रोमी 6
6
पाप लब्मै सिल् त्हुम्, येशूने घ्रि तब्मैंइ छ्ह योंम्
1छतसि ङ्योइ तो बिले? परमेश्वरए दयाम्हाँया झन् ल्हें योंरिगे बिसि ङ्यो झन् पापन् लरिब् आ? 2कत्ति आङिं! छ लब आत। पापए लेखि ङ्यो सिल् खाँइ, छतसि ङ्यो अझै पापन् लरिब् आ? 3क्युर प्ल्हुँसि बप्तिस्मा किंबै मतलब क्हेमैंइ म्लेयाइ वा? येशू ख्रीष्टए मिंर ङ्योइ बप्तिस्मा किंमा प्रभुने बालुन् सिब् ग बिब क्हेमैंइ सेइमुँ। 4छतसि ङ्योइ बप्तिस्मा किंमा येशूने बालुन् सिसि पाइ, धै थेबै शक्ति मुँबै परमेश्वर आबाजी येशू ख्रीष्टलाइ सिबउँइँले धबै सोगों लमिंइ, छतसि ङ्योइ ओंसों लब् धोंबै आछ्याँबै केमैं पिसि छ्याँबै केमैं लल् त्हुम्।#कल २:१२
5येशू सिमिंबइले ङ्यो या खीनेन् घ्रिन् तइमुँ बिस्याँ, येशू धबै सोगों तब् धोंले ङ्यो या धबै सोगों तब्मुँ। 6ङ्योइ पाप आलरिगे धै ङ्यो पापए न्होंर आटिरिगे बिसि परमेश्वरजी ङ्योए ओंसोंबै छ्ह येशू ख्रीष्टने बालु क्रूसर च्योवाइमुँ बिब ङ्योइ सेइमुँ। 7तलेबिस्याँ सियाल् खाँबै म्हिइ पाप आल। 8ङ्यो ख्रीष्टने बालुन् सिइमुँ बिस्याँ, खीने बालुन् सोब्मुँ बिसि ङ्योइ बिश्वास लम्। 9तलेबिस्याँ ख्रीष्ट सिसेया धबै सोगों तइमुँ, तारे खी खोंयोंइ आसि, खीलाइ कालइ तोइ लल् आखाँ बिसि ङ्योइ सेइमुँ। 10पाप नास लवाबै ल्हागिर ख्रीष्ट तिला सिमिंइ, दिलेया ख्रीष्ट धबै सोसि परमेश्वरए सैंर मैंब् धोंबै के लसिन् टिरिइमुँ। 11च धोंलेन् क्हेमैंज्यै या ह्रों-ह्रोंसलाइ पापए लेखि सिसि परमेश्वरए मान लबै ल्हागिर ख्रीष्टने बालुन् सोरिइमुँ बिसि मैंल् त्हुम्।
12छतसि पाप लबै सैं आखरिगे बिसि क्हेमैंए सिल् त्हुबै ज्युर पाप लल् आपिंन्। 13छलेन ह्रोंसए ज्युर्बै भागमैंलाइ पाप केमैं लबर आल्हैदिद्। बरु सिबइले धबै सोगों तबै म्हि धोंले छ्याँबै के लबै ल्हागिर ह्रोंसलाइन परमेश्वरए योर पिंवाँन्। 14तारे क्हेमैंए फिर पापइ तोइ लल् खाँरिब् आरे, तलेबिस्याँ क्हेमैं ठिमए न्होंर आरे, परमेश्वरए दयाम्हाँयाए न्होंर मुँ।
पाप लब् पिसि परमेश्वरए के लब
15तारे तो बिले? ङ्यो ठिमए न्होंर आरे, दयाम्हाँया न्होंर मुँ बिसि पाप लब् वा? आङिं, लल् आत! 16क्हेमैंइ ह्रोंसलाइ खाबै योर पिंवाँमुँ? चए केब्छैंन् क्हेमैं तल् त्हुम्। पापए केब्छैं तसि चइ बिब ङिंइ बिस्याँ क्हि सिल् त्हुब्मुँ, दिलेया परमेश्वरजी बिब ङिंइ बिस्याँ खीए उँइँर क्हेमैं ठिक ठर्दिब्मुँ। 17ओंसों क्हेमैं पापए केब्छैं मुँल, दिलेया तोगो क्हेमैंए सैं न्होंउँइँले परमेश्वरजी बिबै ताँ ङिंब्मैं तइमुँ। छतसि परमेश्वरलाइ धन्यबाद तरिगे। 18क्हेमैं पाप के लब् पिसि परमेश्वरए के लब्मैं तइमुँ। 19क्हेमैंइ क्होल् आखाँ उ बिसि ङइ क्होल्ले बिरिइमुँ। ओंसों क्हेमैंइ खैले ह्रोंसए यो प्हलेलाइ पापर च्होवाबै आछ्याँबै केमैं लल् पिंल। छलेन तारे पापर आच्होरिगे बिसि ह्रोंसए यो प्हले परमेश्वरए के लबै ल्हागिर पिंवाँन्।
20ओंसों क्हेमैं पापए न्होंर टिमा परमेश्वरए उँइँरि ठिक तबै के लल् आत्हुमल। 21ओंसों लबै आछ्याँबै केमैं मैंसि क्हेमैं तिंजोरो फापिम्। च केमैं लसि क्हेमैंइ तो योंइ? च केमैं लइरिम् क्हेमैं सिल् त्हुम्। 22दिलेया तारे क्हेमैं पापउँइँले फ्रेसि परमेश्वरए के लबै म्हिमैं तइमुँ। छतसि तारे क्हेमैंने तल् त्हुबै रो छ्याब् आरेबै छ्ह ग। छले क्हेमैंइ खोंयोंइ आखाँबै छ्ह योंम्। 23तलेबिस्याँ पाप लब्मैंइ योंबै नों सिब ग! दिलेया परमेश्वरजी छलेन् पिंबै दान ङ्योए प्रभु येशू ख्रीष्टउँइँले खोंयोंइ आखाँबै छ्ह योंब् ग।
Markert nå:
रोमी 6: GCMB
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2020, Wycliffe Bible Translators, Inc. All rights reserved.
