एजकेल 43
43
बिधाता आअ भबना लै भिई
1तेखअ निंयं हुंह तेऊ मणछै पुर्बा बाखे प्रऊल़ी सेटा, 2तिधी शुझुअ मुखा इहअ कि इज़राईले परमेशर बिधातो धुप्पअ आसा पुर्बा बाखा लागअ द। परमेशरो बोल शुण्हुंअ इहअ ज़ेही कि बडै दरैऊए पाणींए छ़ोआ का छ़ेल़ हआ। धरती दी शुझुअ फेर झ़ामण लागअ द।#एज. 10:3,4,18,19; 11:22,23; प्रका. 1:15 3धैनै-सुपनै ईंयां गल्ला शुझुई मुखा तेही ई ज़िहअ मुखा कबार दरैऊए बाढै शुझुअ त अर ज़धू मंऐं धैनै-सुपनै परमेशर एरुशलेम नगरीओ बनाश करदअ एछदअ भाल़अ त। हुंह फिरअ उंधै कुंगल़अ उटअ मूंड करी। 4पुर्बा बाखा प्रऊल़ी बाती डेऊअ सह बिधातो झ़ामण भबना भितरी खास पबित्र ज़ैगा लै।
5बिधाते आत्मां च़कअ हुंह उझै संघा निंयं हुंह भबने भितरा बाखे ताटी लै। तिधी शुझुअ मुखा कि सारै भबना का आसा परमेशरो झ़ामण लागअ द। 6सह मणछ त तिधी मुंह सेटा खल़्हुअ द, मुखा शुण्हुंअ इहअ कि भबना भितरा का आसा बिधाता मुंह संघै गल्ला करदअ लागअ द। 7बिधाता बोलअ मुल्है इहअ, “मणछा, इधी आसा मेरी राज़गाद्दी। मुंह रहणअ इधी आपणीं परज़ा इज़राईली संघै, इधा का करनअ मुंह तिन्नां प्रैंदै सदा राज़। तेखअ नां इज़राईली अर नां तिन्नें राज़ै कधि होरी देअआ पूज़ी करै मेरै पबित्र नाओंआं दी छ़ोत लाणीं। ऐहा ज़ैगा निं तिन्नां आपणैं राज़ेए ल्हासा दाबणी आथी। 8तिन्नें राज़ै च़िणां तै आपणैं मैहलै मेरै भबना संघै! तिन्नां अर मुंह मांझ़ै हआ ती सिधी एक भीत। तिन्नैं लाई च़िल़्हखरै काम करी मेरै पबित्र नाओंआं दी छ़ोत। तैही हुऐ तिंयां मेरै रोश्शा करै पठी खतम। 9ऐबै हुई तिन्नां मुल्है धोखअ करने छ़ाड़ पाणीं। ज़ुंण मेरी पबित्र ज़ैगा तिन्नैं आपणैं राज़ै दाबी समाधी आसा बणाईं दी, तिंयां बी हुई तिन्नां पोर्ही शोधणी। तै रहणअ हुंह तिन्नां संघै सदा।”
10आजू बोलअ बिधाता इहअ, “मणछा, इज़राईले आद-लुआदा का खोज़ भबनो नक्षअ अर इहअ बी कि सह किहअ बणाणअं। ताकि तिंयां आपणैं पापी कामां लै शर्मिंदै होए। 11तेखअ ज़ै तिंयां आपणैं पापी कामां करनै पिछ़ू शर्मिंदै होए, तेखअ खोज़ै तूह भबने बारै तिन्नां का पठी गल्ला। तिन्नां का खोज़ै तूह भबने आथरी उझै मडाथरू तैणीं सोभ कि तेते भितरी बागै एछणें प्रऊल़ी केही हणीं, भबन किहअ हणअ, भबना दी किहै रिती-रबाज़, सूल अर बिधी बधान हणैं। इना सोभी गल्ला दैऐ तूह तिन्नां लै लिखी करै ताकि तिंयां इना सोभी गल्ला आद डाहे अर राम्बल़अ इंतज़ाम करी सके। 12मेरै भबनो बधान हणअ इहअ कि धारे च़ुंडी फेर सारी ज़ैगा हणीं खास पबित्र। मनणा लै सोभी का खास बधान बी आसा अह ई।”
बेदी
13 #
लुआ. 27:1,2; 2 इति. 4:1 बेदीओ नाप त इहअ: हाथे नापे साबै ती बेदी फेर धरनीं एक नाल़ी सह ती एक हाथ बिरली, एक हाथ डुघी अर तेते डोर तै दोहरी बाखा एक बैथ बिरलै। 14थाल्लै प्रैंदै फेर च़ौकी थिई दूई हाथ उछ़टी, अर एथ त फेर एक हाथ बिरलअ खसकअ तेता प्रैंदै च़ौकी थिई च़ार हाथ उछ़टी अर एथ थिअ फेर दूई हाथ खसकअ। 15तेता प्रैंदै थिअ बेदी दी हूम करनैओ कूंड च़कोर च़ार हाथ उछ़टअ अर तेते च़ऊ कूणीं थिऐ उझै शींग लाऐ दै। 16प्रैंदा का थिई बेदी बारा हाथ लाम्मी अर बारा हाथ बिरली च़कोर।#एज. 27:1 17कूंडा हेठे च़ौकी बी थिई च़ौदा हाथ लाम्मी अर च़ौदा हाथ बिरली च़कोर। तेथ थिई डेढ बैथ बिरली काणस लाई दी। थाल्लै चोहा-मोहा लै नाल़ी ती पठी कोई डेढ हाथ बिरली। बेदी प्रैंदै डेऊणा लै थिऐ पुर्ब दिशा बाखा सुआण।
बेदीओ सूल
18 #
लुआ. 29:35-37
परमेशर बिधाता बोलअ मुल्है इहअ, “मणछा, बेदीए बारै डाहअ मंऐं इहअ सूल खोज़ी कि ज़ेभै बेदी च़िणी हेरनी, तेते प्रतिष्ठा लै काटै रिठ, तेतो लोधल़अ छ़ल़िकै बेदी दी अर तेऊ गाभू करै बेदी दी पठी हूम ज़ुंण तिधी बल़ीदान किअ। 19लेबी गोत्रा का सदोक प्रोहते आद-लुआद ई आसा ज़ुंण मेरी च़ाकरी लै मुंह नेल़ एछी सका। मंऐं परमेशर बिधाता डाहअ ताल्है इहअ हुकम करी कि तूह दैऐ तिन्नां लै एक बाछ़ू ताकि तिंयां तेता मुल्है आपणीं पाप माफी लै पाप बल़ीदान करे। 20तूह लेस्सै तेऊ बल़ीदानो लोधल़अ निंईं बेदीए च़ऊ शींगा दी अर मांझ़ली च़ौकी काणसा दी अर बेदीए च़ऊ कूणीं इहअ करै हणीं बेदी पबित्र। 21ज़ुंण बाछ़ू पाप माफी लै पाप बल़ी किअ, तेऊ बाछ़ू निंयैं तूह पबित्र ज़ैगा का बागै संघा पाऐ तेऊ भबना बागै तैहा ज़ैगा तेता पठी दहई ज़ुंण ज़ैगा तेता लै डाही दी आसा। 22दुजै धैल़ै आणै तूह एक बाकरअ ज़ेथ किछ़ै खोट निं होए। तेखअ करै तेता पाप माफी लै पाप बल़ीदान। तेते लोधल़ै करै बी करै बेदीए तेही ई शुधी ज़ेही तंऐं पैहलकै धैल़ै बाछ़ूए लोधल़ै करै बेदी शुची किई ती।
23“ज़ांऊं तूह बेदी पबित्र करी मुक्के, तेखअ आणै तूह हेल़्ही मांझ़ा का एक बाछ़ू अर एक गाभ ज़ेथ किछ़ै खोट निं होए। 24तिन्नां आणै तूह मुंह बिधाता लै, प्रोहता छ़ल़िकणअ तिन्नां दी लूंण अर तेखअ करनै तिंयां बेदी दी पठी हूम। 25साता धैल़ी तैणीं करै पापो प्राश्त करना लै एक बाकरअ, एक गाभ अर एक बाछ़ू पाप बल़ीदान। तिन्नां आणै हेल़्ही मांझ़ा का छ़ांटी करै ज़ेथ किछ़ै खोट निं होए। 26साता धैल़ी तैणीं करै प्रोहत पापो प्राश्त अर साता धैल़ी तैणीं रहै तिंयां इहै ई बेदीए शुधी करदै लागी। 27ज़ांऊं सात धैल़ी बिति जाणी, तेखअ लागणै प्रोहत लोगा लै हूम बल़ीदान, मेल़-ज़ोल़े बल़ीदान दैंदै। तेखअ हेरनै मुंह तम्हैं मनी। अह गल्ल डाही मंऐं परमेशर बिधाता बोली।”
Markert nå:
एजकेल 43: OSJ
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
This work is licensed under Creative Commons Attribution-ShareAlike 4.0 License.
