वारलु रोयसे, काहाकि वादवो रातलो छे.” 3एने सोंदारे कोयतेला, “आज आंजी आवसे, काहाकि वादवो रातलो एने भोकळ छे; तुमु वादवा काजे देखीन तेरु भेद कोय सोकतला बाकीन टेमोन चिन्हान भेद काहा नी कोय सोकतला?” 4“इनी कोवीन भुंडला एने व्यभिचारी माणसे चिन्ह हेरतेला, बाकीन योनान चिन्ह छुळीन तीनुक काहनो ओवी कुदाक चिन्ह नी आपाये” एने येसु तीनु काजे छुळीन जात रोयू.

फरुशी एने सदिकीन शिक्षान खमीर

(मरकुस 8:14-21)

5येसुन चेला गलीली दोरीयान पोरले धोळे पुग गोया, बाकीन चे खाणो लेणे विसरी गोया. 6येसु तीनु काजे कोयू, “देखू, फरुशी एने सदुकीन खोमीरसी हुशारीमा रोयजू.” 7चे आपसामा विचार कोरणे बाज गोया, “आमु खाणो नी लाव्या इनान कोरता चू ओसू कोयतेला.” 8यो जानीन, येसु तीना काजे जवाब आप्यू, “हे कोम भुरस्या, तुमु आपसमा काय विचार कोरणे बाज रोया कि आमरे जुव रुटा नि होय?” 9काय तुमु आज तोक नी सोमज्या? काय तुमुक तीना पाच होजारोन खाणान फोम नी होय, एने नि यो कि तुमु कोतरा टूपल्या चूटला छे? 10एने तीना चार होजारोन सात रुटा, एने यो नि कि तुमु कोतरा टूपला चूटला होता? 11“तुमु काहा नी सोमेजता कि मे तुमु काजे रुटान बारामा नि कोयु, बाकीन यो कि तुमु फरुशी एने सदुकीन खमीरसी हुशारीमा रोयजू.” 12तेत्यार तिंदरी सोमोजमा आव्यो कि चू रुटान खमीरसी नी, बाकीन फरुशी एने सदुकीन शीकवन सी हुशारीमा रोयने कोयलु होतु.

पतरसोन येसु काजे मसिहा मान लेनो

(मरकुस 8:27-30; लुका 9:18-21)

13हिमी येसु केसरिया फिलीपी प्रदेशमा आव्यु, एने तेरा चेला काजे पुछने बाज गोयू “माणसे माणसोन पुऱ्या काजे काय कोयतेला?” 14चेला जवाब आप्या, “कुदु योहान बाप्तिस्मा आपनेवावू कोयतेला, एने कुदु एलिया भविष्य कोरता, एने कुदु यीर्मया नी ते भविष्य कोरता मायीन कुदु एक कोयतेला.” 15येसु तीनु काजे कोयू, “बाकीन तुमु मेसेक काय कोयतेला?” 16शिमोन पतरस जोवाब आप्यू, “तू जीवतला परमेश्वरोन पुऱ्यु मसिह छे.” 17येसु तीनु काजे जोवाब आप्यू, “हे शिमोन, योनान पुऱ्यु, तू सोयावू छे; काहाकि मास एने लुयसी नी बाकीन मारू बास जू सोरगोमा छे, जी वात मार पोर देखाळलु छे.” 18एने मे बी तुसेक कोयो कि तू पतरस छे, एने इना दोगळा पोर आपनी मंडवी बांधीस, एने अधोलोकोन झोपला तेरे पोर हावी नि होये. 19मे तुसेक सोरगोन राजोन कुच्या आपीस एने जो काहीन तू धोरती पोर बांधिस, चो सोरगोमा बांधाय जासे एने जो काहीन तू धोरती पोर उगाळीस, चो सोरगोमा उगळी जासे. 20तेत्यार चू चेला काजे जोताळ्यु कि कुदा काजे झुन कोयता कि मे मसिह छे.

येसुन मोरनेन भविष्यवाणी

(मरकुस 8:31; लुका 9:22-27)

21तिनी टेमे येसु आपना चेला काजे कोयने बाज गोयू, “जरूरी छे कि मे यरुशलेममा जाईस, एने डाय-डायान एने डायलु पुजारान, एने शास्त्रीन हाते लोकेत दुख सोहोन कोरे; एने माराय जाश; एने तिसरे दाहळे जीव उठीस.” 22इनापोरसी पतरस येसुक ओलोग लावीन कोयने बाज गोयू, “हे प्रभू, परमेश्वर नि कोरे! तारे साते ओसो कोबी नी होयनो जुवे.” 23येसु पोछु फिरीन पतरस काजे कोयू, “हे भुतडा, मार सामने गोथू नांबे होय जा, तू मारेन कोरता ठूकरोन वोजा छे काहाकि तू परमेश्वरोन वातो पोर नी, बाकीन माणसोन वातो पोर मोन लागाळतलु.”

येसुन पोछोव चालनेन मतलब

24तेत्यार येसु तेरा चेला काजे कोयू, “ओगर कुदाक मार पोछोव आवने लागे, ती खुदो काजे नाकार कोरे एने मारू ख्रुस हाकले, एने मारे पोछोव चाले. 25काहाकि जू कुदू आपनु जीव वाचाडनेन कोरसे, चू तीनाक खुवसे; एने जू कुदु मारेन कोरीन खुवसे, चू तीनाक वाचाडसे. 26ओगर माणूस आखा जोगो काजे जीत लेये, एने आपनो जीवनोन नुकसान कोरे, ती तीनाक काय फायदु होयसे? नीती माणूस तेरा जीवनोन बोदले काय आपसे?” 27माणसोन पुऱ्यु आपना सोरग दूत पुठी आपना बासोन महिमा आवसे, एने तिनी टेमे चू होर एक काजे तिंदरा कामोन अनसारे प्रतीफोव आपसे. 28मे तुमु काजे छाचलीन कोयो कि जे न्या उबरोय रोया, इंदरे माहीन कुदु ओसा छे कि चे जेतार तोक माणसोन पुऱ्याक तेरा राजमा आवतेलु नी देखे, तेत्यार तोक मोतोन सोवाद कोबी नि चाखे.

Markert nå:

मत्ती 16: BFBNT

Marker

Del

Sammenlign

Kopier