Populære bibelvers fra Rooma 1

Del

An Wori Haaggan ma kuuryaawo. Iꞌdi tahe Wora a miigti Waakhe hol dowto, eti tuummane Kiriisto rummeeste ribto. Koloo ꞌdooꞌdi Yaꞌhuude Kiriisto rummeeste lariba, ꞌdee toro yaafohi Yaꞌhuud ieheynane Kiriisto rummeeste laka lariba.

Wora Haaggan wihi us soobabbakkaahicho a saggi Waakh enenyet ꞌdooꞌdi ortiis ka fiffissan ikayeelo. Waha la koli enenyet Waakh kakhuufe kaldach on yateehiin. Iꞌdi liichiiruu, “Eti Waakh ortiis ka fissan Waakhe rummeesta. Saggaase rumanka jiro ikhaba.”

A mehe uuꞌ goorat harra lasoouume, weeli enenyet saggi miigti Waakh jirtuu tuumman ijirto ichoow saggi us rumanka Waakh iyahe, a abte. Wahanyeyyoha Waakh leeyahe ma laargo, iꞌdaasenyi wihi Waakh soouume tuumman ka a lagarta. Jeentetaas u, wohoo rucchule icho laabaan ma khabaan.

Icho eti Waakh yahe a abteene, eheetteey laka inkaanyiti kootte Waakh imale ma siinne, toro la kalaꞌd laka ma ilaabin. Wihi ꞌdalam on kamasseene, toro la uurassicho mugꞌdi weele.

Icho runti Waakh miinsan ma rummeysanne, dib on u ayti beenaat rummeesteen. Waakkhi walah tuumman soouume kootte jirtuu tuumman saaꞌdo imaleen rubeytiis ma wahanne toro la ma inkaanyitine, wahanyeyyohi Waakh soouume inokhteene, Waakh kayeesseen.

Waakh goobiis on ka, saggi us ꞌdooꞌdi jiroticho ka usu ꞌdiiꞌdo toro uskeel yeelo ikahollowo a tusa. Uskeela ka la, ꞌdooꞌda runti Waakhe laabti iche ꞌdooꞌdi addan kajeycha.

Jeentetane Waakh iꞌdiiche, ildeerroti sareete lakhaanyeyyo keento icho ꞌdoonaan ikaassohtaan. Deyyeho laka mejeli laleeurꞌdo a kasoonokhatte, iche on isinokhatta. Saggaas on u mejel laka deyyehoti laleeurꞌdo kasootabe, ildeerroti mejel laleeurꞌdo buuhisse. Mejel on lakhaanyeyyohi nool isyeela. Jeenteti suujoonki icho yeeleen u, sinati imasse isikeeneen. Toro la jeenteti icho Waakh garan iꞌdiiꞌdeen u, Waakh icho a ꞌdiiche, uskeeli nool kamassaan. Suujoonki nool on kamassaane, jeentetaas u wihi kootte ikamaline yeelaan.

Icho rubeycho khara iskaayyeeleene, eheetteey laka ꞌdalammeti tuunte eheet. Ichohi kootte weynaanti Waakkhi jirtuu iumaatan wahtaan ka, iyookkoyyohi enenyeti yamuut ommos chimbiro ommos binahi sohti ommos binahi uur il kajiito wahteen.