Populære bibelvers fra ROMANOS 1

Del

Che nachi ete ko ñe'ësa pɨsɨrösa resendar avɨye va'e sui, esepia a'e Tüpä pirätäsa opakatu seroyasar pɨsɨrö agwä, judío rane yɨpɨndar, ipare opakatu ambuae ava-ava tëi avei.

Supiete ko ñe'ësa omboyekwa Tüpä ava reko mbokatuprɨsa: Oyese yande yeroyasa pɨpeño ite egwë e'i yandeu. Esepia Ikwachiaprɨ araka'endar aipo e'i: “Akoi ava seko katuprɨ va'e Tüpä reroyasa pɨpe sekoira tekovesa apɨre'ɨ̇sa pɨpe.”

egwë e'i ete Tüpä rekokwer ndoyekwai va'e oyekwa rumo mba'e sembiapo pɨpe. Supiete yasepia mba'e sembiapokwer ɨvɨ apo ramo suive oime va'e rese, sese yaikwa a'e Tüpä ite sekoi iyavei ipirätäsa apɨre'ɨ̇ va'e. Sese ava angaipa viyar ndiyai, eñemosaño tëi rane oreu e'i va'erä yuvɨreko chupe.

Yepe oikwa tëi Tüpä yuvɨreko viña, nomboetei rumo Tüpä sekosa rese avɨye ndeu nde'i avei yuvɨreko chupe. Iyavei ipɨ'añemoñeta mba'e egwë e'i tëi va'e rese, ipɨpe sui mba'e ndosendukwa katu iri ete yuvɨreko.

Mba'e supiete va'e Tüpä suindar, reroya rägwer sui temirä tëi vɨroya katu yuvɨreko, iyavei Tüpä mboyeroya rägwer sui omboetei katu mba'e sembiapokwer tëi yuvɨreko. Tüpä ite rumo nomboetei yuvɨreko.

Supiete ni'ä Tüpä omboyekwa itera oñemoɨrösa ɨva sui opakatu ava vɨroyasare'ɨ̇ upe, ndasekoporäi va'e upe avei, mba'e gwembiapoai sui ndoikwa uka potai va'e ko ñe'ësa supiete va'e ambuae ava upe yuvɨreko.

Sese Tüpä opoi ete ichui, toyapoño poromochisa mba'e tëi gwemimbotarai pɨpe yuvɨreko oyapave. Evokoiyase kuña avei kuimba'e rese gweko rägwer sui yuvɨrekoi oyese ae; kuimba'e avei kuña rese gweko rägwer sui yuvɨrekoiño avei oyese ae iyavei oipotaraiño ite evokoi gweko raisa yuvɨreko. Evokoi nungar aposa sui oyemomarä a'e ae yuvɨreko. Esepia ndoikwa potai ete Tüpä yuvɨreko, a'e evokoiyase opoi ete ichui toyapoño ayase mba'e ndipotasai va'e gweko raisa pɨpe yuvɨreko oya chupe.

Yepe ore mba'ekwa vai e'i tëi viña, ndoikwai ete rumo mba'e ipɨpe yuvɨreko; esepia Tüpä nomanoi va'e seko porañete va'e mboetei rägwer sui, omboetei ava okañɨ tëi va'e ra'anga iyavei vɨräi, opakatu mba'e mɨmba, mboi tëi avei omboetei yuvɨreko.