Korint I 10
10
SU ISRAEL GIN LOS LE SAL ASU, NONGEN OGO BEG HENUNUEN SU KRISTEN.
1Mu ndere hian, io ha leng boharni le ndro mu longu hendre ogo: Ndoulang ad Ndorlaben i da gin mbsig le ndro su Juda, be su da le marboga, i gin bogulue su masi. Su masi su gin dogi le sal ndas. 2Su masi gin hedi gelman ad Mose, be su da le ndas, be su gin dogi le ndoulang. 3Su masi gin ien gan hian ber lang. 4Su masi gin ilmui le ndran ad Ndorlaben Jehova, le ndran i da gin meher le lundiebad, aga i ge, i la born ndro su le sal asu, bad ogo aga Kristo. 5Jehova i gin bieni su mabosanged asu, i gin daii su le marboga. 6Su gin hondre long ogo, beg henunuen du, debosan iou da bo momen dege su gin hinen i. 7Mbue dirhor le ndro su beld, dege su holel asu gin hinen i, dege su gin hondre goru: Su ndramed gin lugdo im boan, su beg ien gan su beg ilmui, su bo gous boen su dne su bo ndan. 8Iou mbuere hinen longu momen le sungsou dege su holel asu gin hinen i. Su maborungul e madilbou su gin los, gin mad le bing si. 9Iou mbuere seslaini Ndorlaben, dege su holel asu gin hinen i, boen su moad gin meher, gin daii su. 10Mbue bangondrngondr dege su holel asu gin hinen i, ma su gin los, Ndorlaben gin daii su. 11Su gin hondre longu ogo masigane me ndro du, su beg sendraini du le longu ogo masi le ndro su, su da baghege le rang i da beg giau. 12Be homo i hanguruen i ndoa, i bogulue bergoln, debosan i na glos. 13Longu hendre e hendre gin seslaini mu, Jehova i da gin hanguruen mu, i bogulue mu debosan mu glos, i hengeni me ndro mu, mu ndoa ge le seslaini. 14Mu ndere hian, e bieni dirhor le ndro su beld. 15Io da bosoui nongen ogo le ndro su ndramed, hanguruen asu i monen ge, ghanguruen nongen ordo io da gin bai, i hian de i momen. 16Lumiandrunvain iou da bo lodu leri aga ndrai ad Kristo de bui? Suslong iou da iendri, aga mandrn ad Kristo de bugane? 17I suslong si ge, dagara iou masigane iou mandrn ad homo ge, iou da iendri le suslong ogo iou masi ien leri. 18E lele su Israel ber boan ogo, su masi su da ien le gan ber logna dirhor ad Jehova su ad Jehova? 19Derbe, su holel su vong su bai: Gan ansu beld, su da gin dirhor le ndro su beld, aga molhege? Su vong su bai, su beld su molhege. 20Bugane, su Haiden su da dirhor gan ansu, su de dirhor le ndro Jehova bui, su dirhor le ndro su beld ge, io mbuere mu da le molengasu beld. 21De danmu gien le lumiandrunvain ad Ndorlaben ma le lumiandrunvain asu beld bersi bui, de danmu lugdo le mandrgosgeao ad Ndorlaben, ma le mandrgosgeao asu beld bersi bugane. 22Iou ha lengi Ndorlaben adu i daui gus aden me ndro du ie? Iou ndoa le aden danen ndounen i? 23Mu bai: Dandu hinen longu masigane, io bai: Hendre ge longu masi i hian le ndro mu bui. Mu bai, dandu hinen longu masigane, hendre ge longu masigane de danen sobani mu bui. 24Mbue hanguruen memrad ademu ge, osbani homo ma homo gle memrad ad nderm lie. 25Gien longu masigane su da hur le logna bah, mbue ndemani su gan ogo i derbe. 26Gor masi, ma longu masi i dari i ad Ndorlaben ge. 27De hom Haiden i ndemani mu le gous aden, mu gien longu masigane, i da daui le geao ademu, mbue ndemani aga gan derbe. 28Be homo i bai le ndro mu: Aga gan le dirhor adu, mbue gien leri, osbani i, i da gin vong, i gin bai: Aga gan le dirhor asu, debosan i glos. 29Io da hanguruen le longu ogo bergoln ad ndern, homo i de danen dieni io bui, io dono sehe longu i hian, sehe longu i momen. Homo i da beg dieni io derbe? 30Be io da mugueni Jehova le gan si, gan ono, io da gin bo lodu leri, i hian me ndro io. Sie danen dieni io leri? 31Be mu da gien, be mu da ilmui, be mu da hinen longu hendre e hendre, gabmugueni Jehova gleri. 32Mbue hinen longu hendre e hendre su Juda, de su Grek, de su ber lodu ad Jesu ndrnesu i irgu leri 33Dege io da hinen i, io da hanguruen heb longu ordo bui, io ha leng sobani su ndramed masi, beg rui su le ndro Kristo.
Nu geselecteerd:
Korint I 10: LLENT
Markering
Kopiëren
Vergelijk
Delen
Wil je jouw markerkingen op al je apparaten opslaan? Meld je aan of log in
Published by the British and Foreign Bible Society 1956