सपन्याह 2
2
यहूदा र यरूशलेमको पनि अरू राष्ट्रहरूसँगै न्याय गरिएको
यहूदालाई पश्चात्ताप गर्नलाई बोलाइयो
1ए लाज नभएको राष्ट्र,
एकसाथ जम्मा होओ! आफूलाई एकसाथ भेला गराओ!
2जारी गरिएको उर्दी जारी हुनुभन्दा अगि,
र त्यो दिन हावाले उडाएको भुसझैँ बितेर जानुभन्दा अगि,
याहवेहको भयङ्कर क्रोध
तिमीहरूमाथि आउनुभन्दा अगि,
र याहवेहको क्रोधको दिन
तिमीहरूमाथि आइपर्नुभन्दा अगि नै।
3हे देशका सबै नम्रहरू हो, जसले उहाँका आज्ञाहरू पालन गर्दछौ,
तिमीहरूले याहवेहको खोजी गर।
धार्मिकता र नम्रताको खोजी गर;
सायद याहवेहको क्रोधको दिनमा
तिमीहरूले शरण पाउनेछौ।
पलिश्ती
4गाजालाई त्यागिनेछ,
र अश्कलोनलाई उजाड पारिनेछ।
मध्यदिनमा अश्दोदलाई खाली पारिनेछ
र एक्रोनचाहिँ जरैदेखि उखेलिनेछ।
5समुद्रका छेउमा बसोबास गर्ने,
हे करेतीहरू हो, तिमीहरूलाई धिक्कार छ;
हे पलिश्तीहरूको देश, कनान,
याहवेहका यी वचन तिमीहरूका विरुद्ध छ,
उहाँले भन्नुहुन्छ, “म तँलाई नाश पार्नेछु,
कोही पनि जीवित छोडिनेछैन।”
6समुद्री किनारको देशचाहिँ खर्क हुनेछ,
जहाँ गोठालाहरूका निम्ति इनार हुनेछ
र भेडाहरूका निम्ति गोठ हुनेछ।
7त्यो समुद्री किनारको भूमि
यहूदाका बाँकी रहेकाहरूका निम्ति हुनेछ;
त्यहाँ तिनीहरूले हरियो खर्क भेट्टाउनेछन्।
राति तिनीहरू अश्कलोनका
घरहरूमा सुत्नेछन्।
याहवेह, तिनीहरूका परमेश्वरले तिनीहरूको हेरचाह गर्नुहुनेछ;
उहाँले तिनीहरूका सुदिन फर्काएर ल्याउनुहुनेछ।
मोआब र अम्मोन
8“मैले मोआबले गरेको अपमान
र अम्मोनीहरूले गरेको निन्दा सुनेको छु,
जसले मेरा मानिसहरूलाई अपमान गरेका छन्,
र तिनीहरूको देशको विरुद्धमा धम्की दिएका छन्।
9यसकारण म जीवित भएझैँ,”
सेनाहरूका याहवेह,
इस्राएलका परमेश्वर घोषणा गर्नुहुन्छ,
“निश्चय नै मोआब सदोमजस्तै र
अम्मोनीहरू गमोराजस्तै हुनेछन्;
सामा र नुनका खाडलैखाडल भएको ठाउँ,
र सधैँका निम्ति रुखो जमिन हुनेछन्।
मेरा बाँकी रहेका मानिसहरूले तिनीहरूलाई लुट्नेछन्;
मेरा राष्ट्रमा जीवित रहेकाहरूले तिनीहरूको देश अधिकार गर्नेछन्।”
10तिनीहरूको घमण्ड र सेनाहरूका याहवेहका
मानिसहरूलाई गरेको अपमान र खिसीको सट्टामा
तिनीहरूले यही कुरा फिर्ता पाउनेछन्।
11याहवेह तिनीहरूका निम्ति डरलाग्दो हुनुहुनेछ,
जब उहाँले पृथ्वीका सबै देवताहरूलाई नष्ट गर्नुहुन्छ।
उहाँलाई टाढाका राष्ट्रहरूले
आ-आफ्नो भूमिबाट दण्डवत् गर्नेछन्।
कूश
12“हे कूशका मानिसहरू हो,
तिमीहरू पनि मेरो तरवारले काटिनेछौ।”
अश्शूर
13उहाँले उत्तरको विरुद्धमा आफ्ना हात पसार्नुहुन्छ,
र अश्शूरलाई नाश गर्नुहुनेछ;
अनि निनवेलाई पूरै उजाड
र मरुभूमिझैँ सुक्खा पारेर छोडिदिनुहुनेछ।
14त्यहाँ सबै किसिमका जीवजन्तुका
बथान र बगालले आराम गर्नेछन्;
मरुभूमिको उल्लु र कराउने उल्लुहरूले
त्यसको रूखका प्वालहरूमा बसोबास गर्नेछन्।
झ्यालहरूबाट ती उल्लुहरूले कराएको आवाज प्रतिध्वनित हुनेछन्;
ढोकाहरू ढुङ्गाका थुप्राहरूले भरिनेछन्,
र देवदारुका चौकसहरू उदाङ्गिनेछन्।
15यो त्यही घमण्डी सहर हो,
जुन सुरक्षितसाथ निर्धक्क बस्दथ्यो।
त्यसले आफूलाई भनेकी थिई,
“म नै हुँ, र मबाहेक अरू कोही छैन!”
अहिले त्यसको कस्तो विनाश भएको छ!
त्यो जङ्गली जनावरहरूका निम्ति गुफा भएकी छ!
त्यहाँबाट भएर जानेहरू सबैले
त्यसलाई आफ्नो मुक्का देखाएर खिसी गर्नेछन्।
Markert nå:
सपन्याह 2: NCV
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
पवित्र बाइबल, नेपाली समकालीन संस्करण
प्रतिलिपि अधिकार © 1998, 2006, 2021, 2024 Biblica, Inc.
अनुमतिसहित प्रयोग गरिएको छ।
सम्पूर्ण अधिकार विश्वव्यापी रूपमा सुरक्षित रहनेछ।
Holy Bible, Nepali Contemporary Version
Copyright © 1998, 2006, 2021, 2024 by Biblica, Inc.
Used with permission. All rights reserved worldwide.