मरकुस 2
2
लकवे रे रोगिये जो चंगा करना
(मत्ती 9:1-8; लूका 5:17-26)
1किछ दिनां ते बाद, ताहली जे फेरी यीशु कफरनहूम नगरा च आया, लोकें ये खबर इकदम फैलाईती भई यीशु घरें आ। 2फेरी इतणे लोक कट्ठे हुईगे भई दरवाजे ते बाहर बी जगह नीं थी; कने सै तिन्हांजो परमेशरा रा वचन सुणाया राँ था। 3कने ताहली जे यीशु परमेशरा रा बचन सुणाया राँ था तिस वगत किछ लोक इक लकवे रे रोगिये जो पाल़किया पर चार माहणुआं ते चकाईने तिस लौ ली आये। 4पर ताहली जे सै भीड़ा रिया बजह ने यीशुये रे नेड़े नीं ल्याई सक्के, तां तिन्हें तिस छत्ता जो पट्टया तिसरे थल्ले जे यीशु था; कने तंजे तिसाजो पट्टी चुक्के, तां तिसा पाल़किया जो तिस पर जे सै लकवे रा रोगी पैईरा था, थल्ले यीशुये रे सामणे त्वारीत्या। 5ताहली जे यीशुये ये जाणया भई सै तिस पर विश्वास करां ये, तिस लकवे रे रोगिये जो गलाया, “बेटा, हऊँ तेरे पापां जो माफ करां।” 6फेरी किछ यहूदी शास्त्री सै जे तिस घरा च बैठिरे थे, जो किछ यीशुये बोल्या तिसरे बारे च सै अपणे-अपणे मना च सोचणे लगे, 7“इस माहणुये जो येढ़ा नीं बोलणा चाहिन्दा? येत परमेशरा री निंध्या कराँ! परमेशरा ते इलावा होर कोई पाप माफ नीं करी सकदा!”#2:7 यशा. 43:25 8यीशुये इकदम जाणील्या, भई सै अपणे-अपणे मना च येढ़ा बचार करया रायें, कने तिन्हांजो बोल्या, “तुहांजो येढ़ा नीं सोचणा चाहिन्दा। 9यीशुये यहूदी शास्त्रियां ने बोल्या लकवे रे रोगिये जो ये बोलणा मुश्कल नींआ भई ‘तेरे पाप माफ हुये,’ काँह्भई कोई इसजो साबित नीं करी सकदा। पर कोई तिसजो बोल्ली नीं सकदा, भई ‘उट्ठ अपणिया पाल़किया चक कने चलने फिरने लगी जा’ जे हकीकत च तिसले ठीक करने री सामर्थ नीं। 10पर इस खातर भई तुहांजो ये पता लगी जाओ भई मिन्जो यनि माहणुये रे पुत्रा जो धरतिया पर पाप माफ करने रा बी अधिकार आ।” यीशुये तिस लकवे रे रोगिये जो गलाया, 11“हऊँ तेरने बोलां, उट्ठ, अपणिया पाल़किया चक्कीने अपणे घरा जो चली जा।” 12इकदम इ सै माहणु उट्ठया, अपणी पाल़की चक्की कने सब्बीं लोकां रे सामणे ते निकल़ीने चलिग्या; सारे लोक सै जे तिस्सो देक्खी रां थे, हैरान रैईगै कने सै सारे ये बोल्लीने परमेशरा री बडयाई करने लगे भई “अहें येढ़ा कदीं मनी देख्या।”
लेविये रा सद्दया जाणा
(मत्ती 9:9-13; लूका 5:27-32)
13यीशु इक बार भीं कफरनहूम नगरा ते गलील दरयावा रे कनारे गया। बौहत सारे लोक तिसले आए, कने सै तिन्हांजो परमेशरा रा सन्देश देणे लगया। 14ताहली जे यीशु जाया रां था, फेरी तिने हलफई रे पुत्र लेविये जो चुंगी लेणे औल़े नाक्के पर बैठिरा देख्या, कने तिसने बोल्या, “मेरे सौगी औ, इस खातर सै उट्ठया कने तिसने चलीप्या।”
15किछ दिनां ते बाद यीशु कने तिसरे चेले लेविये रे घरें राति जो रोटी खाया रां थे। बौहत सारे चुंगी लेणे औल़े कने तिन्हांजो जे लोक पापी मन्नां थे तिन्हां सौगी रोटी खाणे बैट्ठे; काँह्भई सै बौहत सारे थे, कने यीशुये सौगी हरेक जगह जाया कराँ थे। 16किछ यहूदी शास्त्री सै जे फरीसी बी थे तिन्हें ये देखीने भई सै त पापियां कने चुंगी लेणे औल़यां ने सौगी रोटी खाईराँ, इस खातर तिन्हें यीशुये रे चेलयां जो बोल्या, “सै त पापियां कने चुंगी लेणे औल़यां ने सौगी खां-पीआं!” 17यीशुये ये सुणीने तिन्हांने गलाया, “भले चंगयां जो डाक्टरा री जरूरत नीं, पर बमाराँ जोई। हऊँ तिन्हां लोकां जो सदणे खातर नीं आईरा सै जे अप्पूँजो धर्मी समझां ये, पर तिन्हांजो सै जे जाणां ये भई सै पापी ये।”
उपवासा रा स्वाल
(मत्ती 9:14-17; लूका 5:33-39)
18यूहन्ना रे चेले, कने फरीसी उपवास कराँ थे। इस खातर किछ लोकें आईने यीशुये ते पुच्छया, “यूहन्ना रे चेले, कने फरीसियां रे चेले उपवास रक्खां ये, पर तेरे चेले काँह नीं रखदे?” 19यीशुये तिन्हांजो जबाब दित्या, “तदुआं तकौ जे हऊँ अपणे चेलेयां सौगी आ, सै उपवास कियां करी सक्कां ये? सै नीं करी सकदे, काँह्भई सै खुश ये, ठीक तियां इ जियां लाड़े रे मित्र तिस सौगी तिसरे ब्याह री खुशी मनाँ ए। 20पर सै दिन औणे तंजे लाड़ा तिन्हांते लग करना; तिस बगत तिन्हां भुख्यां रैईने उपवास रखणे। 21जे मेरिया शिक्षा जो पुराणे रीति-रिवाजां सौगी मलाया जांगा, तां ये येढ़ा हूणा तियां जे इक पुराणे कपड़े पर नये कपड़े री टल्ही जोड़ना। नई टल्ही सुकड़ी जाणी कने कपड़ा फटी जाणा। मेरी शिक्षाएं इस कपड़े साई बेकार हुई जाणियां। 22नौंये अंगूरां रे रसा जो पुराणियां मशकां#2:22 चमड़े रिया थैलिया च कोई नीं रखदा, नैत अंगूरां रे रसा सै फाड़ी देणियां, कने अंगूरां रा रस कने मशकां दुईं नाश हुई जाणा; पर नौंये अंगूरां रे रसा जो नौंईयां मशकां ची भराँ ये।”
विस्रामा रा प्रभु
(मत्ती 12:1-8; लूका 6:1-5)
23येढ़ा हुआ भई यीशु कने तिसरे चेले विस्रामा रे दिन कणका रे खेतां बिच्चियें जाई कराँ थे, कने तिसरे चेले चलदे-चलदे कणका रे सिल्लुआं जो खाणे रे खातर तोड़ने लगे। 24तां फरीसियें यीशुये ने गलाया, “देख; तेरे चेले विस्रामा रे दिन येढ़ा काम्म काँह कराँ ये सै जे मूसा रिया व्यवस्था रे मुतावक ठीक निआं?” 25यीशुये तिन्हांजो जबाब दित्या, “क्या तुहें पवित्रशास्त्रा च ये कदीं मनी पढ़या भई तंजे अहांरे महान पूरवज दाऊद जो जरूरत पई, कने ताहली जे तिस्सो कने तिसरे साथियां जो भूक्ख लगी, तां तिने क्या कित्या था? 26तिने कियां अबियातार महायाजक रे बगत, परमेशरा रे घरा च जाईने, भेंट चढ़ाई रियां रोटियां खाद्दि, इन्हौं खाणे रा अधिकार याजकां ते इलावा किसी जो बी नीं था, कने अपणयां साथियां जो बी दितियां।” 27तां यीशुये तिन्हांजो गलाया, “परमेशरे विस्राम रा दिन लोकां री सहुलियता रे खातर बणाया, पर तिने लोकां जो विस्राम दिना खातर नीं बणाईरा। 28इस खातर हऊँ यनि माहणुये रा पुत्र विस्राम रे दिना रा बी स्वामी आ।”
Markert nå:
मरकुस 2: KFSNT
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
This work is licensed under Creative Commons Attribution-ShareAlike 4.0 License.
