Populære bibelvers fra Japarea̧ 4

Del

Jabechji̧ pio ju̧i̧iämo̧i̧ chjätärea̧mi̧ dade ca̧ oti̧. Ado cja̧rȩmo̧ decjiade. Jechu pio ju̧i̧mo̧i̧ tuti yürü chjadürëremȩdejȩ Ütë tjamo̧ judi a̧ro̧rȩ chjätärea̧ dapea̧ oa. Pio ju̧i̧iämo̧i̧ chjätärea̧mi̧ dade —yo̧mȩrȩ dëbë ni̧bä chjaorëremȩdejȩrȩ tjamo̧ yo̧ji̧ri̧ pio ji̧ri̧iäpȩmo̧ Pedro judi.

Ado judiro̧ Ütë tjamo̧ pio ju̧i̧ ni̧bä ëte jënȩro̧ a̧dopea̧ bë üdë chjaodëri̧ jö̧nö̧jö̧nö̧ai̧ mari̧ cjiarëremȩde. Ado Tjo tjamo̧ ja̧ chja̧oerä cjia maearë ni̧bärëreji̧ri̧dirȩ Ütë tjamo̧ ja̧ ma̧ȩ oa, uapadëji̧ri̧rȩ.

Ado yaba̧ Ano̧mȩ, jo̧rȩtaibe. Jabechji̧ uapai̧ ta̧rëri̧ yo̧ë cji̧däa̧diro̧ibe. Ado chjadëri̧ a̧doibe Amai̧, na̧ ma̧ȩ pio ju̧i̧ uapadëji̧ri̧rȩ ni̧bä chjaopea̧ oa, goae tarari̧ a̧ra̧no̧pea̧ oa. Jabechji̧ na̧ mu̧i̧tjoi̧rea̧rȩ Ama̧i̧. Pio ju̧i̧iä chjadëri̧ a̧doibe.

Peaja̧di ta̧rëri̧ yo̧diibe Ütërë go̧ȩpa tänȩrërea̧ ma̧ȩ üdë Jechu pio ju̧i̧ chjiari. Ta̧rëchji̧vä: "Ta̧dë oa jiadarëreji̧ri̧diro̧jo̧ȩ jo̧ oa cji̧däji̧ri̧ pio judiro̧. Jabo judiro̧ jiadarërea̧ ta̧dë pio judi ba chia tjamo̧de. Tjamo̧ goë chamȩ ta̧dëpea̧de." Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë Jechu pio ju̧i̧ chjiari. Ado danȩrȩ, Jechu pio judide pio jiro ta̧dëmi̧ damȩ judi. Ado pio mȩnȩro̧nȩrȩ pio jiro ta̧dë ba chia tjamo̧ oa jiadarëreji̧ri̧ judiro̧.

Ado judiorë tjamo̧ yo̧ji̧ri̧ pio judiro̧ ana̧ tjamo̧ri̧ jo̧rȩtaji̧ri̧rȩ darëreji̧ri̧diro̧jȩrȩ Pedro ju̧i̧, Juan ju̧i̧. 'Chia chia, uapadëji̧ri̧rȩ dëbë yo̧diro̧ibëda, Ütë tjamo̧ ja̧ ma̧ȩ oa dabaparea̧ jo̧räpȩ jädiädëa̧räbo goae tarari̧ ni̧bärea̧ chiadiro̧da, jabomo̧ pumȩ ba chiadëji̧ri̧borë dëbë yo̧rea̧ chiadiro̧da, ¿tjana̧ ju̧i̧iä uapadëji̧ri̧rȩ dëbë yo̧diro̧ibëda' quëna̧ jo̧rȩtaji̧ri̧rȩ gürü toboe cjia dae chjaorëreji̧ri̧diro̧jȩrȩ, ana̧ri̧ jo̧rȩtaji̧ri̧rȩ. Ado 'Jechu ja̧ jadüdiro̧da, Jechu pio ju̧i̧ nö̧ta tai̧ chjaorëreji̧ri̧ pio judiro̧diro̧da' quëna̧ jo̧rȩtaji̧ri̧pea̧dirȩ.

Quëna̧ji̧ri̧ judiro̧ ütëbodärärë cja̧rȩmȩ chji̧ chiami̧ dari̧ jo̧rȩtarëreji̧ri̧dirȩ chjarapë jo̧rȩtarea̧ decjiari̧. 'Ca̧ea̧ üdë, jabechji̧ ca̧ea̧ madica̧da' quëna̧dërëreji̧ri̧dirȩ. 'Ca̧ jurarea̧ üdë, ca̧ chjibo üdë, ca̧ea̧ maeadica̧da' quëna̧ jo̧rȩtadërëreji̧ri̧dirȩ, jabo ji̧dë ma chjarapë yürürëreji̧ri̧diro̧jȩrȩ jibëa̧ dëbëti̧ra̧ chia, ji̧mo̧ ëba goaji̧ri̧rȩ.