रोमी 12
12
परमेश्वरए सेवा लबै तरिका
1छतसि ओ ङइ खोबै अलि-अङाँमैं, परमेश्वरजी ङ्योए फिर च्हौ थेबै ल्हयो लबइले ङ क्हेमैंने यो छ्युँ लमुँ: सोगों ख्रो धोंले ह्रों-ह्रोंसए ज्यु परमेश्वरलाइ पिंन्। छाबै ख्रो पबित्र नेरो परमेश्वरलाइ सैं तोंन् लबै क्ह्रोंसेंन्बै सेवा ग। 2चु ह्युलर्बै म्हिमैंइ लब् धोंबै आछ्याँबै केमैं क्हेमैंइ आलद्, बरु ह्रोंसए सैंर छारा तसि सैं न्होंउँइँले ओंनों छ्याँब तद्। छ तस्याँ मत्त्रे क्हेमैंइ परमेश्वरए इच्छा तो मुँ बिसि था सेल् खाँम्, अथवा तो सै स्वाब मुँ, तो सैइ परमेश्वरए सैं तोंन् लमना, तो सै छ्याँब मुँन बिसि क्हेमैंइ सेब्मुँ।
3परमेश्वरजी ङलाइ खीए दयाम्हाँया पिंबइले ङइ क्हेमैं ताँनने यो छ्युँ लमुँ: ह्रोंसलाइ थेब आमैंन्, परमेश्वरजी क्हिलाइ पिंबै बिश्वास अनुसार ह्रोंस खैतब् मुँ छाबन् मैंन्। 4तलेबिस्याँ नमुना घ्रि बिले: ङ्योए ज्युर ल्हें भागमैं मुँ, दिलेया ताँन् भागइ स्यो स्योबै केमैं लम्। 5छलेन ङ्यो ल्हेंन् मुँनबिलेया येशूए फिर बिश्वास लसेरो खीने घ्रिन् तसि ज्यु घ्रिन् ग। झाइले ङ्यो ताँन् ज्यु घ्रिर्बै स्यो स्योबै भाग तसि घ्रि घ्रिने गैंदिइमुँ।#१ कोर १२:१२ 6छतसि परमेश्वरजी खीए दयाजी ङ्योलाइ पिंबै स्यो स्योबै बरदानमैं अनुसार के लले। अगमबाणि पोंबै बरदान क्हिलाइ पिंइबिस्याँ ह्रोंसइ येशू ख्रीष्टए फिर लबै बिश्वास अनुसार अरूने पोंन्। 7अरूए सेवा लबै बरदान पिंइबिस्याँ सेवा लद्। झाइले अर्थ खोल्दिबै बरदान क्हिलाइ पिंइबिस्याँ अर्थ खोल्दिद्। 8ठिक घ्याँर प्रबर लोमिंबै बरदान पिंइबिस्याँ अरूमैंलाइ लोमिंन्। पिंबै बरदान पिंइबिस्याँ अरूए खाँचोर सैं प्ल्हसि पिंन्। चिब तबै बरदान पिंइबिस्याँ ढुक्कले चिबइ लल् त्हुबै के लद्। ल्हयो खबै बरदान पिंइबिस्याँ सैं तोंन्ले ल्होद्।#१ कोर १२:४-११
9क्हेमैंइ फिब्लो पार्दिबै म्हाँया आलद्, क्ह्रोंसेंन्लेन् सैं न्होंउँइँलेन् म्हाँया लद्। आछ्याँबै केमैं पिवासि छ्याँबै केमैं लरिद्। 10ह्रोंसए तेमैंने धोंले घ्रिइ घ्रिने क्ह्रोंसेंन्बै म्हाँया लदु। अरूलाइ सैं न्होंउँइँले ओंनों मान लद्। 11प्ल्हेउ आतल्ले लल् त्हुबै केमैं लद्। सैं न्होंउँइँले आनारल्ले परमेश्वरए सेवा लद्। 12क्हेमैंइ थेंबै आशार सैं तोंन्ले टिरिद्। दुःख तमा सैं भोंब लद्। झाइले खोंयोंन् बिलै प्राथना लरिद्। 13बिश्वासीमैंए खाँचोर ल्होद्, ह्रोंसए धिंर खबै प्ह्रेंमैंलाइ बास पिंसि छेनाले चब् थुँब् पिंन्।
14छलेन क्हेमैंए फिर दुःख पिंब्मैंलाइ सराप आपिंन्, बरु चमैंए ल्हागिर परमेश्वरने आशिक ह्रिमिंन्।#मत्ती ५:४४; लूक ६:२८ 15सैं तोंब्मैंने बालु सैं तोंन्, क्रोब्मैंने बालु क्रोद्। 16ताँनने क्ह्रिइ टिद्, थेब् आप्हैंन्, बरु कुरब्मैंने बालु प्रद्, ह्रोंसन् बेल्ले ह्रब्-सेब् आप्हैंन्।#हितो ३:७
17क्हेमैंए फिर न्होह्रों लब्मैंए न्होह्रों आलद्। म्हिमैंए उँइँरि तो छ्याँब तम् चन् लरिद्। 18खाँन् समा ताँनने क्ह्रिसि टिद्।
19ओ ङए खोबै अलि-अङाँमैं, ह्रोंसए न्होह्रों लब्मैंने खोंयोंइ खि आकिंन्। चमैंलाइ परमेश्वरए ह्रिसर्न पिवाद्, तलेबिस्याँ “खि किंबै के ङल् ग,
ङजीन् खि किंब्मुँ,” बिसि छ्वेर प्ह्रिइमुँ।#व्य ३२:३५
20बरु परमेश्वरए छ्वेर बिब् धोंले,
“क्हिए शत्तुर फो ख्रेंस्याँ चलाइ चल् पिंन्,
च क्यु पिइबिस्याँ क्यु पिंन्।
छ लस्याँ क्हिए शत्तुर फा पिन् तसि
चए क्रर मि राब उँवाब् धोंन् तम्।”#हितो २५:२१-२२
21छतसि अरूमैंए आछ्याँबै केइ ह्रोंसलाइ ट्होल् आपिंन्, बरु क्हेमैंइ छ्याँबै के लसिन् आछ्याँबै के ट्होवाद्।
Markert nå:
रोमी 12: GCMB
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2020, Wycliffe Bible Translators, Inc. All rights reserved.
