Populaire Bijbelverzen uit ꠁꠘ꠆ꠎꠤꠟ ৬: ꠞꠥꠝꠣꠘ 5

Delen

ꠅꠁꠟꠦ ꠀꠝꠞꠣ ꠉꠥꠘꠣꠉꠣꠞ ꠢꠣꠟꠔꠦꠃ ꠀꠟ-ꠝꠍꠤꠄ ꠀꠝꠞꠣꠞ ꠟꠣꠉꠤ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠂꠘ। ꠅꠈꠣꠘ ꠕꠣꠇꠤ ꠙꠞꠝꠣꠘ ꠝꠤꠟꠦ, ꠀꠟ꠆ꠟꠣꠄ ꠀꠝꠞꠣꠞꠦ ꠇꠔ ꠝꠣꠄꠀ ꠇꠞꠂꠘ।

ꠀꠞ ꠅꠃ ꠀꠡꠣ-ꠜꠞꠡꠣ ꠛꠦꠇꠣꠝꠣ ꠎꠣꠄ ꠘꠣ। ꠇꠣꠞꠘ ꠀꠟ꠆ꠟꠣꠄ ꠀꠝꠞꠣꠞꠦ ꠎꠦ ꠙꠣꠇ ꠞꠥꠢꠥ ꠖꠤꠍꠂꠘ, ꠁ ꠙꠣꠇ ꠞꠥꠢꠦ ꠀꠝꠞꠣꠞ ꠖꠤꠟꠞ ꠝꠣꠎꠦ ꠀꠟ꠆ꠟꠣꠁ ꠝꠢꠛ꠆ꠛꠔ ꠎꠘꠝꠣꠄ।

ꠈꠣꠟꠤ ꠁꠈꠣꠘ ꠘꠣꠄ, ꠀꠝꠞꠣ ꠖꠥꠈ-ꠇꠡ꠆ꠐꠞ ꠝꠣꠎꠦꠅ ꠈꠥꠡꠤ-ꠛꠣꠡꠤ ꠇꠞꠞꠣꠝ। ꠇꠣꠞꠘ ꠖꠥꠈ-ꠇꠡ꠆ꠐꠄ ꠍꠛꠞ ꠀꠘꠦ, ꠍꠛꠞꠦ ꠝꠦꠅꠀ ꠚꠟꠦ, ꠅꠃ ꠝꠦꠅꠀꠄ ꠀꠡꠣ-ꠜꠞꠡꠣ ꠀꠘꠦ

ꠁꠝꠣꠘꠞ ꠝꠣꠎꠖꠤ ꠀꠝꠞꠣꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠣ ꠅꠁꠍꠦ, ꠉꠔꠤꠇꠦ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠟ꠆ꠟꠣ ꠙꠣꠇ ꠀꠞ ꠀꠝꠞꠣꠞ ꠝꠣꠎꠦ ꠡꠥ-ꠡꠝ꠆ꠙꠞ꠆ꠇ ꠛꠅꠀꠁꠟ ꠅꠁꠍꠦ। ꠅꠃ ꠎꠦ ꠞꠢꠝꠔꠞ ꠔꠟꠦ ꠀꠝꠞꠣ ꠀꠍꠤ, ꠀꠟ-ꠝꠍꠤꠄ ꠀꠝꠞꠣꠞꠦ ꠁ ꠎꠣꠉꠣꠔ ꠀꠘꠤꠀ ꠙꠃꠍꠣꠁꠍꠂꠘ। ꠄꠞꠟꠣꠉꠤ ꠀꠟ꠆ꠟꠣꠞ ꠝꠢꠤꠝꠣ ꠙꠣꠅꠀꠞ ꠀꠡꠣꠄ ꠀꠝꠞꠣꠞ ꠝꠘ ꠅꠈꠘ ꠘꠤꠌ꠆ꠌꠤꠔ ꠈꠥꠡꠤꠄ ꠜꠞꠤ ꠉꠦꠍꠦ।

ꠀꠝꠞꠣ ꠔ ꠇꠝꠎꠥꠞ-ꠟꠣꠌꠣꠞ ꠀꠍꠟꠣꠝ, ꠡꠑꠤꠇ ꠡꠝꠄꠄ ꠀꠝꠞꠣꠞ ꠟꠣꠈꠣꠘ ꠉꠥꠘꠣꠉꠣꠞꠞꠦ ꠛꠣꠌꠣꠘꠤꠞ ꠟꠣꠉꠤ, ꠀꠟ-ꠝꠍꠤꠄ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠟꠣ।

ꠀꠞ ꠀꠟ-ꠝꠍꠤꠞ ꠇꠥꠞꠛꠣꠘꠤꠞ ꠃꠍꠤꠟ꠆ꠟꠣꠄ ꠎꠦꠛꠟꠣ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠅꠁꠍꠤ, ꠔꠦ ꠅꠈꠘ ꠀꠟ-ꠝꠍꠤꠞ ꠝꠣꠎꠖꠤ ꠀꠝꠞꠣ ꠀꠟ꠆ꠟꠣꠞ ꠡꠣꠎꠣ ꠕꠣꠇꠤꠅ ꠞꠦꠢꠣꠁ ꠙꠣꠁꠝꠥ, ꠁꠐꠣ ꠔ ꠡꠥꠟ꠆ꠟꠀꠘꠣ ꠘꠤꠌ꠆ꠌꠤꠔ।

ꠎꠦꠝꠘ ꠗꠞꠅ, ꠄꠇꠎꠘ ꠝꠣꠘꠡꠞ ꠅꠛꠣꠁꠖ꠆ꠖꠔꠣꠞ ꠟꠣꠉꠤ ꠛꠃꠔ ꠝꠣꠘꠥꠡ ꠉꠥꠘꠣꠉꠣꠞ ꠅꠁꠍꠂꠘ। ꠅꠃꠟꠣ ꠄꠇꠎꠘ ꠝꠣꠘꠡꠞ ꠛꠣꠁꠖ꠆ꠖꠔꠣꠞ ꠟꠣꠉꠤ ꠛꠃꠔ ꠝꠣꠘꠡꠞꠦ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠣ ꠅꠁꠍꠦ।

ꠈꠣꠟꠤ ꠁꠈꠣꠘ ꠘꠣꠄ, ꠎꠣꠞ ꠃꠍꠤꠟ꠆ꠟꠣꠄ ꠅꠃ ꠝꠤꠟꠘ ꠅꠁꠍꠦ, ꠀꠝꠞꠣꠞ ꠝꠣꠟꠤꠇ ꠅꠃ ꠁꠍꠣ ꠀꠟ-ꠝꠍꠤꠞ ꠝꠣꠎꠖꠤ ꠅꠈꠘ ꠀꠟ꠆ꠟꠣꠞ ꠘꠣꠝꠦ ꠈꠥꠡꠤ-ꠛꠣꠡꠤꠅ ꠇꠞꠞꠣꠝ।