मत्ती 17

यीशु रा रुप बदलणा

1यीशु छे रोजां बाद पतरस, याकूब, अते तिसेरे भ्याल यूहन्ना जो अपणे कने कल्ले बिच इक्क उँचे पहाड़ पर लेई गे। 2तित्ते तिन्हेरे सामणे यीशु रा रुप बदली गेया उन्हेरा मुँह सूरज साई चमकी पेया, अते तिन्हेरे कपड़े इय्यां चमके जिय्यां लौ हो। 3फिरी अचानक मूसा ते एलिय्याह उन्हेरे सामणे आये अते यीशु कने गल्ल-बात करणा लग्गे। 4पतरस ने यीशु जो बोल्लेया, ओ प्रभु, असा तांइ इत्ते रैह्णा ठीक है जे तुसा री मर्जी हो तां मैं इत्ते त्रै तम्बू बणां इक्क तुसा रे तांइ, इक्क मूसा तांइ, अते इक्क एलिय्याह तांइ। 5से बोल्लेया ही करदा थिया कि दिख्खो, इक्क चमकदे बदल ने तिन्हा जो ढक्की लेया, अते तिस बदल बिच का इक्क अवाज निकली, ए मेरा प्यारा पुत्तर है, जिस का मैं बड़ा खुस है: इसेरी सुणो। 6जां चेल्‍लेयां ने ए सूणेया तां से इतणे डरी गे कि से उन्दे मुँहा पेई गे। 7यीशु ने आई करी तिन्हा जो छुत्तेया, अते बोल्लेया, उठ, डर मत।

8तां तिन्हा ने अपणी हाख्खियां चुक्कियां अते तिन्हा यीशु जो छड्डी होर कुसकी जो नी दिख्खेया। 9जां से पहाड़ का थल्ले उतरदे थिये तां यीशु ने तिन्हा जो हुकम देई करी बोल्लेया, जां तांइ मणू रा पुत्तर, जे मैं ही है मरे रेयां बिच का जिन्दा नी होई जान्दा, तां तांइ जे किच्‍छ तुसा ने दिख्खेया से कुसकी कने मत बोलदे। 10फिरी तिन्हेरे चेल्‍लेयां ने तिन्हा का पूच्छेया, फिरी शास्त्रि किजो बोलदे कि एलिय्याह रा पैल्ले आणा जरुरी है? 11तिन्हा ने जवाब दित्तेया, एलिय्याह ने जरुर आणा, अते तिसने सब किच्‍छ सुधारणा। 12पर मैं तुसा जो बोलदा कि एलिय्याह आई गेया है, पर मणूआं ने तिसजो पछियाणेया नी, तिन्हा ने जिय्यां चाया तिय्यां ही तिसेरे कने कित्तेया इय्यां ही मणू रे पुत्तर, जे मैं ही है ने भी दुख चुक्कणे हिन।

13तां चेल्‍लेयां ने समजेया कि तिन्हा ने असा जो यूहन्ना बपतिस्मा दैणे वाला रे बारे बिच दस्सेया।

दुष्टात्मा का तंग मुडें जो ठीक करणा

14जां यीशु भीड़ का वापस आये तां इक्क मणू यीशु का आया अते जानू भारे बेई करी बोलणे लग्गेया, 15ओ प्रभु, मेरे पुत्तर पर दया करो! किजोकी इसजो मिर्गी आन्दी अते इसजो बड़ी तकलीफ हून्दी अते घड़ी-घड़ी आग्ग अते पाणी बिच पेई जान्दा। 16मैं तिसजो तुसा रे चेल्‍लेयां का लियाया थिया पर से तिसजो खरा नी करी सके। 17यीशु ने जवाब दित्तेया, अविश्वासी अते भटके रे मह्णणूओं! मैं कधाड़ी तांइ तुसा रे कने रैह्णा? कधाड़ी तांइ तुसा री रैह्णी? तिसजो मेरे का लियाओ।

18फिरी यीशु ने दुष्टात्मा जो झिड़केया अते से तिस बिच का निकली गई अते मुन्डा उसी ही बेल्ले खरा होई गेया। 19फिरी चेल्‍लेयां ने कल्ले बिच यीशु का आई करी पूच्छेया असा तिसजो किजो नी निकाली सके? 20यीशु ने उन्हा जो बोल्लेया, अपणे विश्वास री कमी री वजह कने, किजोकी मैं तुसा जो सच बोलदा, जे तुसा रा विश्वास इक्क सरेयाँ रे दाणे रे बराबर भी हो, तां इस पहाड़ जो बोलगे, इत्ते का घिरी करी उत्ते जा, अते तिन्ने घिरी जाणा तुसा रे तांइ किच्‍छ भी मुस्किल नी होणा। 21पर ए जाति बगैर प्रार्थना अते ब्रत्त रे नी निकलदी।

अपणे मरणे रे बारे बिच यीशु री दोबारा भविष्यवाणी

22जां से गलील बिच थिये, यीशु ने तिन्हा जो बोल्लेया, मणू रा पुत्तर, जे मैं ही है मणूआं रे हत्थां पकड़वाया जाणे वाला है। 23अते तिन्हा तिसजो मारी रखणा, पर तिसने तिज्जे रोज्जे जिंदे होई जाणा

ते इस गल्ल पर यीशु रे चेल्‍ले बड़े उदास होई गे।

मन्दिर रा कर लैणा

24जां से कफरनहूम कस्बे पूज्जे, तां मन्दिर री चुंगी लैणे वालेयां ने पतरस का आई करी पूच्छेया, कै तुसा रा गुरु मन्दिर री चुंगी नी दिन्दा? 25तिसने बोल्लेया, हाँ दिन्दे हिन जां से घरे आया, तां यीशु ने पैल्ले उस का पूच्छेया, ओ शमौन, तू कै सोचदा? दुनिया रे राज्जे कर या चुंगी कुसका लिन्दे हिन? अपणे बच्चेयां का या दूज्जेयां का।

26पतरस ने उन्हा जो बोल्लेया, दूज्जेयां का यीशु ने तिसजो बोल्लेया, तां बच्चे चुंगी दैणे का बची गे। 27पर असी उन्हा लोक्कां जो नराज ना करी दैण, इधेरे तांइ तू झील रे बन्ने पर जाई करी कंडा पा, अते जे मच्छी पैल्ले निकलगी, तिसजो लै अते तिसेरा मुँह् खोलण तिज्जो इक्क चाँन्दी सिक्का#17:27 इक्क चाँन्दी सिक्का चार दिन री धियाड़ी मिलणा, तिसजो लेई करी मेरे अते अपणे बदले तिन्हा जो देई देयां।

Markert nå:

मत्ती 17: CDHNT

Marker

Del

Sammenlign

Kopier