Populære bibelvers fra रोमि 1

मान्‍ठाभनॆ ग खिरिस्‍टमि बारेबिऎ नुऎ खानावाँनुङ् काङा ङेसिङानि। गग निवाँयुङ् लॆखुबाचि हिङ्‌पक्‍मिक्‍खुबा निवाँहाङ्‌मि चॆक्‍मावामि योम्‍पक रेटा। ग नुऎ खानावाँ याॽलि याहुडिचिबि टाहा हाङ् हॆॽनिबारेक्‍चिबि टाआ।

मान्‍ठाभनॆ ग नुऎ खानावाँऎ निवाँहाङ्ऎ कानि खोम् ङारिङ्‌पि मान्‍टहाङ् निवाँनेन् याॽमि मुसिहा लोमॆ खाङ्‌मिःडि। हाङ् ग निवाँनेन् खानावाँ निवाँयुङ्‌बाट लिबक हाङ् निवाँयुङ्‌पिॽन लुक्‍खॆ। गमि बारेबि निवाँनेन् साब्‍चिराबि गरहाङ् साब्‍डा, “निवाँनेन् याॽमि निवाँहाङ्‌बि निवाँयुङ् लॆःॽमानुङ् हिङ्‌चा।”

चाइबान कानिऎ निवाँहाङ्‌मि हानाम्‍स लिढाङ्‌ऎ चॆक्‍मावा हाङ् खो मान्‍टहाङ् पाइऎ लोमॆ खाङ्‌टॽनि। टर खोसॆ बाखाटेम् मुबक्‍मिम्‍पा डिनाबाङ्‌न ग खानावाँ मान्‍टक्‍मा लॆऎ लोमॆ खानावाँ खोसॆ मुमिम्‍पा ठःकाबाङ्‌न चोब्‍न याॽमिचि खाङ्‌मिडुचि। मसॆ खोचिऎ निवाँहाङ् लेङानि लोमॆ आक्‍कुबि माङ्‌स खानावाँ माआ।

खोचिऎ निवाँहाङ् चु कामानुङ् लेसुचि हाङ्‌स, खोचिऎ खो पिॽमा लॆऎ निङ्‌लावा मान्‍लॆटुचि। हाङ्‌न आक्‍खाचिऎ खो ओहाक् पिट्‌टुचि। आक्‍खाचि ग निवाँ माखेॽमिम्‍पा याॽमिचि लिसामि हाङ् उम्‍चि हप्‍पॆरॆक्‍मा निवाँ माॽयाक्‍टऎसॆ डॆक्‍खॆटु।

आक्‍खाचिऎ निवाँहाङ्‌मि बारेबिऎ चाइबानऎ खानावाँ ग हुन्‍नहा खानावाँनुङ् रे लॆनुचि। चोब्‍न खानावाँ मुखुबा निवाँहाङ् चुङ्‌मा याइसे निवाँहाङ्ऎ मुबक्‍मिम्‍पारे स्‍यामिपक्‍कुचि हाङ् आक्‍खा ठकान चुङ्‌पकुचि। निवाँहाङ्‌मि निङ् चाइ हानाम्‍स ठेॽमा खॆन्‍चाकु। आमेन।

काइसॆ योम्‍पक् यिक्‍खुबा हाङ् निवाँबि काइसॆ मिन्‍खुबा चोब्‍न याॽमिचि सक्‍पि पारुबाङ् निवाँहाङ्ऎ खोम् सिरि खाङ्‌मिकु। खोचि मान्‍टहाङ् लॆःॽमे पाइमि आक्‍क खानावाँऎ होइढा याॽमिचि निवाँहाङ्‌मि चाइबानऎ खानावाँ ऎवाप्‍टखुबा मुमे पाइकुचि।

खोचिऎ आक्‍र लॆःॽमिम्‍पासॆ निवाँहाङ्ऎ खोचि उम्‍चि सालुङ्‌ऎ माङ्‌माङ् ङागुकुर आक्‍खान चिक्‍सिॽमा लुहा योक्‍पक् यिक्‍माम् लागि याइटुचि। हाङ् उम्‍चि मेॽनुङ्‌माचि सङ्‌क वाठाङ्‌पा नुङ् हॆॽनॆ टर मेॽनुङ्‌माचिनुङ्‌न इम्‍चाबक्‍कामि। हाङ् वाठाङ्‌पाचि सङ्‌क आक्‍रक्‍न लॆटामि। खोचि मेॽनुङ्‌माचि नुङ् हॆॽनॆ, टर वाठाङ्‌पा वाठाङ्‌पामि लुम्‍पि एट्‌टान इम्‍चामा मिनामि। हाङ् उम्‍चि लुम्‍पि ङेसिमा लुहा योम्‍पक् यिगामि। हाङ् खोचिऎ हिङ्‌वा योम्‍पक् यिक्‍मिम्‍पासॆ, निवाँहाङ्ऎ खोचि गरहा ङेसिमा लुहा योम्‍पक् यिक्‍मिम्‍पासॆ डान्‍डा पिॽमॆपाइकुचि। आक्‍खा याॽमिचिऎ निवाँहाङ् ङेःप्‍मा मामिन्‍मिम्‍पासॆ, खोसॆ आक्‍खा याॽमिचि यिक्‍मा फॆन्‍निऎ योम्‍पक् यिक्‍मिर कामानुङ् उम्‍चि काइसॆ निवाँबि याइडुचिमि।

हाङ् खोचिऎ टाङ्‌पॆ टाङ्‌पान निवाँटाङ्‌पा कासामि टर खोचिन निवाँ मॆड्‌डिङ्‌मा लिसामि। हाङ् खोचिऎ हानाम्‍स लुक्‍खॆॽनिऎ निवाँहाङ् चुङ्‌मॆ योम्‍पक् हॆॽनॆ, टर लुॽखॆखुबा याॽमिमि, पोसुचिमि, सवाँचिमि हाङ् बाखाबि सेनुक्‍मिहा पोसुचिमि मुर्‌टि चुङुॽमि।