Like 23
23
Jesu o mwa Pilate
1Baari aso asarihi, ayeni na Jesu mwa Pilate. 2O ŋa bo aya ma banaha nde ndi: «Bisi lemi mono mvuuru yu, nde ataasa baari a bisi, nde aliha baari owʉra lepo le Sesare. Nde anku aduha ndi nde Krisi, nde se nkani.» 3Pilate olehi nde oduhu ndi: «We nkani Ajife?» Jesu okaali nde ndi: «We anku aduha.» 4Pilate oduhi na ankʉmu ma asi ma avwoŋi bɨla lemvuuru ndi: «Me i mono obila ma buma mvuuru yu o co ni.» 5Ŋa bo aselihi ojisiha ndi: «Nde acyese baari mo mbari e nde ayisiha, nde oma baana o Ngalili, omi yira o Jude eso, omana omi to tii ngo kuuni.»
Jesu o mwa Erode
6Ntini e Pilate ayuhi vwa nde opɨsi ndi: «Balaha ji osi Ngalili?» 7Nde oyaa ndi Jesu awihi na onguundu Erode akihi nkʉmu, nde ovuuri Jesu mpili Erode, obila nde se akihi o Jerusaleme me ecuhu bya. 8Erode omoni ove bo mini ntini e nde amoni Jesu. Obila nde aki oma yuha ma wobo o nde. Erode se aki na njala omono Jesu osa omaa o miisi a nde. 9Nde olehi nde eduhu ekuna kuna, ŋa Jesu aka kaala ja se lemo ni. 10Ankʉmu ma asi ma avwoŋi, bɨla ayisihi me ekele selehe obanaha Jesu. 11Erode bɨla aworo a nde, ma sebe nde, bo ayahi nde o mvuuru oca. Bo alaasi nde mfa e mvunu emana bo avuuri nde mpili e Pilate. 12Erode bɨla Pilate aki abuha ma ombangu na kala, ŋa o cuhu jya bo akirihi andihi.
Opami a Jesu bɨla leku
13Pilate okusihi ankʉmu ma asi ma avwoŋi bɨla ankani na baari. 14Nde na bo ndi: «Be lema aya na me mvuuru yu mbɨri nde atosoho baari, ŋa me emi lehe nde oduhu o mwa be, ŋa me eka mono ja e mbi e be lebanaha nde o yo ni. 15Erode se aka mono ja e mbi ni, kya obila o nde atumi nde mpili e bisi. Balaha ji eka asa ja e mbi eli ove abumi nde o yo ni. 16Me etuma abeere nde ekaci, omana me nyasaha nde.» 17Acinda a Paake aso, eki ove Pilate otusihi mvuuru omo ma ongenehe. 18Bo aso awʉli ankɨma ndi: «Buma balaha ji! Nyila bisi Barabase!» 19Barabase aki alehi ongeneŋe, nde acyesihi baari nca onguundu, nde se abumi mvuuru. 20Pilate aki na njala onyasaha Jesu, ŋa nde ovurihi oyahi mbari. 21Ŋa bo awʉli ankɨma ndi: «Komo nde ma lembanji! Komo nde ma lembanji!» 22Mo jwe le otari Pilate oyahi mbari ndi: «Nde ja e mbi ama sa ma? Me eka mono ja ma buma nde o yo ni. Ŋa me etuma abeere nde ekaci omana me nyasaha nde.» 23Ŋa bo aselihi ojisiha na ankɨma a nkala ndi: «Komo nde ma lembanji!» Ŋa ankɨma a bo avʉli. 24O ŋa Pilate oyalihi ndi bo asa mo osuumbu a bo ma dya. 25Nde onyasihi balaha e bo ma pɨsihi, eki mo ongeneŋe. Obila nde acyesihi baari na nde se abumi mvuuru. Nde ompi bo Jesu mo bu ndi, bo asa nde mo osuumbu a bo ma dya.
Leku le Jesu o yula lembanji
26Ntini e bo ma birihi nde, bo akwari balaha mo ewa na anguunu, nkuumi e nde Simo osi Sirene. Aworo akwari nde, ma obira lembanji ngula Jesu. 27Lemvuuru le kuna leki lelwono nde, eki se na akaasi, ma lila. Ma amono obi obila o nde. 28Ŋa Jesu okalihi mpili e bo na bo ndi: «Akaasi a Jerusaleme, leka liliha o me ni! Lelila o be anku na mo baana a be! 29Obila, antini ma aya, ma aje oduha ndi: “Oswere oka na akaasi ma onguma bɨla akaasi ma akini okʉla ni, na ma kini ompa baana abyele ni!” 30O ŋa baari ma aje oduha na ekuri ndi: “Leva o yula bisi!” Na ŋa enguma ndi: “Lejisiha bisi!” 31Obila yuhu ma asa bu ma oti obisi, ŋa ma aje osa buni ma oti ama kaa?» 32Ayi na abalaha akɨmavwele ma abi se, mo obuma bo bɨla Jesu. 33Bo ato obiri ma cwoloho o «Kraane#23.33 Kraane kuumi okuri ma komi Jesu ma lembanji. O juuhi la Ajife: Golgota. Ŋa ma lembaama okoko ocwi. Obila, okuri kya oki oma wwana okoko ocwi.», aworo akomi Jesu o kuri bɨla abalaha vwele ma abi, yu o kwoho olumi, yu mo kwoho omboho. 34Ŋa Jesu oduhi ndi: «E Taara boloho bo obila bo i yaa maami a bo ma syaha ni.» Aworo akabihi amfa a nde o mpaniŋi e bo. Bo aya ma taama ma oswolo mo. 35Baari aki ŋa ma okeese. Ankʉmu ma Ajife aki ma sebe nde ndi: «Nde oma vusaha baari akɨma, ŋa nde se ovusaha nyuru e nde anku, yuhu nde Krisi a Njyami ama swolo!» 36Aworo se asebihi nde, ma ciina mpili e nde, na lempa le nde mali a ŋayi. 37Ma duha ndi: «Yuhu we nkani Ajife vusuha nyuru e we, we anku!» 38Ŋa leyulu le ocwi a nde aki amateende ndi: «Yu nkani Ajife.» 39Balaha mo o nca embeŋe e jyele ma komi bɨla Jesu, aki aduha na nde ndi: «We ka Krisi ni? Vusaha nyuru e we we anku, we se ovusaha bisi!» 40Ŋa buha omo obye na nde ndi: «We vwoho o Njyami kali, ni we ma aliisa bɨla nde ŋa se osuumbu omo? 41Mo saawe yemiŋi, saawe lemono ampasi, obila saawe maami abi. Ŋa nde aka sa ja e mbi ni.» 42Emana nde oluusi ndi: «Jesu yibaha me o ntini e we aje oya mo oka nkani.» 43Jesu okaali na nde ndi: «Me eduha we sisyele, lobi we aka bɨla me o biri e mve.»
Leku le Jesu
44Tari leki leya o mwa njanga, mwi odimi, lempiibi leyi mo osi oso, atari ayiri. 45Mwi odima, mfa eki nca njo e Njyami ebaahi o mwa kari. 46Jesu owʉli nkɨma enini oduhi ndi: «E Taara me evuura odidima o me nca jyala e we.» Nde omana owobo vwa, nde okwi. 47Nkʉmu aworo ma ekuumi kuumi amo osi o Rome, omoni maami ma yirihi, okuusi lekʉma le Njyami oya aduha ndi: «Jaa jaa balaha ji eki opeende!» 48Lemvuuru leso leki leyi, ma omono maami alwari maa, lemoni mo. O ŋa bo avirihi na okʉruha endundu#23.48 Mpili a Ajife, lekuruha le ondundu, ma olaha ndi baari ali o ndoho, si kali bo ami mono obi. ma obi o bo ma amoni. 49Andihi a Jesu aso bɨla akaasi ma baani olwono nde, nkara Ngalili, ma keese osuumbu e maami ma ayirihi.
Alehi Jesu o muuma
50Eki na balaha mo ma cwolihi o Jusefe nde aki nca ankani ma Ajife. Balaha jya ekihi tele nde se aki balaha e mve. 51Nde aka yalaha opami bɨla maami a bo ma asihi ni. Nde aki osi Arimate onguundu Ajife. Nde aki adɨla Onkani o Njyami. 52Nde oyeni mpili e Pilate ma opɨsa obiimi o Jesu. 53Emana nde ocyesi obiimi o yula lembanji, okuri nca mfa e mvunu. Ocuusi nca muuma macimi o nca akele#23.53 Mpili a Ajife amuuma akihi yula ekuri ma akele, atubi bulu o nca mo., muuma jwa aki akini ojiiha mvuuru okɨma ni. 54Eki eya tuha na cuhu mawuumaha. Cuhu jya eki eya eciina. 55Akaasi ma awi bɨla Jesu nkara Ngalili alwoni Jusefe, bo akeesi nca muuma, na osuumbu ma cuusi obiimi o nde. 56Emana bo ayeni anjo, bo ayeesi maari bɨla eyombo ma obiimi. Bo anyiimi cuhu mawuumaha mva ma amateende nca ekele.
अहिले सेलेक्ट गरिएको:
Like 23: MDT
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
