Korint I 9
9
DOGI AD APOSTEL PAULUS, I HANGURUEN LONGU ADEN BUI.
1Io lao dandendegei ad homo bui, io labenen ge, io hom Apostel de bui? Io gin ilndri Jesu Ndorlaben adu, de bui? Mu ge, mu mburer ordo, io da gin hinen i le ndro Ndorlaben de bugane? 2Be io hom Apostel le ndro su bui, io hom Apostel le ndro mu ndangen, mu gelman le mburer ordo, io da gin hinen i le ndro Ndorlaben, mburer ordo i mburer ad hom Apostel. 3Ogo io ha leng bai le ndro su, su da beg bo gord me ndro io, beg dieni io. 4Dandu ien e ilmui bui, 5dandu ibdi hom bison adu, hom bihilou ad Jesu Kristo gle nambuldu bugane, dege su Apostel su gin hinen i, ma su ndern ad Ndorlaben Jesu, ma Petrus dagara lie? 6Io ge, sor Barnabas iou da bo mburer ge le gan anu dandu bieni mburer adu dege su gin hinen i lie. 7Sie i da bo bahun be Ndorlaben i de surien mburer aden bui? Sie i da bo mburer le beleng aden, i de gien sengen ber beleng aden bui? Sie i da bogulue su bulmagou, i de ilmui sus asu bulmagou bui? 8Hanguruen ordo dagara i hanguruen ad hom ndramed molhege ber boan de derbe? I dege hanguruen ad Jehova bugane? 9Mose gin hondre le bug aden: Mbue hosi bohon ad bulmagou, mbue sendraini gan anem i da bo mburer leri. Jehova i beg hanguruen su bulmagou ge be su gin hondre nongen ogoro? 10Nongen aden me ndro du ge, aga ndangen. Ehe, Mose gin hondre nongen ogo me ndro du, i da bo mburer le gan anen, i ha leng ien leri bersi muren, i bo mburer le beleng aden, i ha leng ien le sengen ber beleng bersi muren. 11Iou da gin doui gorn ad Jehova le bergolmu, aga longu hendre momen be iou beg ien le gan anmu ie? 12Be su, beg hidi memrad ademu iou ge, iou da molhege, dandu hanguruen memrad ademu bui, iou de gin hanguruen leri bugane, iou mbuere memrad ademu, iou da molhege le gor ademu, debosan homo bo iil le ndro du, iou beg bohernou nongen le Kristo le ndro mu. 13De danmu i bui, su da gin bo mburer le um ad Jehova su hedi memrad ber um ad Jehova, dagara su da bo mburer le logna dohor ad Jehova, dansu hedi gan ad Jehova lie. 14Dagara Jehova i ha lengi i, su da bo mburer le longu ber lang, su ibdi gan ansu lao ad Jesu, su da gin bo mburer le ndro su. 15Io de gin hanguruen memrad asu dagara bui, io de hondre longu ogo le ndro mu bui, beg hanguruen gan anmu malabo, io ha leng gmad hanu, be io beg soling le heb gan anmu, bugane homo de danen behena mugueni ordo bui. 16Be io da bohernou longu ber lang, io de mugueni mburer ordo bui, Ndorlaben i rendegien io, io ghinen i. Be io de hinen i bui, io gina momen ge. 17Be io ha somui le bergolo, be io da hilou ge, iou da bo mburer ad Ndorlaben, surien ordo irbelengen io. Be ndrno i gosusngo le mburer ad Jehova io ghinen i dege hom lao dandendegei ad Ndorlaben i ghinen mburer aden, i ha lengi i, de i mbueren. 18Sehe surien irbelengen io, aga surien ordo ge: Io da bohernou longu ber lang le ndro su, io mbuere hedi heb surien asu, io da hanguruen memrad asu hebsa bui.
19Io dono bo mburer dege io ha lengi, hom ndramed ber boan de danen rendegien io bui, e lele, io dege hom lao dandengegei asu ndramed masigane, io beg rui su mabosanged le ndro Jesu. 20Le ndro su Juda, io homo asu Juda, beg rui su Juda le ndro Ndorlaben, le ndro su, su da hanguruen nongen ad Mose, io homo asu, io beg rui su holel asu le ndro Ndorlaben. (Nongen ad Mose de gin ndounen io bui.) 21Le ndro su Haiden de dansu nongen ad Jehova bui, io dege homo asu, io de gin hanguruen nongen ad Mose bui, io de bieni nongen ad Mose bui, nongen ad Kristo i da ndro io, io ha leng rui su, su de dansu nongen le Mose bugane, le ndro Kristo. 22Le ndro su heb ndoa bui, io dege homo asu, beg rui su heb ndoa bui le ndro Jesu, le ndro su masi io dege su masi, io ha leng rui su holel asu le ndro Ndorlaben. 23Io da bo mburer ge le nongen hian ber lang, io gibdi surian ber gor lundielang. 24De danmu bui, su da hilou vonuon su masi su hilou, homo ge i da hanu le asu masi, i hedi surien, hian mu hilou, hian mu ibdi memrad ber lang. 25Homo ma homo i da beg hilou, i da beg hidi le memrad, i gbieni longu hendre e hendre, i da hinen mandrn momen ge. Ma su da hilou, su ngab heb memrad molhege ber boan, salion ber louge molhe. Iou ge, iou hilou, iou ngab gle memrad ber lang. Iou de los bui. 26Io de hilou molhege bui, io da bo iil molhege bugane. 27Io ndounen mondro io ghinen i dege io ha lengi, io mbuere io da gin loh su gle iil ad Jehova, io na glos le iil ogo.
Nu geselecteerd:
Korint I 9: LLENT
Markering
Kopiëren
Vergelijk
Delen
Wil je jouw markerkingen op al je apparaten opslaan? Meld je aan of log in
Published by the British and Foreign Bible Society 1956