रोमी 7
7
पा़हमागी पे
1आदा नो़ह दाङ आज्यी-नुहमुया़, ङाह दि ताम छ्य़े-ठिम स्य़ेगेया़ला माएँराङ येहबा। मिह थार्ती तेहकें ती़हजी थु च्यी़राङ मिहला छ्य़े-ठिमगी ताहम्ग्यो ओहङगे। च्यि दि ताम ख्याया़ला क्यी़ह म़ेहबा ले? 2पे यिहॱना़: छ्य़े-ठिमला तासीमाना पा़हमा पेहक्यो पी़हमी राहङगी ख्योवा मा़हस्यी थुनी मोह राहङगी ख्योवा ङ्याम्बु पा़हमाकी ठिमगी ताहम्ग्यो ओहङगे, यिहॱनाङ ख्योवा स्यिसीनमाना मोह ओ़ह पा़हमाकी ठिमलेगी टोहल्ग्यो ओहङगे 3का़हलेॱआङ मोह राहङगी ख्योवा येहकेमुराङ लेहमेन क्येप-ख्योवा साला काहल्दी तेहसीन माना मोहगी छ्येउ-छ्येंमु पेहक्यो ओहङगे। यिहॱनाङ मोहती ख्योवा स्यिसीनमाना मोह ओ़ह पा़हमाकी ठिमलेगी टोहल्गे, ओहले मोह लेहमेन ङ्याम्बु पा़हमा पेह ख़ूएँ ओ़हदी मोहगी छ्येउ-छ्येंमु पेहक्यो मिहम्बा। 4दि ल़ेहमु पेहती आदा नो़ह दाङ आज्यी-नुहमुया़, ख्याया़ॱआङ मास्यीकाकी कुसो ङ्याम्बुराङ छ्य़े-ठिमला स्यि सिहन्दी येह ओ़ह सोङबे टोहङग्योलेगी सोम्बो ज़्याङ नाङगे मास्यीका ङ्याम्बु ख्याया़ च्यी़राङ काहल्दी येह। ता़ह ओहराङगी किन्ज्योगी तेहन्दाला या़हबु ल़ेहया़ पेहती तेन्दोया़ या़ह च्य़ू ख़ूएँ। 5ती़हजी च्यी़ला ओहराङ तिहक्पाकी पेहताङया़ खुर्ते राहङगी मिहजी ताङगो येहकें। च्यिबेमाना तिहक्पाकी सेम्बाया़ थाम्ज्यी छ्य़े-ठिम लाहमलेॱराङ ओहङदी ओहराङ ज़ुबुकी ओङबुया़ला ल़ेह पेहकेनॱराङ येहकें, ओहले दिगी स्यिवा ख्योङगे। 6ओहराङ मास्यीका ङ्याम्बुराङ स्यिक्यो सोङबे ता़ह ओहराङ छ्य़े-ठिम यिहन्ज्यु टोहल्सीहन्सीन। ता़हनी ओहराङ छ्य़े-ठिमगी ओङ चो़ला म़ेह। छ्य़े-ठिमगी माक्यो ल़ेहमु निङबा छ्याप्स्यीगी मिहम्बा ता़ह ओहराङ किन्ज्योकी थु लाहमले साम्बा छ्याप्स्यी पेहती स्याहप्तो स्युह कोहएँ।
छ्य़े-ठिम दाङ तिहक्पा
7ओ़हठी यिहन्सीमाना ता़ह ओहराङगी च्यि माज्ये? च्यि छ्य़े-ठिम तिहक्पा यिहम्बा? का़हला यिहन्ज्ये, मिहम्बा। का़हलेॱआङ छ्य़े-ठिम म़ेहबा यिहनानी ङाहगी तिहक्पा च्यि यिहम्बा म़ेदी ह्अॱराङ कोहच्ये म़ेहबा येहकें, च्यिबेमाना “ख्येगी ह्अम्बा माहबे” म़ेदी छ्य़े-ठिमगी मा़हमेबा यिहनानी ह्अम्बा पेहक्योदी तिहक्पा यिहम्बा माएँ ताम ङाहला क्यी़हराङ ज्योर्च्ये म़ेहबा येहकें।#प्रस २०:१७; व्य ५:२१ 8छ्य़े-ठिमगी का तेरक्यो सोङबे तिहक्पागी लोहङ ज्योर्ती ङाहती सेमला ह्अम्बा क्ये च्य़ूसीन च्यिबेमाना छ्य़े-ठिम म़ेहबा यिहनानी तिहक्पागी ओहराङगी मिहजीला ओङॱराङ छ्य़ेज्ये म़ेहबा येहकें। 9ती़हजी च्यी़ला ङाहगी छ्य़े-ठिम माहन्ज्योर्पा येहकें ओहजेला ङाह सोम्बोराङ येहकें, यिहॱनाङ का़ ज्योर फान्ज्यो ओ़ह ङ्याम्बु-ङ्याम्बुराङ तिहक्पाॱआङ ओहङसीन, ओहले ङाह राहङती स्यिसीन। 10नाहमॱआङ स्यिज्ये म़ेहबागी मिहली ज़ाङबुला क्याल कोहएँ कागीनी ङाहला स्यिवाला गा क्याल्सीन! 11च्यिबेमाना तिहक्पागी का लाहमले लोहङ ज्योर्ती ङाहला चिहन क्याहप्सीन, ओहले दि लाहमलेॱराङ ङाहला स्यि च्य़ूसीन।#उत ३:१३ 12छ्य़े-ठिम नाम्पार-ताहक्पा येह, ओहले काॱआङ नाम्पार-ताहक्पा, टाहङबु दाङ या़हबु येहबा। 13ओ़ह सोङबे देजे या़हबा छ्य़े-ठिमगी ङाहलाराङ च्यिबे स्यिवाला क्याल्बा ले? ओ़हठी मिहम्बा यिहॱनाङ तिहक्पागी गा ङाहला स्यिवाला क्याहल्ग्यो यिहम्बा। या़हस्यो छेन्ज्या चाल ती़दी तिहक्पागी राहङगी तेहन्दामकी छेन्दा तेन्ज्येला ङाहला स्यि च्य़ूसीन। ओ़ह सोङबे का़ लाहमले तिहक्पा तोहरोङ माहङदे काहल्सीन।
ना-ङ्यी़की पेहताङ
14छ्य़े-ठिम यिहक्तेन यिहम्बा म़ेदीनी ओहराङला क्यी़हराङ येह, यिहॱनाङ ङाहती यिहक्तेन मिहम्बा ओहले ङाह तिहक्पाकी योक्पु काहल्दी चोङ सिहन्दी येह। 15ङाहगी च्यि पेहकें, ओ़ह ङाह राहङगीॱआङ ङोह मे़हस्येएँ। ङाहगी सेम्बा पेहक्योकी ल़ेहया़ ङाह लाहमले च्यिॱआङ मेहयोहङगे। ङाहगी सेम्बा माहबेबा दाङ क्युक्टो पेहक्योकी ल़ेहया़ॱराङ ङाह लाहमले ओहङगे। #गला ५:१७ 16दि ल़ेहमु पेहती ङाहगी सेम्बा माहबेबाकी ल़ेहया़ पेहसीनमाना ङाहगी छ्य़े-ठिमला ठाबे यिहन माएँ। 17ओ़हठी यिहन्सीमाना ता़ह दि पेहकेन्दी ङाह मिहन, दिनी ङाह नाहङला येहकेन तिहक्पागी गा पेहक्यो यिहम्बा। 18च्यिबेमाना ङाहती दि तिहक्पाकी पेहताङगी काहङग्योगी ज़ुबुला च्यिॱआङ या़हबु से़हया़ मेहतेहकें म़ेदीनी ङाहला क्यी़ह येह। या़हबु ल़ेहया़ पेहकेन्की सेम्बा ङाह ङ्याम्बु येहतीॱआङ ङाहगी ओ़ह पेह मी़हखुएँ। 19च्यिबेमाना ङाहगी सेमला क्येक्योकी ल़ेह या़हबुया़ ङाहगी मेहबेकें, तोहरोङ फिर्च्या, ल़ेह ङ्येहम्बाया़ॱराङ ङाहगी पेहती ताङगे। 20ता़ह ङाहगी मेहबे माएँ माएँमुराङ ङाहगी ओ़ह ल़ेहराङ पेहकु दु मासीमानानी ओ़ह ल़ेह पेहकेन्दी ङाह मिहन यिहॱनाङ ङाह नाहङला येहकेन्की तिहक्पा यिहन।
21ओ़ह सोङबे ङाहगी ल़ेह या़हबु पेहच्ये छोल्गे छोल्गेमुॱआङ दि छ्य़े-ठिमगी ङाहती मिहजीला ल़ेह पेहक्यो सोङबे ङाहगी ल़ेह ङ्येहम्बाया़ॱराङ पेहती तेहक्यो ङाहगी ज्योर्सीन। 22च्यिबेमाना ङाह राहङगी सेम तिहङ यिहन्ज्युराङ किन्ज्योकी छ्य़े-ठिमला काहसो पेहकें। 23यिहॱनाङ ङाहती ओङबुया़ला, लेहमेन छ्य़े-ठिमगी ङाहती सेमला येहकेन्गी छ्य़े-ठिम ङ्याम्बु टाह पेहकें, ओहले ङाहती ओङबुया़ला तेहकेन्गी तिहक्पाकी छ्य़े-ठिमगी ङाहला योक्पु ज़ोएँ। 24आबी, ङाह काहजे क्येवा क्येमु मिह! दि स्यिएँगी ज़ुबुलेगी ङाहला सुगी खा फ़ेवा? 25येशू मास्यीका ओहराङ चो़वो लाहमलेॱराङ ङाह किन्ज्योला थुज्यी-छ्ये़ फुल्गे। ओ़ह सोङबे ङाह राहङगी सेमगीनी किन्ज्योकी छ्य़े-ठिमला स्याहप्तो स्युहएँ, यिहॱनाङ ङाहती तिहक्पाकी पेहताङ लाहमले ङाहगी तिहक्पाकी छ्य़े-ठिमला स्याहप्तो स्युहएँ।
Markert nå:
रोमी 7: HYLM
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2023 (Active), Wycliffe Bible Translators, Inc. All rights reserved.
