Populære bibelvers fra Proverbios 22

Del

Ja̧danö, ju'wibi yötawa: Isabenö, kwitji̧mu̧duwinö otiwanö tjo̧mukwatobö jwebebö yökawaduwitjö̧ma okobe jwiinö tjö̧ji̧ma otiwanö omukwatö tjö̧jena. Jao, tjȩmu tjö̧jatjö̧ damöbi ba̧kwȩlö̧jatebö jwebebö yökawinaduwadanö otiwanö omukwatö tjö̧jena, jobadönö ajayinö jwebebö yökawinaduwatjö̧ma.

Ja̧danö, ju'wibi yötawa: Isabenö Jo̧ma jojodötjö ju'wedönö pjabatö iyo̧, baikwö dötölataja jawa omukwatadönö: Jojodötjö ju'wedöma, ökwödöma baikwönönöbedösa jö̧ba̧lö omukwatadö. Isabenö Jo̧ma jobekwö omukwatadönö pjabatö iyo̧ balada, tjitea tju̧juna̧lobö. Ja̧danö, jojodötjö ju'wedöma Isabenö Jo̧nö yebabinö omukwatadö. Isabenö Jo̧ma jobekwö omukwatadönöbi pjabatö iyo̧ balada, tjitea tju̧juna̧lobö. Ja̧danö, Isabenö Jo̧ma jobadönöma, baikwönönöbedösa jö̧ba̧lö omukwatadönöbi, ja̧danö jo̧banö yebabinö omukwatadönöbi pjabato̧, jojodöma jobadönö edö tjöwaisachibobö, jweinö omukwatadö jö̧ba̧lö. Ja̧danö ju'wibi pjaatobe jobadönöma Isabenö Jo̧ma. Lekwe tjö̧joböbi pjabato̧ baikwönönöbedösa jö̧ba̧lö omukwatadönö, ja̧danö jo̧banö yebabinö omukwatadönö. Jobekwö Isabenö Jo̧ jobadönö pjabatö iyi̧ma otiwanö omukwatö tjö̧ji̧ mikwa baibanö ji̧.

Salomón ju'wi jwebebö yöawakwawa jawanö wanekwachi̧ jawa baikwö laebobe: Isabenö yötawa: Jojodöma ökwönö edö, otiwanö omukwatö jo̧ jö̧ba̧lö tjöwaisachibi̧ma jwiinö mikwawobe. Isabenö, balada, kwitea nöinö kwujuna̧li̧tjö̧ bajalekwönönö mikwawobe jojodö ökwönö edö, otiwanö omukwatö jo̧ jö̧ba̧lö tjöwaisachibi̧ma. Ja̧danö, oro, plata nöinö kwujuna̧li̧tjö̧ bajalekwönönö mikwawobe jojodö ökwönö edö tjösödi̧ma, Otiwanö omukwato̧, jö̧ba̧lö.

Jemi ikenama jweinö omukwatadö yötjawina jawama baikwö laebobe: Kwösödoko juluwanö dameakwo̧nö chömöledöso̧, jö̧ba̧lö. Jo̧bakwö pjabacha̧löma kwö̧joko.

Ja̧danö, ju'wibi yötawa: Jwibadönö pjabatadönö, idöda tju̧kwa̧ kwakwawa iyö pjabatadönöma Diosma jobadönö ösödö pjabato̧.

Ja̧danö, ju'wibi yötawa: Isabenö, ö'wiyawakwawönö omukwato̧ma labi jawa baledakwa̧ waiso̧, chedemi labinö baledakobe, jö̧ba̧lö. Jobekwö öwaisasobetjö̧ itedada te'ada̧lo̧, labi̧ jawa baledobekwöma i̧'yapji jö̧ba̧lö. Jobekwö omukwatokobe jweinö omukwatobö wajwibo̧ma. Jo̧bama omukwatökönö labi̧ jawa baledobekwö 'yo̧. Ja̧danö, labobekwö i̧'yobetjö̧ yelösöda usula emawakwo̧.

Ja̧danö, ju'wibi yötawa: Isabenö, balada juna̧ladöma jwibadö tjuluwedödanö tjuju̧kwobe, jwibadönö webadö. Ja̧danö, ju'wibi: Juna̧lo̧tjö balada balewo̧ma öbalewajökwenö umusidobetjö̧ midö eminökwedanö ö̧jobe.

Ja̧danö, ju'wibi yötawa: Okobe deinö jojodöma Isabenö Jo̧ otidinawö̧. Balada juna̧la̧dönöbi, balada jwibadönöbi Isabenö Jo̧ otidinawö̧. Jobekwö ökwödö jojodöma bakwaibedösa, Isabenö Jo̧ otidinawö̧sa.

Ajayinö jweinö omukwatadö yötjawina jawa baikwö laebobe: Isabenö, usulaso̧nö, juna̧lö̧kö̧nö 'döbebö tjö̧naukwoböma waiyökena ¿jötö? ujuluwokobetjö̧. Jobekwö ji̧jayonö la'akatjöda usulaso̧nö 'döbebö kwönaukwoko. Ju'wibi ja̧köboko usulaso̧nöma: Lȩekwa yöbawo̧ öba a'o ja̧nö la'akatjöda sulabenö yökawoko usulaso̧nöma, lȩekwa luwo̧ma jo̧banö lȩebapji jö̧ba̧lö. Jobekwö yökawoko. Isabenö Jo̧ma usulaso̧nö tjöbeba̧lö te'ada̧lo̧. Jobekwö te'ada̧lo̧obetjö̧ usulaso̧nö sulabenö ja̧bo̧nöma debö i̧'yinö lȩebakwo̧ Isabenö Jo̧ma.