ໂຣມ 1
1
1ຈົດໝາຍສະບັບນີ້ຈາກເຮົາ ໂປໂລ ຜູ້ຮັບໃຊ້ຂອງພຣະຄຣິດເຈົ້າເຢຊູ ຜູ້ທີ່ໄດ້ຮັບການເອີ້ນໃຫ້ເປັນອັກຄະສາວົກ ແລະ ຖືກແຍກໄວ້ເພື່ອຂ່າວປະເສີດຂອງພຣະເຈົ້າ, 2ຄືຂ່າວປະເສີດທີ່ພຣະອົງໄດ້ສັນຍາໄວ້ລ່ວງໜ້າ ໂດຍຜ່ານທາງບັນດາຜູ້ທຳນວາຍຂອງພຣະອົງໃນພຣະຄຳພີສັກສິດ. 3ຂ່າວປະເສີດນັ້ນກ່ຽວກັບພຣະບຸດຂອງພຣະອົງ ຜູ້ທີ່ໃນຖານະມະນຸດ ເຊິ່ງເປັນເຊື້ອສາຍຂອງດາວິດຝ່າຍເນື້ອກາຍ, 4ແລະ ຜູ້ທີ່ໂດຍທາງພຣະວິນຍານແຫ່ງຄວາມບໍລິສຸດ#1:4 ຫລື ຜູ້ທີ່ໃນດ້ານພຣະວິນຍານອັນບໍລິສຸດຂອງພຣະອົງ ພຣະອົງໄດ້ຮັບການແຕ່ງຕັ້ງໃຫ້ເປັນພຣະບຸດຂອງພຣະເຈົ້າດ້ວຍລິດອຳນາດ#1:4 ຫລື ພຣະອົງໄດ້ຮັບການປະກາດດ້ວຍລິດອຳນາດວ່າເປັນພຣະບຸດຂອງພຣະເຈົ້າໂດຍການເປັນຄືນມາຈາກຕາຍ ຄືພຣະເຢຊູຄຣິດເຈົ້າອົງພຣະຜູ້ເປັນເຈົ້າຂອງພວກເຮົາ. 5ພວກເຮົາໄດ້ຮັບພຣະຄຸນ ແລະ ຖືກແຕ່ງຕັ້ງໃຫ້ເປັນອັກຄະສາວົກໂດຍຜ່ານທາງພຣະອົງ ເພື່ອເອີ້ນເອົາບັນດາຄົນຕ່າງຊາດທັງຫລາຍມາສູ່ການເຊື່ອຟັງທີ່ມາທາງຄວາມເຊື່ອເພື່ອນາມຂອງພຣະອົງ. 6ແລະ ພວກເຈົ້າກໍຮ່ວມຢູ່ໃນບັນດາຄົນຕ່າງຊາດຜູ້ທີ່ໄດ້ເອີ້ນໃຫ້ເປັນຂອງພຣະເຢຊູຄຣິດເຈົ້າເໝືອນກັນ.
7ເຖິງທຸກຄົນທີ່ຢູ່ໃນນະຄອນໂຣມ ຜູ້ທີ່ພຣະເຈົ້າຮັກ ແລະ ໄດ້ເອີ້ນໃຫ້ເປັນຄົນບໍລິສຸດຂອງພຣະອົງ.
ຂໍໃຫ້ພຣະຄຸນ ແລະ ສັນຕິສຸກທີ່ມາຈາກພຣະເຈົ້າ ພຣະບິດາເຈົ້າຂອງເຮົາ ແລະ ຈາກພຣະເຢຊູຄຣິດເຈົ້າ ອົງພຣະຜູ້ເປັນເຈົ້າ ຈົ່ງມີແກ່ພວກເຈົ້າທັງຫລາຍ.
ໂປໂລປາຖະໜາທີ່ຈະມາຢ້ຽມຢາມນະຄອນໂຣມ
8ກ່ອນອື່ນ ເຮົາຂອບພຣະຄຸນພຣະເຈົ້າຂອງເຮົາຜ່ານທາງພຣະເຢຊູຄຣິດເຈົ້າເພື່ອພວກເຈົ້າທຸກຄົນ, ເພາະຄວາມເຊື່ອຂອງພວກເຈົ້າກຳລັງຖືກກ່າວໄປທົ່ວໂລກ. 9ພຣະເຈົ້າຜູ້ທີ່ເຮົາຮັບໃຊ້ດ້ວຍສຸດໃຈໃນການປະກາດຂ່າວປະເສີດເລື່ອງພຣະບຸດຂອງພຣະອົງນັ້ນເປັນພະຍານໃຫ້ເຮົາວ່າ ເຮົາລະນຶກເຖິງພວກເຈົ້າຢູ່ສະເໝີ 10ໃນຄຳອະທິຖານຂອງເຮົາທຸກຄັ້ງ ແລະ ເຮົາອະທິຖານວ່າໃນທີ່ສຸດນີ້ຖ້າເປັນຕາມຄວາມປະສົງຂອງພຣະເຈົ້າ ຂໍໃຫ້ເຮົາມີໂອກາດມາຫາພວກເຈົ້າ.
11ເຮົາປາຖະໜາຢາກເຫັນພວກເຈົ້າເພື່ອເຮົາຈະໄດ້ແບ່ງປັນຂອງປະທານຝ່າຍຈິດວິນຍານບາງຢ່າງໃຫ້ແກ່ພວກເຈົ້າ ເພື່ອເຮັດໃຫ້ພວກເຈົ້າເຂັ້ມແຂງ 12ຄືວ່າພວກເຈົ້າ ແລະ ເຮົາຈະໄດ້ໜູນໃຈເຊິ່ງກັນແລະກັນໂດຍຄວາມເຊື່ອຂອງພວກເຮົາທັງສອງຝ່າຍ. 13ພີ່ນ້ອງທັງຫລາຍເອີຍ ເຮົາຢາກໃຫ້ພວກເຈົ້າຮູ້ວ່າເຮົາໄດ້ວາງແຜນໄວ້ຫລາຍເທື່ອແລ້ວທີ່ຈະມາຢ້ຽມຢາມພວກເຈົ້າ (ແຕ່ຈົນເຖິງດຽວນີ້ກໍຍັງມີເຫດຂັດຂວາງຢູ່) ເພື່ອວ່າເຮົາຈະໄດ້ເກັບກ່ຽວຜົນບາງຢ່າງໃນທ່າມກາງພວກເຈົ້າ ເໝືອນດັ່ງທີ່ເຮົາໄດ້ເກັບກ່ຽວຜົນໃນທ່າມກາງຄົນຕ່າງຊາດອື່ນໆ.
14ເຮົາມີພັນທະຕໍ່ທັງຊາວກຣີກ ແລະ ຜູ້ທີ່ບໍ່ແມ່ນຊາວກຣີກ, ທັງຕໍ່ຄົນມີປັນຍາ ແລະ ທັງຕໍ່ຄົນໂງ່. 15ດ້ວຍເຫດນີ້ ເຮົາຈຶ່ງກະຕືລືລົ້ນທີ່ຈະປະກາດຂ່າວປະເສີດແກ່ພວກເຈົ້າຜູ້ທີ່ຢູ່ໃນນະຄອນໂຣມເໝືອນກັນ.
16ດ້ວຍວ່າ ເຮົາບໍ່ອາຍເລື່ອງຂ່າວປະເສີດ, ເພາະວ່າຂ່າວປະເສີດເປັນລິດອຳນາດຂອງພຣະເຈົ້າ ເຊິ່ງນໍາເອົາຄວາມພົ້ນໄປເຖິງທຸກຄົນທີ່ເຊື່ອຄື: ຄົນຢິວກ່ອນ ແລະ ຈາກນັ້ນກໍໄປເຖິງຄົນຕ່າງຊາດ. 17ເພາະໃນຂ່າວປະເສີດນັ້ນ ຄວາມຊອບທຳຂອງພຣະເຈົ້າກໍໄດ້ຮັບການເປີດເຜີຍ ເປັນຄວາມຊອບທຳທີ່ເລີ່ມຕົ້ນດ້ວຍຄວາມເຊື່ອ ແລະ ສຸດທ້າຍກໍດ້ວຍຄວາມເຊື່ອ,#1:17 ຫລື ເປັນຄວາມຊອບທຳໂດຍຄວາມເຊື່ອຕັ້ງແຕ່ຕົ້ນຈົນເຖິງທີ່ສຸດ ດັ່ງທີ່ມີຄຳຂຽນໄວ້ໃນພຣະຄຳພີແລ້ວວ່າ: “ຄົນຊອບທຳຈະດຳເນີນຊີວິດໂດຍຄວາມເຊື່ອ”.#1:17 ຮບກ 2:4
ຄວາມໂກດຮ້າຍຂອງພຣະເຈົ້າຕໍ່ສູ້ຄວາມບາບຂອງມະນຸດ
18ພຣະເຈົ້າໄດ້ສະແດງຄວາມໂກດຮ້າຍຈາກສະຫວັນຕໍ່ສູ້ຄວາມອະທຳ ແລະ ຄວາມຊົ່ວຮ້າຍທັງໝົດຂອງມະນຸດ ຜູ້ທີ່ໃຊ້ຄວາມຊົ່ວຮ້າຍຂອງຕົນປົກປິດຄວາມຈິງ, 19ດ້ວຍວ່າສິ່ງທີ່ອາດເຮັດໃຫ້ເປັນທີ່ຮູ້ຈັກກ່ຽວກັບພຣະເຈົ້ານັ້ນກໍໄດ້ປາກົດແຈ້ງແກ່ພວກເຂົາ, ເພາະວ່າພຣະເຈົ້າໄດ້ກະທຳສິ່ງເຫລົ່ານີ້ໃຫ້ປາກົດແຈ້ງແກ່ພວກເຂົາແລ້ວ. 20ເພາະວ່າຕັ້ງແຕ່ການສ້າງໂລກ ສະພາບທີ່ບໍ່ປາກົດຂອງພຣະເຈົ້າ ຄືລິດອຳນາດອັນຖາວອນ ແລະ ຄວາມເປັນພຣະເຈົ້າຂອງພຣະອົງພວກເຮົາກໍໄດ້ເຫັນຢ່າງຊັດເຈນ ແລະ ເຂົ້າໃຈໄດ້ຈາກສິ່ງທີ່ໄດ້ສ້າງຂຶ້ນ, ດັ່ງນັ້ນ ມະນຸດຈຶ່ງບໍ່ມີຂໍ້ແກ້ໂຕໄດ້.
21ເພາະເຖິງແມ່ນວ່າພວກເຂົາໄດ້ຮູ້ຈັກພຣະເຈົ້າແລ້ວ, ພວກເຂົາກໍບໍ່ໄດ້ຖວາຍກຽດແກ່ພຣະອົງໃຫ້ສົມກັບການທີ່ພຣະອົງເປັນພຣະເຈົ້າ ທັງບໍ່ໄດ້ຂອບພຣະຄຸນພຣະອົງ, ແຕ່ວ່າຄວາມຄິດຂອງພວກເຂົາກາຍເປັນສິ່ງທີ່ໄຮ້ປະໂຫຍດ ແລະ ຈິດໃຈອັນໂງ່ຂອງພວກເຂົາກໍມືດມົວໄປ. 22ເຖິງພວກເຂົາອ້າງຕົນວ່າເປັນຄົນມີປັນຍາ ພວກເຂົາກໍກາຍເປັນຄົນໂງ່ 23ແລະ ເອົາສະຫງ່າລາສີຂອງພຣະເຈົ້າຜູ້ເປັນອະມະຕະໄປແລກປ່ຽນກັບຮູບເຄົາລົບທີ່ສ້າງຂຶ້ນຕາມແບບຂອງມະນຸດທີ່ຕ້ອງຕາຍ, ຕາມແບບຂອງສັດປີກ, ສັດເລືອຄານ ແລະ ສັດຕ່າງໆ.
24ເຫດສະນັ້ນ ພຣະເຈົ້າຈຶ່ງໄດ້ປ່ອຍພວກເຂົາໃຫ້ເຮັດບາບທາງເພດຕາມຕັນຫາຊົ່ວໃນໃຈຂອງພວກເຂົາ ເຮັດສິ່ງທີ່ໜ້າອັບອາຍທາງຮ່າງກາຍຕໍ່ກັນ. 25ພວກເຂົາເອົາຄວາມຈິງເລື່ອງພຣະເຈົ້າມາປ່ຽນກັບຄວາມບໍ່ຈິງ, ພວກເຂົາຂາບໄຫວ້ ແລະ ບົວລະບັດຮັບໃຊ້ສິ່ງທີ່ໄດ້ສ້າງຂຶ້ນມາແທນພຣະເຈົ້າຜູ້ສ້າງ ຜູ້ເປັນທີ່ສັນລະເສີນຕະຫລອດໄປເປັນນິດ. ອາແມນ.
26ເພາະດ້ວຍເຫດນີ້ ພຣະເຈົ້າຈຶ່ງປ່ອຍພວກເຂົາໄວ້ໃນກິເລດຕັນຫາອັນໜ້າອັບອາຍ. ແມ່ນແຕ່ພວກແມ່ຍິງຂອງພວກເຂົາກໍປ່ຽນຈາກການມີຄວາມສຳພັນທາງເພດຕາມທຳມະຊາດໃຫ້ຜິດທຳມະຊາດໄປ. 27ໃນທຳນອງດຽວກັນ ພວກຜູ້ຊາຍກໍເລີກມີຄວາມສຳພັນທາງເພດຕາມທຳມະຊາດກັບແມ່ຍິງ ແລະ ເຕັມດ້ວຍໄຟແຫ່ງກິເລດຕັນຫາຕໍ່ກັນ. ຜູ້ຊາຍກັບຜູ້ຊາຍເຮັດການຊົ່ວໜ້າອັບອາຍຕໍ່ກັນ, ພວກເຂົາຈຶ່ງໄດ້ຮັບການລົງໂທດທີ່ສົມກັບການກະທຳຂອງຕົນ.
28ຫລາຍກວ່ານັ້ນ, ເນື່ອງຈາກພວກເຂົາບໍ່ເຫັນຄຸນຄ່າຂອງການຮູ້ຈັກພຣະເຈົ້າ ພຣະອົງຈຶ່ງປ່ອຍພວກເຂົາໃຫ້ມີຈິດໃຈຊົ່ວຊ້າ ເຮັດສິ່ງທີ່ບໍ່ສົມຄວນເຮັດ. 29ພວກເຂົາຈຶ່ງກາຍເປັນຄົນທີ່ເຕັມໄປດ້ວຍຄວາມຊົ່ວທຸກຢ່າງ, ຄວາມຊົ່ວຮ້າຍ, ຄວາມໂລບ ແລະ ການປອງຮ້າຍ. ພວກເຂົາເຕັມໄປດ້ວຍຄວາມອິດສາ, ການຂ້າຟັນ, ການຕໍ່ສູ້ຊິງດີຊິງເດັ່ນ, ການລໍ້ລວງ ແລະ ການຄິດຮ້າຍຕໍ່ກັນ. ພວກເຂົາມັກເວົ້ານິນທາ, 30ໃສ່ຮ້າຍປ້າຍສີກັນ, ກຽດຊັງພຣະເຈົ້າ, ອວດດີ, ໝິ່ນປະໝາດ ແລະ ອວດໂຕ. ພວກເຂົາຄິດຫາທາງໃໝ່ໆຂຶ້ນໃນການເຮັດຊົ່ວ, ພວກເຂົາບໍ່ເຊື່ອຟັງພໍ່ແມ່ຂອງຕົນ, 31ພວກເຂົາບໍ່ມີຄວາມເຂົ້າໃຈ, ບໍ່ມີຄວາມຊື່ສັດ, ບໍ່ມີຄວາມຮັກ, ບໍ່ມີຄວາມເມດຕາ. 32ເຖິງແມ່ນວ່າ ພວກເຂົາຮູ້ກົດບັນຍັດອັນຊອບທຳຂອງພຣະເຈົ້າທີ່ກ່າວວ່າ ຄົນທີ່ກະທຳຢ່າງນັ້ນກໍສົມຄວນຕ້ອງຕາຍ, ເຖິງປານນັ້ນ ພວກເຂົາກໍຍັງເຮັດຢູ່ ແລະ ຍັງເຫັນພ້ອມກັບຄົນທີ່ເຮັດຢ່າງນັ້ນອີກດ້ວຍ.
Nu geselecteerd:
ໂຣມ 1: LCV
Markering
Kopiëren
Vergelijk
Delen
Wil je jouw markerkingen op al je apparaten opslaan? Meld je aan of log in
Holy Bible, Lao Contemporary Version™| © 2023, 2025 by Biblica, Inc.|
Used with permission. All rights reserved worldwide.© 2023, 2025 by Biblica, Inc.
