O Kandɔɔ 3
3
Mɛlɛka tow Adam nda laa ndɔ o nakɔɔ nin
1Kɛwvo ndóò hiow visia yondoa Mɛlɛka Hala cɔw-va kpow kɔlkalu vɔɔndo ni. Mó ɲuna vanalanɔɔ aa: «Bàà nuaa Hala dimul niaa ni aa niaa dia kɔmnde yɔmii co o nakɔɔ ho nin-nde le?» 2Mí vanalanɔɔ mulul ndu aa: «Ɛ-ɛ, n nɔla mì n de kɔmnde yɔmii co o nakɔɔ nin-nde kpow, 3kɛ le kɔmnde yɔm co hoo o nakɔɔ tɛɛn déŋ-ndo, nuaa Hala dimul naa ni aa: ‹La dia le, hali pilanndo bɛɛ la pilan te, yɔŋii niaa sɔla piɔ́mndo.›» 4Mí kɛwvo dimul vanalanɔɔ aa: «La sɔ́là piɔ́m te. 5Kɛ Hala sinà ɲɛkɛndɛi maa te la de dɔ́ɔ́ pɛ kɔmnde yɔm kon, hɔlta niaalan la kumbin, la siŋnun maa ndu Hala#3.5 maa ndu Hala: Vana nɔla vɛlɛ mì vana hivi fondaa ho aa «maa halaa», te kon te aa «maa n'hala»., la sina dɔ́ɔ́ pɛɛngulan ɲɛ kɛndɔɔ a ɲɛ vɔɔndo tɛɛn.»
6Mí vanalanɔɔ ca maa yɔm kon naŋ taw o dioo a o tofaa, maa yeemɛi bii vana le kɔmnde ndɔlen dioo le dɛnɛ sinaa bɛndoo sɔlaa. O kon, mó kiandu komɔɔ o pilɛ, mó dia. Mó yɔngu vɛlɛ pɔnɔ ndɔ, o nda va latulu-o, mí ndu bɛɛ dia. 7O kon, mí hɔlta ndalan la kumbin nda ŋiɔn kpow, má cannan maa tumnda fondo nda va ni. Le hee, má sɔandu pei voosoei, má yiwnun ndi o caŋ maa lakola.
8Mɛɛ nda tuei diom Mɛlɛka Hala-o balɔɔ o nakɔɔ nin o hoeyii fɛ́-fɛ́i paale delɛi nin, má kɔ vionnun ndu o yɔmnde nin. 9Mí Mɛlɛka Hala veelu vanapɔnɔɔ, mó ɲuna ndu aa: «Kuɛɛ nɛ n co yɛ?» 10Mí vanapɔnɔɔ mulul ndu aa: «Tueyɔɔ ya tuei diom nɔmndo o nakɔɔ nin ni, mí siòònde bii ya, mí viannun, kani tum fondo ya co ni.» 11Mí Mɛlɛka Hala ɲuna ndu aa: «Nɛ̀ɛ́ cɔm yɛ nɔm maa tum fondo n co ni? Mò va maa kɔmnde yɔm ya kuuna nɔm le dioo len n de ni?» 12Mí vanapɔnɔɔ mulul ndu aa: «Vanalanɔ n yɔngu ya le vaa vana ni malaa-o, ndu yɔngu ya kɔmnde yɔm kon ni, mí dia.»
13Mí Mɛlɛka Hala ɲuna vanalanɔɔ aa: «Dɛnɛ yɛɛ n tosa yɛ hoo?» Mí cuaa muli aa: «Kɛwvo pálá ya nuaa ni mí dia kɔmnde yɔm kon.»
14O kon, mí Mɛlɛka Hala dimul kɛwvo aa:
«Le dɛnɛ n tosa hoo-o,
dangaa vanin nɔm coo
visia pɔmbɔa a visia bɛndua kpow tɛɛn,
a vanin sasɔnndo o dembe nɔmndo coo le kɔlan.
Le fɛɛn a fɛɛn, cundoo n vanin dioo ni.
15I lueinin vɔvanndo niaa tɛɛn niaa vanalanɔɔ,
vɔvanndo vanin cuavaa ndɔa
a cuavaa nɔmnda tɛɛn.
Po vanalanɔɔ pialnin nɔm bollen,
mì nɔm lɔva ndu bɛngu tííndííyo.»
16Mí Mɛlɛka dimul vanalanɔɔ aa:
«I tuisinin nɔm sangalan coo taw
telen n vanin a folio-o.
Mɛɛ ma diw lahɔl malan n vialu.
Yeemɛi biinin nɔm
le pɔnɔ nɔm hɛnanndo,
kɛ ndu vanin nɔm bollen ni.»
17Mí Mɛlɛka dimul niko vanapɔnɔɔ aa:
«Le tùú n cɛl sɔɛi laa nɔm-nde,
má dia kɔmnde yɔm ya kuuna nɔm le dioo-o len-ndo,
i dɔw lɛŋnden danga le yɔŋ vɔɔn nɔm kon.
Háá mì yoomu nɔmndo cuu o ceendo coo,
fɔ mà sanga sangaa pila
malan n sɔla ɲɛdiaa nɔmndo lɛŋ.
18Lɛŋnden le solulnin nɔm yɔɔn a hɛɛnndon.
Ɲɛ vanin vulɔɔ o ciɛɔn nin-ndo
n vanin dioo ni.
19Lɔ́ɔ́ pá ma sɔlá nin ɲɛdiaa nɔmndo,
fɔ ma kelun lalle o itendu.
A lonin lende háá mà muungu lɛŋ, nɛɛ n fula-a.
Kani a puuloo n cɔwnun ni,
lelan o puuloo nin n co vɛlɛ muungu ni.»
20Mí vanapɔnɔɔ ke laa ndɔ diolan aa Hava (kon co dimio ni aa «Yoomoo»), kani ndu yɔŋnun kala-mama vanndacieea kpow ni. 21Mí Mɛlɛka Hala cuɛi vanapɔnɔɔ nda laa ndɔ a yáwla visia. 22Mó dimi aa: «Mɛɛ vanacieo siŋnun maa naa le dɛnɛ kɛndɔɔ a dɛnɛ vɔɔndo sinaa yɛ, naa bɛɛ n kùùnan ndu le tiiyaa o yɔm cindaa. Kani te o de pɛ kɔmnde yɔm kon, o co vannɔn yoomu le fɛɛn a fɛɛn.» 23Le hee, mí Mɛlɛka Hala toaw vanacieo, mó soli ndu o nakɔɔ Edɛn nin, haliko mo kɔ va vallo tosaa o lɛŋnde o fula o puulu ndɔɔ nin-nden coo. 24Mɛɛ Mɛlɛka soli ndu o nakɔɔ nin lende, mó handu mɛlɛkaa kanda ɲɛm Hala-on-nda kpalillo o nakɔ kon sondoo a mɔɔn leyinndon o laba. Má va mun hiŋndo le nɛi yɔm cindaa kon cumullo.
Markert nå:
O Kandɔɔ 3: BKG
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© Alliance Biblique en Guinée