Populære bibelvers fra 1 Bitut 2

Del

A̱wot nyi li a̱nia bah, mat nyi yet kwai nang A̱gwaza khai a̱ni. Nyi yet a̱yaapris a̱gba̱ndang A̱gwam, a̱za̱za̱rak nwap, ma̱ng á̱niet ba̱ yet a̱si̱ A̱gwaza a̱ni. Mat a̱nia, nyi na tak á̱ghyang á̱niet a̱cha̱chet a̱tan nkyang a̱ga̱de nang A̱gwaza nyia̱ a̱ni. Mat A̱gwaza yorong nyin a̱ ghwut ndyo mi̱ ndyin a̱ nat ndyo ma̱ a̱kyenkyai sai nggu wu.

Nggu ma̱ a̱pyia̱ nggu, ku kyiak a̱ka̱tuk nyia̱ nzi̱t wu mi̱ vam nggu hu da̱ a̱team a̱khwu; da̱nian zi̱ ka yet nkwom di̱ nyia̱ a̱ka̱tuk nyia̱, a̱wot zi̱ yet a̱chet di̱ nyia̱ a̱tsotswat nta̱m. Mat a̱fi̱fa̱t gu bibya, nang á̱ nchoot nyin. Mi̱ njen jhyang ji̱ swak a̱ni, nyi ku li nang zón seap ji̱ bwuk a̱ni. A̱wot ma̱ninika, nyi bwuok khwi a̱tyu a̱ chok nyin, a̱ si̱ bu cham swuan nyin ji a̱ni.

Ma̱nang á̱ ndyuut ma̱ A̱lyiat A̱gwaza na a̱ni, nyia̱, “Mi̱ jen jhyang ji̱ swak a̱ni, nyi ku yet á̱niet A̱gwaza bah. A̱wot ma̱ninika, nyi yet á̱niet nggu bya. Mi̱ jen jhyang ji̱ swak a̱ni, A̱gwaza ku fa̱k kunak nyin bah. A̱wot ma̱ninika, A̱gwaza fa̱k kunak nyin hwa.”

Da̱ a̱kwonu a̱kya, ma̱nang a̱chyuang mman nang á̱ sii tyei a̱ni, ku yet ta hwa nyi fwuong di̱dang swuo a̱baan ba̱t na̱ yet a̱si̱ A̱za̱za̱rak Ntswa a̱ni, da̱nian nyi ka mmeang nyi laai tat a̱jhyem sang san sangba̱p.

Nyin á̱niet khwi Yesu ba nang n chat a̱ni, n gba nyin á̱niet nyi yet á̱nietchen ma̱ng á̱niet ba̱ bai a̱na̱nda da̱ a̱bada̱dei njen mi̱ swanta huni a̱ni. Nyi yok ghwon a̱ka̱tuk nshyuo swanta wu, a̱ nyia̱ zwang mi̱ fwuo nyin na bah. Nyi ta̱bam, nyi swan swat ku yet a̱ni ma̱ng á̱kpa̱ndang nswat nyin ba ba̱ nwai khwi A̱gwaza a̱ni. Mat, a̱mgba̱m nang ba̱ mbat nyin di̱ nyia̱ a̱ka̱tuk, ba̱ na li á̱tsatsak nta̱m nang nyi nyia̱ a̱ni, a̱wot ba̱ nwuak A̱gwaza shi di̱n jen nang gu na mbai a̱ni.

A̱wot nyin nyi yet nfang nswuan nia nang á̱ nnok A̱za̱za̱rak A̱li A̱gwaza wu a̱ni. Kang ma̱ng a̱nia, nyi bu yet a̱za̱za̱rak sot a̱yaapris wa. Mat nang Yesu Kristi ngyet a̱tyu a̱ yong da̱ a̱kwonu nyin a̱zaghyi A̱gwaza a̱ni, A̱za̱za̱rak Ntswa na beang nyin, nyi neap za̱náng nang A̱gwaza na nfa̱k nyinyang nyin a̱ni.

Mat a̱nia, nyi yok kuzang tangka̱i a̱ka̱kpa̱t. Nyi yok laai á̱ghyang nyin bah. Nyi yok yet á̱bubuk á̱niet. Nyi yok kwi swam. Nyi bu yok tyam á̱ghyang nyin bah.

Nyi bai da̱ a̱vwuo Kristi, a̱ yet a̱fang nswuan a̱ta̱m kuntyin nok a̱li A̱gwaza ka a̱ni. Á̱nietbishyi si̱ lak gu. A̱wot A̱gwaza si̱ khai ngguu, á̱ ka chyin ngguu gba̱mgbam.

Nyi yet á̱sa̱t á̱niet bya. A̱mgba̱m ma̱ng a̱nia, nyi yet á̱khwo A̱gwaza bya. Mat a̱nia, nyi yok ghwon sa̱t nyin hu, ku yet ta̱fwat nang nyi na nyia̱ a̱ka̱kpa̱t a̱ni bah.

Mat A̱gwaza chat nyi swan a̱tan swat, nyi ka tyia̱ á̱niet ba̱ sang mumwang, a̱wot ba̱ si̱ bat nyin a̱bun a̱ni, ba̱ tyia̱ nywang.