Luk 13
13
Dzikayi biku bibi
1Ndili mene yayu, va batu baya tanda ne Zezu ati: «Pilati abuuma batu be Galile ye bangu beme dze ne ukaba bisemi bye Nzambi.» 2Zezu akalule ne bangu ati: «Beyi betsimene nati, batu be Galile be beme buuma babu, batakwe boko besi be Galile mesumu? 3Nyen, me tanda beyi, ni beyi ti nde dzika biku bibi, ne beyi betse waa si nda bangu. 4Ya batu iku ne ŋwambi, be ndaku ye ndiki ye silowe ye menawen kule ye bangu bawaa, beyi betsimene nati bangu batakwe boko be Zeluzalemi mamvu mebi? 5Nyen, me tanda beyi, ni beyi ti nde dzika mamvu mebi, ne beyi besi betse waa si nda bangu.»
Ngana ye ŋwili ŋwen nde buta
6Zezu ate bangu ngana ati: «Muutu motu edze ne ŋwili ŋwen kumvu figye ŋwedzi ekuna se kuba, vusa votu wangu aya fumba befigye be ŋwili ŋwaŋwu, ni eke bomo.» 7Wangu ne wi bata kuba ati: «Lolo bisiwu bya bisatu, byami ye fumba befigye se ŋwili ŋwu, ni ŋwangu nde buta. Kumaka ŋwangu, ŋwen wanda buma ye ngolu, ye ŋwangu wi pika wa ni yi?» 8Muutu wi bata kuba nedzi ati: «Kuŋwu, dzika siwu yi ma ke luma ibila, me somoko mbolise se kati. 9Toko ŋwen tse buta siwu yi ya, ni ti ŋwa ke buta, ma kumaka nda we me tanda.»
Zezu asaka ŋwatu wedze ne iklu vʉsa ve idzʉndu
10Vusa ve idzʉndu, Zezu edze ne ulakise se ndaku ye umbondu. 11Se ndaku ye umbondu yayu, yedze ne ŋwatu we umbiti ŋwen dzika dondoo ne iklʉ bisiwu iku ne ŋwambi nde sikwe. 12Ye Zezu eyene ŋwatu mene, yedzi ebanga wangu, nedzi ati: «Mama wami, Nzambi asaka we leme.» 13Zezu asatse wangu meboko, palikise ye ŋwatu mene esikwe telee, yedzi ekumise Nzambi. 14Ni kuŋwu we ndaku ye umbondu akamve ne Zezu esaka ŋwatu wayu vʉsa ve idzʉndu. Kuŋwu we ndaku ye umbondu awowe ne unkuka ati: «Yedzi ne masi untuba me bebe bidzanza, yakayi besaka beyi masi mamu, ni kaka vʉsa ve idzʉndu.» 15Zezu akalule nedzi ati: «Umpyeli ŋwen beyi ŋwaŋwu! Vusa ve idzundu, beyi we nde tuka nyangule bodzi yedzi ne ubapa ne utse nyuwan mangu ni nza? 16Ŋwatu yu, ni we imbisa dze Ablaami we Satan ekutaka se bisiwu iku ne ŋwambi, tadzi bake nyangule wangu medzisa vusa ve idzundu!» 17Ndili ye Zezu ekalʉle vavu, besi bedze ne mbele nedzi bedze se sonyi. Ni batu besi bedze se itsisa ne mamvu meve me Zezu edze ne upika.
Ngana ye ŋwili ŋwen kumvu mutadi
18Zezu ati: «Ukani ve Nzambi ve tala ni yi? Yami ituka mikise vangu ne yangu ni yi? 19Vangu ve tala ni limbulu lite amene, le muutu ikuna se buka, ye limbulu lalu limene, ye langu liyikwe ŋwili uneni, ye benyodzi bitunga mendaku kule bitatsi.»
20Zezu avele tanda ati: «Yami ituka mikise Ukani ve Nzambi ne yangu ni yi? 21Vangu ve tala ni yila yi landise pembe, ŋwatu ti avʉkise yila mene se pembe, ye pembe yi landa.» 22Zezu atse Zeluzalemi. Asuta se bingundu ne membuka ne ulakise. 23Muutu motu nedzi ati: «Kuŋwu, batu be Nzambi itse lungise si va ba.» Zezu ne bangu ati: 24«Pikayi singa ne unyindzile se dzasa dze lititi, me tanda beyi beyitsi betse fumba nyinzile, ni nde tse tuka.»
25Ndili ye kuŋwu we ndaku itse telime, wangu atse dziba kutse ne bisapi, ye beyi bitse dze ituna, beyi betse banda ne udzumidze kutse. Ne utanda ati: «Kuŋwu, Kuŋwu, dzunvule besu kutse.» Ni wangu atse kalʉle ne beyi ati: «Me nde yiba beyi!» 26Ye beyi bitse tanda wangu ati: «Bebe bedza bila, ne unoto buma yotu, we dze ne ulakise se mepeyi me bingundu bye besu.» 27Wangu atse tanda ne beyi ati: «Me nde yiba beyi, lawayi nami, beyi bipika mamvu mebi.» 28«Ndili ye beyi bitse yene Ablaami, Izaaki, Zaakobi ne Batu be Nzambi besi se Ukani ve Nzambi, ye bitse yisa beyi ituna, ayayu ni ye beyi bitse lila ne ukweke mina.» 29«Batu besi betse yinga kwele ye musa nwi bala, ne boko kwele ye itadzi dzi kwa, ne ne boko ye sangwe, ne ne boko ye ŋwadzi, bangu besi betse pika itsinda dzi neni buma yotu se Ukani ve Nzambi, 30yayu, ne boko be tima ye bangu bidzi limbisa, betse dze libusu, ne boko be tima ye bangu bidzi libusu, betse dze limbisa.»
Zezu awowe ne batu be Zeluzalemi
31Ndili mene yayu, batu be Falizi boko batsindene kone Zezu, bangu nedzi ati: «Teme wa, tseke, utsina ne Elodi Atipasi ifumba buuma we.» 32Zezu akalule ne bangu ati: «Tseke tandayi ne muutu we utsengu nda ve mbakwe wayu, velolo ne yana me panza mimbiti, me saka mibedzu, mbisa yana me mana dzanza dzami. 33Ni uve lolo, yana ne mbisa yana ma tse umbukwe ŋwami, nde uve ti muutu we Nzambi awaa ulayi ne Zeluzalemi.»
34«Batu be Zeluzalemi! Batu be Zeluzalemi! Beyi bebuuma Batu be Nzambi, beyi bebuuma be Nzambi eluma beyi ne memanyan. Bidzuku kwe byami ifumba kukise beyi nda susu ikunzume kule baana bedzi, ni ka beyi beke nde tondo vavu. 35Ee, Nzambi atse lewe ngundu ye beyi. Me tanda beyi, beyi nde tse vele yene me, nzii ne vʉsa ve beyi bitse tanda ati: “Nzambi akaba meve ne muutu wiya ne kumvu ye Kuŋwu.”»
Markert nå:
Luk 13: WUM
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
