ल़ेह-पेन 11
11
पत्रुसगी यरूशलेमकी छेन्छोकगी मिहया़ला ताम प्रा साल्ग्यो
1लेहमेन क्यिहपागी मिहया़गीॱआङ किन्ज्योगी सुङदेन ङ्यिहन्दी यिह छ्य़ेसीन दु माएँ ताम ल़ेह-पेन दाङ यहूदीया लुहङबाला येहकेन्गी चो़वो छ्येवाला यिह-छ्य़े पेहकेन्गी आदा नो़हया़गीॱआङ थ़ेसीन। 2ओहले पत्रुस यरूशलेमला लेप्केमु स्या-ताक पेहक्यो मिहया़गी पत्रुसला दि ल़ेहमु म़ेदी फातुर च़ूज्ये छ़ूसीन, 3“स्या-ताक माहबेबा मिहया़साला काहल्दी खुङ ङ्याम्बु ख्येगी च्यिबे तो साहक्यो?” 4ओहले पत्रुसगी तोहङला काहल सिहन्ग्योगी तामया़ मेलो पेहती खुङया़ला प्रा साल्ज्ये छ़ूसीन,
5“ङाह योप्पा क्याहसाला येहकेमु किन्ज्यो ङ्याम्बु सोल्वाङ ताप तेहती येहकें। ओहजेला ङाहगी नामले माहर गार्क्याङ छ्यिम्बुच्यी सुहर ज़्यिला ज़ुङग्यो ल़ेहमु पेहती ङाह ङो़ले चाहर्ती ओहङगे थोङसीन। 6ओहले ङाहगी या़हबु पेहती ताएँमु ओ़ह नाहङला नामे-नाजो रिहदाया़, साला स्युहर्ती डोएँगी सेम्ज्येनया़ दाङ च्याह-च्यिहवाया़ला थोङसीन। 7ओहले ङाहगी दि ल़ेहमु क़े च्यी़ थ़ेसीन, ‘ए पत्रुस ख्ये लाहङदोङ ओहले दिया़ला सेत्ती सोह।’ 8ओहजेला ङाहगी मासीन, ‘मिहम्बा चो़वो छ्येवा, टाहङबु म़ेहबा दाङ मेहचाङागी से़हया़ नाहरे थु ङाहगी से़हदी म़ेह।’ 9येहपाराङ स्यिहङगामले माहर दि ल़ेहमु क़े च्यी़ थ़ेसीन, ‘किन्ज्योगी चाङमा ज़ो नाङ सिहन्ग्योगी से़हया़ला ख्येगी चाङमा म़ेह म़ेदी माहमा।’ 10लेहमा सुम थु ओ़हठीॱराङ काहल्सीन, ओहले ओ़ह स़ेह थाम्ज्यी स्यिहङगाम ङो़लेराङ लो़ह काहल्सीन। 11ओ़हजेलाराङ ङाहला कैसरिया क्याहसालेगी क़े क्याहप्च्येला ताङग्योगी मेहन्दा सुम ङाह तेहक्योगी खाङबाला लेप ओहङसीन। 12ओहले नाम्पार-ताहक्पा थुगी ङाहला, ‘यिहन्जे मिहन्जे ताम मा़हमेबा पेहती खुङ ङ्याम्बु सोङ!’ म़ेदी सुङ नाङसीन। ओहले किन्ज्योला यिह-छ्य़े पेहक्योगी मेहन्दा ट़ूह नो़हया़ॱआङ ङाह ङ्याम्बुराङ ओहङसीन ओहले ङ्यिहया़ कर्नेलियसकी खाङबा नाहङला स्य़ूहसीन। 13ओहले कर्नेलियसकी राहङगी खाङबाला स्यिहङगामकी स्याहप्च्यी च्यी़ फेप नाङग्योकी स्याहल ङ्यिहया़ला स्येसीन। ओ़ह स्यिहङगामकी स्याहप्च्यीगी कर्नेलियसला, ‘योप्पा क्याहसाला पत्रुस माएँ सिमोनला क़े क्याहप्च्येला ताङदोङ 14ओहले खोगी ख्येला दि ल़ेहमु या़हबु लेहङगु स्येच्ये येह, ओ़ह या़हबु लेहङगु लाहमले ख्ये दाङ ख्येगी म़ेहमे थाम्ज्यीगी थार्पा ज्योर्च्ये येह’ म़ेदी सुङ नाङसीन दुबा।
15ङाहगी ताम माज्ये छ़ूगेमु, तोहङला ङ्यिहगी थो़ला फेप नाङग्योकी नाम्पार-ताहक्पा थुराङ खुङया़गी थोलाॱआङ फेप नाङसीन। 16ओहजेला चो़वो छ्येवागी सुङ नाङग्योकी स्याहल ङाहगी टेहम्बा साल्सीन, ‘यूहन्नागीनी छ्युगी बप्तिस्मा नाङसीन, यिहॱनाङ ख्यागीदी नाम्पार-ताहक्पा थुगी बप्तिस्मा ज्योर्च्ये येह।’#ल़ेह १:५ 17चो़वो छ्येवा येशू मास्यीकाला यिह-छ्य़े पेहकेमु किन्ज्योगी ङ्यिहया़ला नाङग्योकी काबाप, खुङया़ॱलाङ ओ़ह काबापॱराङ नाङ फान्ज्यो किन्ज्योला का़ ख़ूएँ ङाह सु यिहम्बा ले?”
18दि ताम थ़े फान्ज्यो चो़वो छ्येवाला यिह-छ्य़े पेहकेन्गी यहूदी आदा-नो़हया़गी पत्रुसला फातुर च़ूज्ये क्युर्सीन ओहले, “ता़ह किन्ज्योगी लेहमेन क्यिहपागी मिहया़लाॱआङ मिहलीगी तेहन्दाला सेमगी स्या़बा पेहती तिहक्पा पाङज्येला लोहङ नाङसीन दुबा” म़ेदी किन्ज्योला त़ेरा तेच्या फुल्ज्ये छ़ूसीन।
एन्टिओखिया क्याहसागी छेन्छोक
19स्तिफनासला मिहया़गी से फान्ज्यो चो़वो छ्येवा येशूला यिह-छ्य़े पेहकेन स्याहप्च्यीया़ला यरूशलेमला तेहच्येला खेन्दा-का़हबु काहल्ग्यो सोङगोराङ माहङबुराङ स्याहप्च्यीया़ प्रे़हदी काहल्सीन। ओहले प्रे़हदी डोएँमु रेहरे फोनिके लुहङबाला लेप्सीन, रेहरे साइप्रसला लेप्सीन, रेहरे एन्टिओखिया क्याहसाॱलाङ लेप्सीन। ओ़ह ग्या़या़ला लेप्ती खुङया़गी तोहङस्यो यहूदी क्यिहपागी मिहया़ला च्यी़राङ या़हबु लेहङगु स्येसीन।#ल़ेह ८:१-४ 20खुङ नाहङॱलाङ रेहरे साइप्रस दाङ कुरेनी क्याहल-खापकी मिहया़ येहकें। ओहले खुङया़गी एन्टिओखिया लुहङबाला ओहङदी ग्रीक मिहया़लाॱआङ चो़वो येशूगी तेहन्दाला स्येसीन। 21ओहले चो़वो खुङ ङ्याम्बु ज़्य़ू नाङग्यो येहकें सोङगोराङ मिह माहङबुगीराङ यिह-छ्य़े पेहती चो़वो ङो़ले लो़हसीन।
22दि लेहङगु यरूशलेमगी छेन्छोकला लेप्सीन, ओहले खुङया़गी बारनाबासला एन्टिओखिया लुहङबाला ताङसीन। 23एन्टिओखियाला लेप्केमु किन्ज्योगी ओ़ह मिहया़ला थुज्यी ज़ी़दी मेलाम नाङग्यो थोङदी बारनाबास ज्यिबुराङ क़ेहनाङ पेहसीन। ओहले खोगी खुङया़ला चो़वोला राहङ सेम तिहङ यिहन्ज्युराङ यिह छ्य़ेदोङ म़ेदी आ़र क्ये च्य़ूसीन। 24बारनाबासदी नाम्पार-ताहक्पा थु दाङ यिह-छ्य़ेगी काहङग्यो ज्यिबुराङ मिह या़हबु येहकें, खोगी पेहती मिह माहङबुगी चो़वोला सेमले खाल्सीन।
25ओ़ह तिङले बारनाबास शाऊलला छोल्ज्येला टार्सस क्याहसाला काहल्सीन। 26ओहले शाऊलला टार्सस क्याहसाला च्य़ेह सिहन्दी खोला एन्टिओखिया क्याहसाला ख्योङसीन। ओहले खुङ ङ्यी़गी लोह च्यी़ थु एन्टिओखियागी छेन्छोककी मिहया़ ङ्याम्बु छोक्पा पेहकेनॱराङ सुङ ख्येप्टा तेर्सीन। एन्टिओखिया लुहङबालाराङ तोहङस्यो मास्यीकागी स्याहप्च्यीया़ला मास्यीकापा म़ेदी माक्यो यिहम्बा।
27ओहजे काहङला लाहला लुहङतेम्बाया़ यरूशलेमले एन्टिओखिया लुहङबाला ओहङसीन। 28खुङया़ नाहङला अगाबस माएँ मिह च्यी़ येहकें। ओहले खो नाम्पार-ताहक्पा थुगी काहङदे, “ता़ह जाम्बुलीङ थाम्ज्यीला मुहयी लाहङज्ये येह” म़ेदी लुहङदेन स्येसीन। ओह मुहयीदी रोमी क्याहल-खापगी क्याहल्बु छ्यिम्बु क्लौडियसगी ती़हजीला क्याहप्च्ये येह।#ल़ेह २१:१० 29ओहले एन्टिओखिया क्याहसाला तेहकेन्गी चो़वो येशूगी स्याहप्च्यीया़गी यहूदीया लुहङबागी आदा-नो़हया़ला रो़ह पेहच्ये म़ेदी काहजे ला़ खाएँ डेल्बाया़ ती़हदे ताङज्ये सेम पेहसीन। 30ओहले खुङया़गी डेल्बा ती़हदे बारनाबास दाङ शाऊलला तेर्सीन, ओहले खुङ ङ्यी़गी यहूदीया साने़की छेन्छोककी एल्डरया़ साला ताङ चाहङसीन।
Markert nå:
ल़ेह-पेन 11: HYLM
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2023 (Active), Wycliffe Bible Translators, Inc. All rights reserved.
