Ore i mexü̃ ga Márcu ümatüxü̃ 8

Ngechuchu nanachibüexẽxẽ ga 4,000 ga duü̃xü̃gü

(Mt. 15.32-39)

1Wüxi ga ngunexü̃gu wenaxarü naxca̱x naxĩtaque̱xe ga muxü̃ma ga duü̃xü̃gü, rü nüxü̃́ nataxuma ga norü õnagü. Rü Ngechuchu rü norü ngúexü̃güca̱x naca, rü ñanagürü nüxü̃:

2—Choxü̃́ nangechaü̃tümüxü̃gü i ñaa duü̃xü̃gü, erü marü tomaepü̱x i ngunexü̃ nua chauxü̃tawa nangẽxmagü, rü nataxuma i nawemü i nangõ̱xgüxü̃.

3Rü ngẽxguma chi ngẽmaãcümare íchayamugügu, rü chi ngürüãchi namagu tá nayaturae, erü nümaxü̃gü rü yáxü̃wama ne naxĩ —ñanagürü.

4Rü norü ngúexü̃gü rü nanangãxü̃gü, rü ñanagürügü: —¿Natürü ñuxãcü tá tanachibüexẽxẽ i núma i ngextá taxúema íxãpataxü̃wa? —ñanagürügü.

5Rü Ngechuchu nüxna naca, rü ñanagürü: —¿Ñuxre i paũ pexü̃́ nangẽxma i pemax? —ñanagürü. Rü nümagü nanangãxü̃gü, rü ñanagürügü: —Toxü̃́ nangẽxma i 7 i paũ —ñanagürügü.

6Rü ñu̱xũchi ga Ngechuchu rü duü̃xü̃güxü̃ namu nax ñaxtüanewa natogüxü̃ca̱x. Rü nanade ga yema 7 ga paũ, rü Tupanana moxẽ naxã. Rü ñu̱xũchi inanabücu, rü norü ngúexü̃güna nanana. Rü nümagü rü duü̃xü̃güxü̃ nayanu.

7Rü nüxü̃́ nayexma ta ga ñuxre ga choxnixacügü. Rü Ngechuchu rü Tupanana moxẽ naxã, rü ñu̱xũchi norü ngúexü̃güxü̃ namu nax iyanuãxü̃ca̱x.

8Rü guxü̃ma ga yema duü̃xü̃gü rü meama nachibüe ñu̱xmata mea nüxü̃́ yangu. Rü 7 ga pexchi nanapagü namaxã ga yema natüchigü ga íyaxügüxü̃.

9Rü yema duü̃xü̃gü ga yéma chibüexü̃ rü wixgutaa̱x 4,000 nixĩ. Rü yemawena ga Ngechuchu rü duü̃xü̃güxü̃ ínimugü.

10Rü ñu̱xũchi wüxi ga nguegu nixüe namaxã ga norü ngúexü̃gü, rü Damanútaanewa naxũ.

Parichéugü naxca̱x ínacagü ga wüxi ga cua̱xruxü̃ ga Tupanaarü poramaxã üxü̃

(Mt. 16.1-4; Lc. 12.54-56)

11Rü Ngechuchuxü̃tawa nangugü ga Parichéugü, rü inanaxügüe ga nax namaxã yaporagatanücüüxü̃. Rü nüxna nacagüe nax nüxü̃ nüxü̃ nadauxẽẽxü̃ca̱x ga wüxi ga cua̱xruxü̃ ga Tupanaarü poramaxã naxüxü̃, nax yemaacü nüxü̃ naxügüxü̃ca̱x, rü nüxü̃ nacua̱xgüxü̃ca̱x rü aixcüma Tupana Nane yixĩxü̃.

12Rü Ngechuchu rü poraãcü yáxna narüngü, rü ñanagürü: —¿Tü̱xcüü̃ i ñaa duü̃xü̃gü naxca̱x ínacagü i wüxi i cua̱xruxü̃ i Tupanaarü poramaxã üxü̃? Rü aixcüma pemaxã nüxü̃ chixu rü bai i wüxi i cua̱xruxü̃ tá nüxü̃ chawe̱x —ñanagürü.

13Rü yema ñaxguwena, rü nüxna yéma nixũ ga yema duü̃xü̃gü. Rü wenaxarü nguegu nixüe rü naxtaxaarü tocutüwa naxũ.

Parichéuarü paũarü pu̱xẽẽruxü̃chiga

(Mt. 16.5-12)

14Natürü ga norü ngúexü̃gü rü nüxü̃ inayarüngümae ga norü õna nax íyangegüxü̃, rü wüxixicatama ga paũ nüxü̃́ nayexma ga nguewa.

15Rü yexguma ga Ngechuchu rü nayaxucu̱xẽgü, rü ñanagürü nüxü̃: —¡Dücax, pexuãxẽ naxca̱x i Parichéugüarü rü Eródearü paũarü pu̱xẽxẽruxü̃! —ñanagürü.

16Rü yema norü ngúexü̃gü rü inanaxügüe nax nügümaxã ñagüxü̃: —Ngẽma ñanagürü tüxü̃ erü tama paũ ta ítingegü —ñanagürügü.

17Natürü ga Ngechuchu rü nüxü̃ nacua̱xama nax yema ñagüxü̃, rü yemaca̱x ñanagürü nüxü̃: —¿Tü̱xcüü̃ “Tangearü paũã̱x”, ñaperügügü? ¿Ẽ̱xna ñu̱xma rü ta tama nüxü̃ pecua̱xgü rü tama nüxü̃ picua̱xãchitanü nax ta̱xacüchiga yixĩxü̃ i ngẽma nüxü̃ chixuxü̃? ¿Ẽ̱xna pexca̱x naxẽxü̃gu i ngẽma?

18Pema rü pexãxẽtügüchire̱x, ¿rü ñuxãcü i tama nüxü̃ pedauxü̃? Rü pexãxmachi̱xẽgüchire̱x, ¿rü ñuxãcü i tama nüxü̃ pexĩnüexü̃? ¿Ẽ̱xna tama nüxna pecua̱xãchie ga yexguma chayamuẽxẽgu ga yema paũ rü choxni?

19Rü yexguma yema 5,000 ga duü̃xü̃gü ga iyatüxü̃xü̃ chayanuxgu ga yema wüxime̱e̱xpü̱x ga paũ, ¿rü ñuxre ga pexchigü yixĩxü̃ ga napagücü ga yexguma penadexgu ga yema íyaxügüxü̃? —ñanagürü. Rü nümagü nanangãxü̃gü rü ñanagürügü: —12 ga pexchigü —ñanagürügü.

20Rü ñu̱xũchi ñanagürü ta ga Ngechuchu: —Rü yexguma yema 4,000 ga duü̃xü̃güxü̃ chayanuxgu ga yema 7 ga paũ, ¿rü ñuxre ga pexchigü yixĩxü̃ ga napagücü ga yexguma penadexgu ga yema íyaxügüxü̃? —ñanagürü. Rü nanangãxü̃gü rü ñanagürügü: —7 ga pexchigü —ñanagürügü.

21Rü yexguma rü ñanagürü nüxü̃: —¿Rü ñu̱xma rü ta taxũtáma nüxü̃ pecua̱xgüégaxü̃? —ñanagürü.

Ngechuchu rü Bechaídawa nanamexẽxẽ ga wüxi ga ngexetücü

22Rü yemawena rü Bechaídaarü ĩanewa nangugü. Rü yéma Ngechuchuxü̃tawa nanagagü ga wüxi ga ngexetücü. Rü nüxü̃ naca̱a̱xü̃gü nax nüxü̃ yangõgüxü̃ca̱x.

23Rü Ngechuchu rü gumá ngexetücüme̱xẽgu nayayauxãchi, rü ĩanearü yéamaxü̃ra nanaga. Rü yéma naxbü̱xágümaxã nayawaixetüxẽxẽ, rü ñu̱xũchi naxetügu ningõgü, rü nüxna naca rü marü ta̱xacüxü̃ nadau.

24Rü yexguma ga gumá ngexetücü rü inanaxügü ga nax yadauchixü̃. Rü ñanagürü: —Nüxü̃ chadau i duü̃xü̃gü i ñoma naigü ixĩxü̃nerüxü̃ ixĩgüxü̃ —ñanagürü.

25Rü yexguma ga Ngechuchu rü wenaxarü naxetügu ningõgü. Rü nüma ga gumá yatü rü meama inadawenü. Rü naxca̱x nitaane rü meama naxca̱x nango̱x ga guxü̃ma.

26Rü yemawena ga Ngechuchu rü napatawa nanamu. Rü namaxã nüxü̃ nixu nax tama ĩaneca̱x nataeguxü̃.

Pedru nüxü̃ nixu nax Cristu yixĩxü̃ ya Ngechuchu

(Mt. 16.13-20; Lc. 9.18-21)

27Rü yemawena rü Checharéa ga Pirípuanewa yexmane ga ĩanexacügüwa naxũ ga Ngechuchu namaxã ga norü ngúexü̃gü. Rü namawa rü Ngechuchu rü norü ngúexü̃güna naca, rü ñanagürü nüxü̃: —¿Ñuxũ ñagüxü̃ i duü̃xü̃gü i chauchiga nax texé chixĩxü̃ i chomax? —ñanagürü.

28Rü norü ngúexü̃gü nanangãxü̃gü rü ñanagürügü: —Nangexma i duü̃xü̃gü rü: “Cuáü̃ ya báiü̃xẽẽruxü̃ quixĩ”, ñagüxü̃, rü togü i: “Ería quixĩ”, ñagüxü̃, rü togü rü: “Wüxi ga nũxcümaü̃cü ga Tupanaarü orearü uruxü̃ quixĩ”, ñagüxü̃ —ñanagürügü.

29Rü nüma ga Ngechuchu rü nüxna naca rü ñanagürü: —¿Rü pema i ñuxũ ñapegügüxü̃ choxü̃ nax texé chixĩxü̃? —ñanagürü. Rü Pedru nanangãxü̃ rü ñanagürü: —Cuma nixĩ i Cristu quixĩxü̃ —ñanagürü.

30Rü yexguma ga Ngechuchu rü norü ngúexü̃güxü̃ namu nax taxúemaama nüxü̃ yaxugüexü̃ca̱x ga yema ore ga nachiga.

Ngechuchu nanaxunagü ga norü yuchiga

(Mt. 16.21-28; Lc. 9.22-27)

31Rü yemawena rü Ngechuchu inanaxügü ga norü ngúexü̃gümaxã nüxü̃ nax yaxuxü̃ ga ta̱xacü tá nüxü̃ nax üpetüxü̃. Rü ñanagürü nüxü̃: —Yimá Tupana Nane nax duü̃xü̃xü̃ ixĩcü, rü poraãcü ngúxü̃ tá ninge. Rü tá nüxü̃ naxoe i Yudíugüarü ãẽ̱xgacügü, rü chacherdótegüarü ãẽ̱xgacügü, rü ngẽma ngúexẽẽruü̃gü i Moichéarü mugüwa ngu̱xẽẽtaegüxü̃. Rü tá nayama̱xgü, natürü tomaepü̱x i ngunexü̃gu rü wena táxarü namaxü̃ —ñanagürü.

32Rü yema ore rü meama namaxã nanango̱xẽxẽ. Natürü ga Pedru rü nüxica noxrüwama Ngechuchuxü̃ naga, rü inanaxügü nax naxucu̱xẽãxü̃ nax tama yemaacü yadexaxü̃ca̱x.

33Natürü ga Ngechuchu rü nadauegu, rü norü ngúexü̃güxü̃ nadawenü. Rü Pedruxü̃ nanga, rü ñanagürü: —¡Choxna ixũgachi, Pa Chatanáx! Cuma rü tama Tupana nagu rüxĩnüxü̃gu curüxĩnü, rü yatügü nagu rüxĩnüxü̃gumare curüxĩnü —ñanagürü.

34Rü yexguma ga Ngechuchu rü norü ngúexü̃güca̱x rü duü̃xü̃güca̱x naca. Rü ñanagürü nüxü̃: —Rü ngẽxguma texé chowe rüxũxchaü̃gu, ¡ẽcü nüxü̃ tarüxo i tümaarü ngúchaü̃, rü namaxã tapora i ngẽma guxchaxü̃gü i tümaca̱x ínguxü̃, rü ngẽmaétüwa chowe tarüxũ!

35Erü yíxema tama cha̱u̱xca̱x inaxãxẽ i tümaarü maxü̃ rü tá itanatauxẽxẽ. Natürü yíxema chaugagu rü ore i mexü̃gagu yuxe, rü tá tanayaxu i maxü̃ i taguma gúxü̃.

36¿Rü ta̱xacüwa nüxü̃́ namexü̃ ya yatü ega ngẽxguma nayauxãgu i guxü̃ma i ñoma i naanearü ngẽmaxü̃gü, natürü norü maxü̃ iyanatauxẽẽgu?

37Rü ngẽxgumarüxü̃ ta, ¿rü ñuxre i diẽru iyangu nax ngẽmamaxã naxca̱x nataxexü̃ca̱x i norü maxü̃ i wüxi ya yatü?

38Rü ngẽxguma texé i ñaa duü̃xü̃gü i pecaduã̱xgüxü̃ i tama yaxõgüxü̃pe̱xewa cha̱u̱xca̱x ãnegu rü naxca̱x taxãneegu i chorü ore, rü choma ya Tupana Nane nax duü̃xü̃xü̃ chixĩxü̃ rü tá ta tümaca̱x chaxãne i ngẽxguma Chaunatüarü poramaxã rü norü orearü ngeruü̃gü i daxũcüã̱x i üünegüxü̃maxã wenaxarü núma chaxũxgu —ñanagürü.

Markert nå:

Ore i mexü̃ ga Márcu ümatüxü̃ 8: tcaP

Marker

Kopier

Sammenlign

Del