Populære bibelvers fra ABhaluumi 12

Del

Ɨshi, muleshe ahwejeshele nantele amiiho ga gabhombwa na bhantu abha mu nsi ɨnɨ. Leelo ʉNgʉlʉbhɨ ya yʉʉyo agalulanya amooyo geenyu abhe nɨ nsɨɨbho ɨnjenu. Ɨpo pa pɨɨpo munza‑amanyile huwaaganye ʉkʉndwe wa Ngʉlʉbhɨ huliimwɨ, hwa huje ahantu haala ahinza, ahatinisu nantele ha hahunʼsʉngwɨzya.

Ɨshi bhooziwa bhamwetu, mumɨɨnye ɨsho ʉNgʉlʉbhɨ ahutilolela ɨnkʉmbʉ. Ɨshi, ɨhubhalaabha hu mwoyo gwanɨ gwonti huje muhwifumye amabɨlɨ geenyu gabhe nanshi ɨnsangu ɨnsangalusu ɨzyɨ vyʉma vya vili vyʉmi, zya zihunʼsʉngwɨzya ʉNgʉlʉbhɨ. Enya, abhombe ɨsho lya lidala lyɨ lyoli ɨlya humʼpuute.

Seshelaji mu gaala aminza ɨgo ʉNgʉlʉbhɨ abhalapiiye amwɨ huje anza hubhabhombele. Jimbililaji, nkashele gabhɨnzɨɨye amayɨmba, nantele jendelelaji hunʼnaabhe ʉNgʉlʉbhɨ.

Ʉgandi amenwe nɨ mbiibhi ɨzyo ʉbhombelwa na bhantu, lyoli ʉmene ɨmbiibhi hwi‑idala ɨlya hubhabhombele ɨnyinza.

Mugananaje mwɨmwɨ hu mwɨmwɨ nanshi abhanakwenyu. Shila muntu abhe nʉ dandamazu tee hunʼtinishe ʉwamwabho.

Mubhaganaje abhamwenyu hu mwoyo ʉnʼzelu. Muleshe lwonti abhombe ɨmbiibhi, lyoli mubhe mubhomba ɨnyinza hu habhaazyo honti.

Mubagaje abhombe lyolyonti ɨlyo mubhajiiye huje mubhe nʉ tengaanu na bhantu bhonti.

Bhakʉndwe bhaanɨ, mugandi aweezezye iliiga, lyoli mubhe muhunʼneshela ʉNgʉlʉbhɨ abhombaje ɨgo. Ɨyanga ɨsho hu nongwa mu Nsimbo ɨMfinjile ʉMwɨnɨ ʉNgʉlʉbhɨ ayiga, “Aweezezye ʉbhiibhi mbombo yaanɨ, anɨ nɨɨnɨ nahayihumʼmwezezya ʉmuntu ʉbhiibhi.”

Mugandi abhe bhoolo abhombe ɨmbombo ya Ngʉlʉbhɨ, leelo ʉMʼpepo ʉMʼfinjile abhaavwe ajendeelele abhombe ɨmbombo ɨyo hu mwoyo gwonti, mumʼmombele ʉMwɨnɨ ʉYeesu.

Ɨshi, ʉKilisiti ampiiye ɨmpyana ɨmbe nʼsontwa waakwe, ɨshi ɨhumʼmʉʉzya shila weeka muuhati yeenyu huje leshi ahwilole mukhondɨɨye ashile sha muli. Leelo ɨnsɨɨbho zyenyu lyoli mubhe muhwilola huje, shila muntu apewiilwe ɨshoolelo shaakwe ɨshɨ lwɨtɨho nʉ Ngʉlʉbhɨ.

Nkashele abhantu bhahubhabhombela ʉbhiibhi, mugandi hubhaweezezye ʉbhiibhi. Lyoli, sɨɨbhaji nasʉʉti na‑abhombe gaala ga galoleha minza hwa bhantu bhonti.

Khalaji shinza mwɨmwɨ hu mwɨmwɨ. Mugandi hwibaade, leelo muhwiyisyaje na‑abhe nʉ lwʉmvwano na bhantu bha bhasyonsheliilwe. Mugandi hwilole huje muli nɨ njeele tee.

Nantele ɨNsimbo ɨMfinjile ziyiga hu nongwa ɨya‑aweezezye iliiga huje, “Nkashele ʉnʼnʉgʉ waaho ali nɨ nzala, ʉmʼpeele ɨshalye. Nantele nkashele ali nɨ nyoota, ʉmʼpeele ɨsha‑amwele. Nkashele wabhomba ɨsho, ʉnza‑abhe nanshi huje ʉtwinshile ʉmwoto ʉgwɨ mazimya pi‑itwe lyakwe.”

Abhantu ɨbho bhahubhayɨmvya, bhaputilaji huje ʉNgʉlʉbhɨ abhasaye ɨbho, mubhasayaje, mugandi hubhagune. Seshelaji peeka nɨ‑ɨbho bhahubhaseshela, lilaji peeka nɨ‑ɨbho bha bhalila.

Bhavwaji abhooziwa ɨvintu ɨvyo bhabhuliliilwe, nantele mubhanje bhangu hubhambɨɨlɨle shinza abhajenu mu nyumba zyenyu.

Mumɨɨnye huje ʉmʼbɨlɨ guli gweka, leelo guli nɨ vipelwa vinji, shila shipelwa shili nɨ mbombo yaakwe. Sha shɨɨsho guli ʉmʼbɨlɨ gwa Kilisiti. Atɨ tili vipelwa vinji ɨvyɨ mʼbɨlɨ gwakwe gweka. Mu mʼbɨlɨ ʉgu, shila muntu abhombɨɨshe shipelwa sha wamwabho.