2 कुरिन्थियों 8
8
दिल शो दाँण देणों
1ऐबे हे भाऐ बंईणों, आँमें तुँओं खे पंण्मिश्वर की तियों कृपा की खुषख्बरी दियों, जुण्जी मकिदुनिया की कलीसियों गाशी हंऐ। 2बैजाऐ दु:ख-क्ल़ेष के परख दी तिनकी बड़े आँनन्द अरह् बैजाऐ कंगाली दी देंण बंडी।
3तिनके बारे दी मेरी ऐजी गुवाऐ-शाज़्त असो, के तिन्ऐं आप्णी शरदा शो अरह् आप्णी शरदा शो भे जादा मंन खुलियों दितों। 4अरह् तैसी दाँण दो अरह् पबित्र लोगो की सेवा दे हिंस्सेदारी हंणों की कृपा के बारे दी, आँमों कैई बार-बार बैजाऐ ढाल-अरज करी,
5अरह् जैष्णाँ आँमें भुर्षा करा थिया, तैष्णा ही ने, परह् तिन्ऐं प्रभू खे हजो पंण्मिश्वर की हिछ़्या शे आँमों खे आपु आप्णें आप संमर्पित्त करी दित्ते। 6ईन्देंखे आँमें भाऐ तीतुस खे भे ऐजी सलाह् दिती, के जैष्णों तुँऐं आगे शुरू करो थियों, तैष्णी ही तुँओं मुँझी भी दाँण देणों की टह्ल पुरी करह्। 7ईन्देंखे जैष्णें तुँऐं बादी बातो दे मतल्व बिश्वाष, बचन, ज्ञाँन, अरह् ओकी कोशिष दे, अरह् तेसी पियार दे जू आँमों आरी करह्, तैष्णें ही तुऐं मंद्दत कर्णो वाल़े दाँण देणों के काँम-काज़ दे भे बड़दें ज़ाव।
8हाँव अज्ञाँ के हिसाब शे ने, परह् ओकी के होंस्ले शे तुवाँरे पियार की सच्चाई की परख खे बुलू। 9तुँऐं अमाँरे प्रभू यीशू मसीया की कृपा जाँणों ऐ, के से धनी-सेठ हऐयों भे तुँवारी ताँईऐं कंगाल बणे, जू तिनके कंगाल हणों शे तुँऐं सैठ बंणी ज़ाँव। 10ईयों बातो दी मेरी ऐजी सलाह् असो: के तुँओं खे ऐजो आछो असो; के तुँऐं पाछ़ली साल दाँण देंणों की हिछ़या दे, भे सोभी शे आगे थिऐ, अरह् दाँण देणों खे भे सोभी शे आगे हुऐ चेंई। 11ईन्देंखे ऐबे ऐजी टह्ल पुरी करह्, के जैष्णी दाँण देणों की हिछ़या दे तुँऐं तियार थिऐ; तैष्णी ही आप्णी आँम्दणी के हिसाब शी पुरी करह्। 12किन्देंखे के जे मंन की हिछ़या हों, तअ दाँण तिन्दें के मुताबिक धारण भी करो ज़ाँव, जुण्जों तैस कैई असो ऐ, ना के तिन्दें के मुताबिक जुण्जो तैस कैई आथी ने। 13अमाँरा मतल्ब ऐजा ने आथी, के ओकी की भलाई की ताँईऐं आपु खे दु:ख-कल़ेष खड़े करह्, परह् अमाँरा मतल्व ऐजा असो, के बादे लोग बराबर ऐक भाँत्ते बंणों,
14ऐसी बख्ते तअ तुँवारी बड़ोत्री तिनकी जरूरत पुरी कर्णो खे बैजाऐ असो; परह् कोद्दी ऐशो ने हईयों के तुवाँरे भे जरूरत पड़ो, अरह् से भे तुँवारी सहाऐता करह्, तबे तुऐं दुईने ढूंग ऐक-भाँते बराबर हंदे। 15जैष्णों पबित्र-ग्रन्थों दो लिखी थोह्, “जेने बैजाऐ सलाव तैसी भे भहितों ने भेंटी; अरह् जेने ठिक्को सलाव तैस्के भे कम्मीं पड़ी ने।”
तीतुस के सेवकाऐ
16पंण्मिश्वर का धन्यबाद हों, जिन्ऐं सेजा होंस्ला तीतुस के सासो दा पाऐ थिया। 17के तेने अमाँरा संम्झाँणा माँनी पाया, परह् बैजाऐ खुशी हऐयों से आप्णी हिछ़या शा तुँओं कैई आया। 18आँमें तैस्की गईलो तैसी भाऐ भे डियाल़ी थुवा; जैस्को नाँव खुषख्बरी के बारे दो बादी कलीसियों दो फईलो अंदा असो; 19अरह् ऐत्ती ने, परह् से कलीसियों दा जाँणा-गीणा असो; के ऐसी दाँण की काँम-काज़ खे अमाँरी गईलो डियाल़ा ज़ाँव। आँमें ऐजी सेवा ईन्देंखे करह्, के प्रभू के बड़ियाऐ अरह् सहाय्ता-मंद्दत कर्णो खे अमाँरे मंन की तियारी भे पर्गट हऐ ज़ाँव।
20आँमें ईयों बातो दे चक्क्ष रंह्, के ऐजी अछाई की टह्ल-काम के बारे दी जिनकी सेंवा आँमें करह्, कुँऐं आँमों गाशी दोष-ईल़जाम ने लाँव।
21किन्देंखे के जुण्जी बातो सिर्फ प्रभू ही के नंजीक ने, परह् आदमी के साम्णें भी भली असो, आँमें तिन्दे का फिकर करह्। 22आँमें तैस्की गईलों आप्णा भाऐ भे डियाल़ी थुवा, जैसी आँमें बार-बार पर्खियों भहिती बातों दा होंस्लै दा भरा अंदा पाया; परह् ऐबे तुँओं गाशी तैस्के बैजाऐ भूर्षा असो, ईन्देंखे से बैगेही होंस्ले दा असो। 23जे कुँऐं तीतुस के बारे दो पुछो, तअ से मेरा साथी अरह् तुँवारी ताँईऐं मेरा साजी असो; अरह् जे अमाँरे भाऐ के बारे दो पुछो, तअ से कलीसियों के डियाल़े अंदे, अरह् मसीया की बड़ियाऐ असो। 24तअ: आप्णों पियार अरह् अमाँरे तारीफ जू तुवाँरे बारे दे असो, कलीसियों के साम्णें साच्चा करियों तिन कैई शा दे:खाव।
Markert nå:
2 कुरिन्थियों 8: sri
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2022, Wycliffe Bible Translators, Inc. All rights reserved.