लूका 5
5
पेहिलै चैलै शदायूंणै
(मत्ती 4:18-22; मरकुस. 1:16-20)
1जेख्णी मैहणुवां केरी भीड़ परमेश्वरैरा वचन शुणनेरै तेईनी तैस पन शिंडै पुईंथी, जां सै गन्नेसरतेरी झीलिरै किनारै खड़ा थ्या, तां ऐतियु भूं 2कि तेनी झीलिरै किनारै पन लाउरी दो किश्ती लधि, जां मछुवारै तैन्हांं किश्तीया पना उतरि करि मछली पकड़नेरै जाल धूंतै थ्यै। 3तैन्हांं किश्तीया मझां एकि पन जै शमौनेरी थी, तेत पन चढ़ी करि यीशु शमौना सिंउ विनती केयि, कि किश्ती किनारै किना थोड़ी-तैई घैरी करि लै चलिया, तां फिरी सै बेशि करि मैहणुवंनी किश्ती पना उपदेश दींणा लगा। 4जेख्णी सै मैहणुवां सिंउ गल्लै करि बेठा ता यीशु शमौना सिंउ बौलु, “डुघू मझ लै चल, जां किछ मछलिया पकड़नेरै तेईनी अपड़ै जाल सुटा।” 5शमौनै तेसनी जुबाव दिता, “हे मालिक! असै सारी रात मैहनत केयि जां किछ ना पकड़ु तां बि तु ऐहीं बोलता ता मूं तिंडु बोलोरू जाल सुटणा।” 6जेख्णी पतरसै जां तेसेरै साउगियै जाल सुटा ता बड़ी मछली तेन्हैरै जाला मझ चलि येई जां तैन्हांं ऐहीं लगणा लगु कि तेन्हैरै जाल फटि गांहणै। 7ऐत पन तैन्हैं अपड़ै दोस्त जै होरी किश्ती पन थ्यै तेन्हांनि इशारा केया कि अईछी करि असेड़ि मजत करा, जां तैन्हैं झट ऐईछी करि दोईयो किश्ती मछलियै ला योउती भरी दित्ती कि सै दोईयो किश्ती डुबणा लगी। 8ऐक्यु तका करि शमौन पतरसै यीशुरै पैयिड़ा पन पै करि बौलु, “हे प्रभु! मूं किना चलि गा, केईनी कि आंउ पापी मैहणु आ।” 9केईनी कि योउती मछली पकड़ने ला तेसनी जां तेसेरै सउगियानि बड़ी हैरानी भुई, 10जां तिहियें जब्दीरै पुत्र याकूबा जां यूहन्नेनि बि जै शमौनेरै साथी थ्यै, तैन्हांं बि हैरानी भुई, फिरी यीशु तैन्हांं सेईतै बौलु, “मेईं डरै! आज किना बाद ताउ मछली ना पण मैहणु मिंडै चैलै बंणाणेरै तेईनी मूं किनि अंणने।” 11तां तैन्हैं किश्ती किनारै पन लाय जां सभ किछ छडि करि तैस सेईतै चलि पियै।
कोढ़ी मैहणु ठीक कांना
(मत्ती 8:1-4; मरकुस. 1:40-45)
12अक बारी जेख्णी यीशु कोसक्यै नगरा मझ थ्या, तां तैठि तैस किनि कोढ़ेरी बिमारी वा अक मैहणु या जां सै यीशु तका करि मुँहैरै भारै पेया जां विनती की, “हे प्रभु! अगर तु चहिया ता मूं ठीक करि सकता।” 13तेनी हत्थ आघै करि-करि तैस छू करि बौलु, “हाँ! आंउ चांहथा कि तु ठीक भौ गहिया!” जां सै इकदम कोढ़ेरी बिमारी किना ठीक भौ गिया। 14तां यीशु तेसनी ऐ आज्ञा दित्ती, कि “कोस सिंउ मेईं बोलै, पण गहि करि अपड़ै आपा याजकनि लुहा, जां अपड़ै ठीक भूंणेरै बारै मझ जै किछ मूसै चढ़ावा ठहराउरा तैस चाहढ़ कि तैहां केरै तेईनी गवाहि भुईया।” 15पण यीशुरै बारै मझ चर्चा होरी बि फैलती गैई, जां बड़ै सारै मैहणु तेसैरा उपदेश शुणनेरै तेईनी जां अपड़ि बिमारिया किना ठीक भूंणेरै तेईनी तैस किनि ऐईंणा लगै। 16पण सै तैन्हांं किना दूर सुनसान मझ अलग गहि करि प्रार्थना करींथ्या।
अधरंगै वा बिमार मैहणु ठीक कांना
(मत्ती 9:1-8; मरकुस. 2:1-12)
17अक धियाड़ि ऐतियु भूं कि यीशु उपदेश दींता थ्या, जां फरीसी जां व्यवस्थापक तैठि बेठोरै थ्यै जै मैहणु गलील प्रदेशा जां यहूदिया प्रदेशा केरै हर-एकि ग्राँईयां किना जां यरूशलेम शहरा किना यौउरै थ्यै केईनी कि ठीक कानें बाऐ प्रभुरी शक्ति यीशु सेईतै थी। 18तैस टैंमा कुछ मैहणु एकि अधरंगेरै बिमार मैहणु पालकी मझ चोउवा मैहणुवां किना चुका करि तैस किनि लै यै। जां सै तेस अंतर लै गांहणनी जां सै यीशुरै सांमणै रखणैरा कोई तरीका तोपतै थ्यै। 19पण भीड़िरी वजहि ला तेन्हैरै बोलै सै अंतर तेईनी ना पुजाईया तां फिरी तैन्हैं छत्ति पन चढ़ी करि जां स्लैट घैरी करि सैक्या मंजै सेईतै छत्तिरै बिच मझां यीशुरै सांमणै उतारी दिता। 20यीशु तेन्हैरा विश्वास तका करि तैस सिंउ बौलु, “हे मैहणुवां! तिंडै पाप माफ भुवै।” 21तां कुछ यहूदी शास्त्री जां फरीसी मैहणु बहस कांना लगै, “ऐ केणु आ जै परमेश्वरेरी निंदा काता? परमेश्वरा छडि करि केणु पाप माफ करि सकता?” 22यीशु तेन्हैरै मंनेरी गलै जांणि करि, तैन्हां सिंउ बौलु, “तुवे अपड़ै मंना मझ बुरै विचार केईनी सौचतै अत्तै? 23क्या ऐ बोलणु आसान भूंणु? कि तिंडै पाप माफ भुवै, या ऐक्यु बोलणु कि उठ जां चल फिर? 24पण ऐठणीरै तेईनी कि तुवे ऐ बि जांणि ल्या कि मैहणुरै पुत्रा धरती पन पाप माफ कानेंरा बि हक आ।” तेनी तैस अधरंगेरै बिमार मैहणु सिंउ बौलु, “आंउ ताउ सिंउ बोलता, कि उठ जां अपड़ा मंजा चुक जां अपड़ै घरेनी गा।” 25सै छुईं तेन्हैरै सांमणै उठा, जां जैत पन सै पियौरा थ्या तैस चुकि करि, परमेश्वरेरी बडियेई काता-काता अपड़ै घरेनी चलि ग्या। 26तां सारै मैहणु हैरान भौ ग्यै जां परमेश्वरेरी बडियेई कांना लगै जां सै डरि करि बोलणा लगै, “आज असै होरांधि गलै तकाई।”
मत्तीरू शदाईयूंणु
(मत्ती 9:9-13; मरकुस. 2:13-17)
27ऐत किना बाद यीशु भेईर या जां लेवी नांईयेरा अक चुंगी लींणै वा चुंगी लींणै बाई चोउकि पन बेठौरा लधा, जां तैस सिंउ बौलु, “मूं पिचालीं आ।” 28तां फिरी सै सभ किछ छडि करि उठा, जां तैस पिचालीं चलि पेया।
पापिया सेईतै खांणा
29अक धियाड़ि बाद यीशु जां तेसेरै चैलै लेविरै घरै रात रोटी खांतै थ्यै। जां चुंगी लींणै वा केरी, जां होरनियां जातिया केरै मैहणुवां केरी, जै तैस सिंउ रोटी खांणा बेठोरै थ्यै, अक बड़ी भीड थी। 30ऐत पन फरीसी जां तेन्हैरै शास्त्री तेसेरै चैला सिंउ ऐक्यु बोलि करि शिकायत कांना लगै, “तुवे चुंगी लींणै वा जां पापिया मैहणुवां सेईतै केईनी खांतै पींतै?”
31यीशु ऐ शुणि करि तेन्हांनि जुबाव दित्ता, “बिमार मैहणुवां बेईदैरी जरूरत आ, पण जै ठीक अत्तै तैन्हांं बेईदैरी जरूरत ना भूंती।” 32आंउ तैन्हांं मैहणुवां शदाणनि ना यौउरा जै अपड़ै आपनि धर्मी समझतै, पण आंउ पापिया मैहणुवां शदाणनि यौउरा ताकि सै अपड़ै पापा किना अपड़ा मंन फेरिया।
उपवासैरा स्वाल
(मत्ती 9:14-17; मरकुस. 2:18-22)
33तैन्हैं यीशु सिंउ बौलु, “यूहन्नेरै चैलै ता बराबर उपवास रखतै जां प्रार्थना कातै रिहींथ्यै, जां तिहियें फरीसिया केरै बि, पण तिंडै चैलै ता खांतै-पींतै रिहींथ्यै।” 34यीशु तैन्हांं किना पुच्छु, “क्या तुवे बरातिया किना ज्यो-तेईनी नवाँ लाड़ा तैन्हांं सेईतै आ, तैन्हांं किना उपवास कराउवा सकतै?” 35पण सै धियाड़ि ऐईंणी, जेख्णी नवाँ लाड़ा तैन्हांं किना अलग करियूंणा, तां तैस टैमां तैन्हांं उपवास कांना। 36तेनी अक हौरा उदाहरण बि तैन्हांं सिंउ बोला, “कौ मैहणु पुरांणै कपडै़नि नवें कपडै़री टलि ना लांता; ना ता जेख्णी सै धूंणु ता नऊं लिकड़ ढुकि गांहणु जां पुरांणु लिकड़ जादु फटि गांहणु 37जां नवें अंगूरेरै रस्सा पुरांणियां चमड़ेरिया थेईलिया मझ कौ ना रखता, नता अंगूरेरै रसै ला सै फटि गांहणी, जां अंगूरा केरा रस जां चमड़ेरी थेईली दोईयो खत्म भौ गांहणी। 38पण अंगूरा केरा नवाँ अंगूरी रस नउवियां चमड़ेरिया थेईलिया मझ भरना चेहिंथा। 39कौ बि मैहणु पुरांणा दाख रसा पी करि नवाँ ना चांहथा केईनी कि सै बोलता, कि पुरांणा ऐ ठीक आ।”
Markert nå:
लूका 5: CDJNT
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
