ल़ेह-पेन 6
6
स्याहप्च्यी तिहनला दाम्ग्यो
1ओ़ह ती़हजीला चो़वो छ्येवा येशूगी स्याहप्च्यीया़गी टाहङजीला माहङरो माहङरो पेहती डोॱराङ येहकें। ओहजेला ग्रीक ताम माएँ दाङ हिब्रू ताम माएँ यहूदीया़की पाहरक्यीला ताम स्याङ स्याङ काहल्सीन। च्यिबेमाना ङ्यिहमा टाहङमा कोहएँगी साहप्च्याया़ खुङया़गी ह्युग्मोया़गी या़हबु पेहती माहन्ज्योर येहकें। 2ओहले ल़ेह-पेन च्यिङ्यी़गीॱराङ स्याहप्च्यी थाम्ज्यीला क़े क्याहप्ती मासीन, “किन्ज्योगी सुङदेन ख्येप्टा क्याहप्च्ये क्युर्ती साहज्ये थुङज्ये क्योङगेनला ठिल्दी तेहच्ये ओहराङला या़हबु मेहयोहङगे। 3ओ़ह सोङबे आदा-नो़हया़, ख्याया़गी पाहरक्यीले नाम्पार-ताहक्पा थु दाङ रिहक्स्यीगी काहङग्यो, ओहले मिहन थोप्क्यो मेहन्दा तिहन दाम्दोङ। ओहले दि साहज्ये थुङज्येगी ठाल ङ्यिह खुङला चि क्याहप्कें। 4ओहले ङ्यिहया़दी सोल्वाङ दाङ लुहङ स्येकेन्गी ल़ेहला स्य़ूहगे।”
5ल़ेह-पेनया़गी माक्योगी ताम थाम्ज्यीला या़हबु ऩेसीन। ओ़ह सोङबे खुङया़गी तेहपा दाङ नाम्पार-ताहक्पा थुगी काहङग्योगी स्तिफनास, फिलिप, प्रखरस, निकानोर, तीमोन, पर्मिनास दाङ यहूदी छ्य़ेला स्य़ूहक्यो एन्टिओखिया क्याहसाकी निकोलाउसला दाम्सीन। 6ओहले खुङया़गी ओ़ह दाम्ग्योगी मिह तिहनला ल़ेह-पेनया़गी दिनला ख्येर्सीन, ओहले ल़ेह-पेनया़गी सोल्वाङ ताप्ती राहङगी लाहक्पा खुङ थो़ला ज़्या़सीन।
7दि रोहवा पेहती किन्ज्योगी सुङदेन टाहम्दी काहल्सीन। चो़वो छ्येवा येशूगी स्याहप्च्यीया़गी टाहङजी यरूशलेम लुहङबाला जेन-जेन माहङबु पेहती काहल्सीन ओहले पूजाहारी माहङबुगीराङ चो़वो छ्येवा येशूला सेमले खाल्सीन।
स्तिफनासला ज़ुङग्यो
8स्तिफनासगी चो़वोलेगी माहङबुराङ मेलाम दाङ स्युक ज्योर्ती येहकें। खोगी मिहया़गी पाहरक्यीला याहम्जेम्बागी ल़ेहया़ पेहती ताक्छेनया़ तेन्गो येहकें। 9यिहॱनाङ लाहला मिहगीदी खोला टा़ह पेहच्ये छ़ूसीन। खुङ यहूदी छो़खाङगी राहङवाङ छो़बागी मिहया़ ओहले अलेक्जेन्ड्रिया क्याहसा दाङ कुरेनी, ओहले किलिकिया दाङ एशिया क्याहल-खाप छ्यिम्बुलेगी ओहङग्योगी यहूदीया़ यिहन्गे। खुङ थाम्ज्यी डी़दी स्तिफनास ङ्याम्बु स्येपा तुहर्केन छ़ूसीन। 10यिहॱनाङ नाम्पार-ताहक्पा थुगी स्तिफनासला दि ल़ेहमु रिहक्स्यी नाङसीन खोगी ताम माएँमु सुगीॱआङ ल़ेहन क्याहप मा़हखु। 11ओ़ह सोङबे खुङगी रेहरे मिहया़ला क्या़दी, “ङ्यिहगी दि मिहला मोशा दाङ किन्ज्योला टाह पेहती स्ये़हन्डील पेहक्यो थे़दी येह” म़ेदी मा च्य़ूसीन। 12दि रोहवा पेहती खुङगी मिहया़ ओहले छो़बाला तेहकेन्गी गोबा दाङ छ्य़े-ठिम ताङगे गोबाया़लाॱआङ क्या़सीन। खुङया़गी स्तिफनासला ज़ुङदी छो़बागी दिनला ख्योङसीन। 13ओ़ह तिङले खुङगी स्तिफनासकी तेहन्दाला स्योप क्याहप्ती पाङबु तेर्के मिहया़ला ख्योङसीन। ओहले स्योप क्याहप्केन मिहया़गी, “दि मिहगीनी नाहम्माॱनाङ ङ्यिहगी नाम्पार-ताहक्पा छ्योखाङ दाङ मोशागी नाङग्यो छ्य़े-ठिमला टाह पेहती ताम माएँ” म़ेदी मासीन। 14“नासरतकी येशूगी दि छ्योखाङला रोम्ज्ये येह ओहले मोशागी ङ्यिहला नाङग्योगी पे-ठिमॱआङ च्ये तेर्च्ये येह” म़ेदी दि ल़ेहमु तामया़ दि मिहगी माक्यो ङ्यिह राहङगीराङ थे़दी येह। 15ओहजेला छो़बा छ्यिम्बुला तेहक्योगी मिह थाम्ज्यीगी स्तिफनासला छ्यारे पेहती त़ेदी तेहसीन। खोगी तोहङबादी स्यिहङगामकी स्याहप्च्यीदी ल़ेहमु क्या-साङे पेहती येहसेर क्याहप्क्यो थोङसीन।
Markert nå:
ल़ेह-पेन 6: HYLM
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2023 (Active), Wycliffe Bible Translators, Inc. All rights reserved.
