एजकेल 39
39
गोग राज़े हार
1परमेशर बिधाता बोलअ इहअ, “मणछा, गोगे बारै खोज़ मेरअ समाद ज़ुंण मेशक, तूबल, रोष नगरी प्रैंदै राज़ करनै आल़अ सैणअ आसा। तूह लअ तेऊ का खोज़ी कि हुंह आसा तेरअ दुशमण। 2मुंह दैणअ तेऊ लै फेरअ। मुंह आणनअ सह जुधा लै उतरा बाखा दूर देशा का इज़राईले धारा लै। 3तिधी शोटणअ मुंह तेऊओ खिंज़ै हाथै ढाकअ द कबाण अर खाणैं हाथा का तेऊए कतीर धरनीं। 4तिधी इज़राईले धारा पाणअ मुंह सह, तेऊए सैना अर तेऊए साथ दैणा लै तेऊ संघै आई दी होरी देशे सैना सोभ मारी। तिन्नें ल्हासा दैणीं मुंह शकारी च़ेल्लू, काअ-गरली अर बणें ज़ीबा खाणां लै। 5तिन्नें ल्हासा रहणीं सरली प्राल़ी ज़ैगा पल़ी। अह गल्ल डाही मंऐं परमेशर बिधाता बोली। 6मुंह शोटणी मागोग नगरी अर समुंदरे बाढै बस्सी दी निहंचै बस्सै दै लोगा लै सरगा का बीज। तेखअ लागणअ तिन्नां सोभी का थोघ कि हुंह आसा बिधाता।#आम. 1:10 7तेखअ लागणअ मेरी परज़ा इज़राईली का थोघ कि मेरअ नाअं आसा पबित्र। तेखअ निं मुंह तिन्नां का कधि आपणैं नाओंआं नकदरै करनै दैंदअ। तेखअ लागणअ देशा-देशे लोगा का थोघ कि हुंह आसा इज़राईलो पबित्र परमेशर बिधाता।”
8परमेशर बिधाता बोलअ इहअ, “ज़ुंण मंऐं बोलअ, तिंयां गल्ला निभणी ज़ाथी तेही ई। सह नसाफ करने धैल़ी एछणी ज़रूर ज़ुंण मंऐं खोज़ी डाही। 9इज़राईले सोभी नगरी का निखल़णैं लोग आपणीं नगरी बागै, तिन्नां झाल़णैं मारै पाऐ दै दुशमण सैने अस्त्र-शस्त्र संघा पाणै तिंयां आगी जैंदरी दहई। तिन्नां पाणीं होछ़ी-बडी ढाल़ा, कतीर-कबाण, काठे मुंगरी, बर्छ़ै झ़ुका दहई। तेते तिंयां झ़ुका हणीं तिन्नां लै साता साला तैणीं! 10तिन्नां अस्त्र-शस्त्रे झ़ुका हणीं तिन्नां लै एतरी कि तिन्नां निं एतरी साला बणां-बूटा का झ़ुका आणने ज़रुरत ई पल़णीं। ज़ुंणीं मेरी परज़ा लुटी ती, ऐबै लुटणैं मेरी परज़ा तिंयां ई। अह गल्ल डाही मंऐं परमेशर बिधाता बोली।”
राज़अ गोग दाबी डाहणअ
11बिधाता बोलअ इहअ, “ज़ेभै ईंयां गल्ला हणीं, राज़ै गोगा दाबणा लै दैणी मुंह इज़राईल देशै ‘मसाफरे गाडा’ ज़ैगा। तैहा ज़ैगा डाहणैं गोग अर तेऊए खास्सी सैना लाल समुंदरे पुर्बा बाखा दाबी। तैहा गाडा नाअं पल़णअ तेखअ, ‘गोगे सैनो खाग।’ 12इज़राईली लागणै तिन्नां दाबणा लै सात भिन्नैं, तैबै जाई हणीं इज़राईल देशे शुधी। 13देशे सोभ लोग लागणै तिन्नां दाबणे कामां। मेरी परज़ा डाहणीं अह धैल़ी सदा आद ज़हा धैल़ी मंऐं तिन्नां लै जुध ज़ितअ। तेखअ करनअ तिन्नां मेरअ अदर। अह गल्ल डाही मंऐं परमेशर बिधाता बोली। 14ज़ांऊं सात भिन्नैं हई जाणैं, इज़राईली छ़ांटणैं धख मणछ कि तिंयां तेऊ खागै सारै दी हांढ दैई भाल़े अर ज़ै किधी होर ल्हासा पल़ी दी भेटे, तिन्नां दाबी डाहे, ताकि तैहा सारी ज़ैगे पठ शुधी होए। 15तिन्नां मणछा भाल़णअ उंधै-उझै सारै दी हांढ दैई, ज़िधी तिन्नां मूंऐं दै मणछे हाडकै अर छ़िंझ़ भेटणैं, तिन्नां डाहणैं तिधी-तिधी नछ़ैण लाई ताकि ल्हासा दाबणै आल़ै तिन्नां हाडकै अर छ़िंझ़ा बी गोगे सैने खागै दाबी डाहे। 16इहअ करै करनी तिन्नां तैहा सारी ज़ैगे शुधी।” तैहा ज़ैगा नेल़ नगरी नाअं बी पल़अ तेता बाद हमोना#39:16 हमोना मतलब खास्सै लोग।
17 #
प्रका. 19:17,18 परमेशर बिधाता बोलअ इहअ, “मणछा, तूह खोज़ बणें ज़ीबा अर च़ेल्लू-पखीरू लै मेरअ समाद। तूह बोल तिन्नां लै, ‘सोभी देशा का झाल़्हिआ इधा लै संघा खाआ तिन्नां शिखा ज़ुंण मंऐं तम्हां बल़ी करी काटै। इज़राईले धारा आसा तम्हां लै बडअ भोज़, तिधी भेटणीं तम्हां खास्सी शिखा खाणां लै अर लोधल़अ झुटणा लै। 18इधी भेटणअ तम्हां शूरबीरो मास्स खाणां लै अर पृथूई दी राज़ करनै आल़ैओ लोहू झुटणा लै। तिंयां सोभ हणैं, भेडा, गाभ, छ़ेल्हू अर बाछ़ू ज़िहै काटै दै। ज़िहै तम्हैं बाशान मुल्खै खाआ। 19एऊ हूमा लै भेटणीं तम्हां रज्ज़ी च़र्बी खाणां लै अर रज्ज़ी लोहू झुटणा लै ज़ेभै तैणीं तम्हां रज्ज़ी घेरअ निं फिरे। 20इधी भेटणैं तम्हां भांती-भांतीए घोल़ै, तिन्नें शुंआर, शूरबीर, जोधै अर सपाहीओ मास्स रज्ज़ी खाणां लै।’” ईंयां गल्ला बोली परमेशर बिधाता।
इज़राईल देश बस्सणअ भिई
21बिधाता बोलअ इहअ, “मुंह रहैऊंणअ सोभी देशा का आपणअ प्रतप्प। तिन्नां भाल़णअ कि हुंह किहअ नसाफ करा। तेखअ लागणअ तिन्नां का थोघ कि अह गल्ल आसा मुखा कि मुंह तिन्नां लै केभै अर केही सज़ा दैणीं। 22तेभा पोर्ही लागणअ इज़राईली बी सदा लै थोघ कि तिन्नों मालक आसा हुंह बिधाता। 23होरी देशा का बी जाणअ थोघ लागी कि इज़राईले आद-लुआद रहै पाप करी मुंह बिधाता लै विश्वास घात करदै लागी। तैही हुअ हुंह खिरी तिन्नां का दूर अर तैही निंयैं तिंयां कैद करी परदेसा लै संघा रहै होरी देशे गलाम। तैही दैनअ त मंऐं तिन्नां तिन्नें दुशमणा का हारनै अर तिन्नें दुशमणै पाऐ तिंयां जुधा दी तलबारा करै मारी। 24इज़राईले आद-लुआद ती पाप करी पठ छ़ोतली हुई दी। तैही हुअ हुंह तिन्नां का दूर अर मंऐं किअ तिन्नें कदुष्ट कामां पिछ़ू तिन्नां संघै तिहअ ई बभार ज़ुंण तिन्नां संघै हुअ लोल़ी त।”
25परमेशर बिधाता बोलअ इहअ, “पर ऐबै करनी मुंह याकबे आद-लुआद इज़राईली लै झींण। तिंयां आणनैं मुंह गलामी का बापस काढी। तिन्नां लै दैणीं मुंह भिई खास्सी बर्गत। मेरअ दिल ज़ल़ा एता लै कि मेरअ पबित्र नाअं लोल़ी सदा रहअ। 26ज़ांऊं इज़राईली आपणैं देशे ज़ैगा निहंचै बस्सी जाणैं अर कहा दुशमणा एछणें किछ़ै डअर निं हणीं, तेखअ जाणैं तिंयां सुलै-सुलै तैहा गल्ला बिस्सरुई कि तिन्नां मुंह संघै विश्वास घात करी किहै शर्मिंदै पल़अ हणअ। 27ज़ेथ देशै-देशै तिंयां तिन्नें दुशमणै निंयैं तै तिंयां आणनैं मुंह तेता का बापस तिन्नें आपणैं देशे ज़ैगा लै। सोभी देशा भाल़णअ कि मंऐं किज़ै किअ अर इहअ करै लागणअ तिन्नां देशा का बी थोघ कि हुंह आसा पबित्र। 28मेरी परज़ा इज़राईली बी जाणअ तेखअ थोघ लागी कि हुंह आसा तिन्नों परमेशर बिधाता। तिन्नां का लागणअ इहअ करै थोघ कि मंऐं छ़ाडै तिंयां होरी देशे गलामी दी, तेखअ झाल़ै ऐबै मंऐं तिंयां भिई संघा पजैल़ै तिन्नें आपणैं देशे ज़ैगा बापस। तिन्नां मांझ़ै निं मंऐं एक बी पिछ़ू शोटी डाहअ। 29ऐबै निं मुंह तिन्नां का कधि दूर हणअ। मुंह दैणीं आपणीं आत्मां आपणीं परज़ा इज़राईली लै। अह गल्ल डाही मंऐं परमेशर बिधाता बोली।”
Markert nå:
एजकेल 39: OSJ
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
This work is licensed under Creative Commons Attribution-ShareAlike 4.0 License.
