Like 22
22
Ankʉmu ma akura cuumu oma Jesu
1Cinda e Paake eki eya eciina. 2Ankʉmu ma asi ma avwoŋi bɨla ayisihi me ekele, asahi osuumbu mo obuma Jesu, ŋa bo aki na vwoho o baari.
Juda atosoho Jesu
3Ŋa Jabɨri onyunihi o Juda ma acwoloho mo Sikariote, nde aki ntuma omo, nca antuma a kuumi na vwele. 4Ŋa Juda oyeni na ayeese bɨla ankʉmu ma asi ma avwoŋi, na ankʉmu ma akyelehe njo e Njyami, osuumbu a nde atosoho Jesu. 5Bo amoni ove bo mini, bo alehi nde ndayi ndi bo ma mpa nde adoro. 6Nde oyalihi, emana nde osahi osuumbu ma otosoho Jesu ma ajisihi. Lemvuuru i yaa ni.
Jesu aja Paake bɨla alwoni a nde
7Cuhu e cinda e mpeembe eli leviire kali eto, aya ma buma baana me endoombo o Paake. 8Jesu otumi Pyere bɨla Jan ndi: «Lejyehe na alaama saabe biila e Paake.» 9Bo apɨsi nde ndi: «We asaha mbɨri bisi lelaama jo kuni?» 10Nde okaali na bo ndi: «Ntini e be lenyuniha nca onguundu, be levunuha na balaha mo, ama bira mbasa anja o yula ocwi. Be lelwoni nde tii ngo nca njo e nde anyuniŋa o yo. 11Be leduhi na onga njo mbɨri: “Nkʉmu apɨsa we ndi biri e nde aja biila e Paake bɨla alwoni a nde eli kuni?” 12Nde aje olaha be otini o njo o yulu#22.12 Biri ema oja biila. ama yeese. Jya biri e be leje olaama.» 13Bo ayeni, amoni maami mo osuumbu a Jesu aduhi bo. Bo alaami biila e Paake.
Biila e Nkʉmu
14Ntini oja eto Jesu okumi o tanda bɨla antuma a nde. 15Nde na bo ndi: «Me edii kuna oja biila e Paake bɨla be, omana me ema mono ambaba! 16Obila me eduha be, me eka aje oma ja yo bɨla be ni, tii ngo e Njyami ayeese Paake nca Onkani o Nde.» 17Nde oyahi kobo e mali, ompi Njyami leve, emana nde ndi: «Leyaha be lekaba o mpaniŋi e be. 18Ŋa me eduha be, mo obaana o cuhu e lobi me eka ma nywa mali ba ni tii ngo Onkani o Njyami ma oya.»
19Emana nde oyahi lempeembe, omana ompa Njyami leve, nde ocebi lo, ompi bo ndi: «ji nyuru e me ma ama mpa o be. Lesa vwa ma oyibiha me.» 20Bo amana oja, nde se oyahi kobo e mali, na bo ndi: «Kobo e mali ji ondihi ma onyarihi, oma tohi le me, leje okele obila o be. 21Ŋa lemono, mvuuru aje otosoho me oli bɨla me o tanda ŋa! 22Ŋa Mwana mvuuru aje okwa mo osuumbu a Njyami ayeesi. Ŋa ndoho eka na mvuuru atosoho nde!» 23O ŋa alwoni aya ma pɨsa o mpaniŋi e bo ndi: «Mvuuru abuuna osa jaa mva jya na?»
Avʉli okiimi o mpaniŋi alwoni na?
24Alwoni aya ma wobo o mpaniŋi e bo. Bo ma pɨsa abuha ndi: «Mvuuru aveli abuha okiimi o mpaniŋi e saabe ŋa na?» 25Jesu okaali na bo ndi: «Ankani me esi, na onkʉmu o yula baari. Bo njala ndi acwoloho bo o “baari ma syaha leve”. 26Ŋa be lekaa syaha mva bo ni. Mvuuru avʉli okiimi o mpaniŋi e be, ove nde oki mva mwana onkere. Mvuuru ali nkʉmu, ove nde oki mva ojanji. 27Mo be avʉli okiimi na? Mvuuru ali o tanda si mvuuru alehe biila o tanda? Mbaa mvuuru ali o tanda? Ŋa me eli o mpaniŋi e be mva mvuuru aleehe biila mo tanda! 28Be leki bɨla me ma antini a me ma ampasi. 29Ŋa mo osuumbu a Taara a me ama mpa me Onkani, me se empa be Onkani vwa. 30Be leje oja, be lenwa o tanda nca Onkani o me. Be leje oka ma anci o yula ambara, ma opama ankaka a kuumi na vwele a Isayele.»
Jesu awobo mo Pyere aje obɨsa nde
31Nkʉmu ndi: «E Simo, Simo! Sa ayiba: Sata asaha be, ma oswesehe be aso, mva ma nyengese mburu. 32Ŋa me ema vwono o we obu mbɨri we i ma yele oyalihi ni. Ŋa ntini e we aya na vuruha, we ompi baana ma anguhu a we mpari.» 33Pyere na nde ndi: «E Nkʉmu, me ebuuna oje ongeneŋe bɨla we, me se ebuuna okwa bɨla we.» 34Jesu okaali na nde ndi: «E Pyere me eduha we, lobi ncusu a ncomi a ka sa kwoho ni, we akemehe me ekʉru etari.»
Adoro bɨla mpye na baha ampele mwele
35Emana Jesu na bo ndi: «Ntini e me etumi be adoro kali, mpye kali na akoroho kali, be leki leyeli kiila?» Bo akaali ndi: «Kali.» 36O ŋa nde na bo ndi: «Ŋa mo obaana o cuhu e lobi, mvuuru ali na adoro oyahi, ali na mpye se oyahi. Mvuuru ali baha ampele mwele kali, otehi mfa e nde anku ma osuuma baha ampele mwele. 37Obila me eduha be, amateende o me nca Osaangumu ndi: “Ama tala nde nca embeŋe.” Mo oma, maami ma amateende o me, aya oto.» 38Bo na nde ndi: «Nkʉmu mono abaha ampele mwele.» Nde okaali na bo ndi: «Abaha mwele ma ampele mwele, ami to.»
Jesu avwono ma okuri eti ma Eliive
39Jesu ocuuhi ma otiiri a nde, oyeni okuri eti ma Eliive ŋa alwoni a nde se alwoni nde. 40Ntini e nde ato obiri jya, nde na bo ndi: «Levwono obu mbɨri be i ma va o nca ecinihi me ebi ni.» 41Emana nde olabihi na bo nceeri, owʉri avwo oya avwono ndi: 42«E Taara yuhu we adya, we osa mbɨri kobo e mpasi ji elabaha na me, ŋa ka ma ejiiŋi e me ni, ma ejiiŋi e we.» 43O ŋa obaanji a Njyami owi yulu, oyi na ampa nde mpari. 44Jesu omoni ongwo, oyiha avwono na mpari eso, njanihi e nde eyiha ecolo o ncye mva ataŋi a tohi. 45Nde omana ovwono, otemihi, oyi na vuruha mpili alwoni, omoni bo ali antolo. Ama kolo ma obi o bo ma amonihi. 46Nde na bo ndi: «Be leca antolo bu mo oma? Letemehe be levwono, be i ma va nca ecimiŋi me ebi ni.»
Ma akwara Jesu
47Jesu aki okini awobo, lemvuuru lewasihi. Ntuma a nde omo nca antuma a kuumi na vwele ma cwolihi o Juda, aki levusu le bo. Nde ociini tuha na Jesu mo ompa nde amfemfe. 48Ŋa Jesu na nde ndi: «Juda we atosoho Mwana mvuuru ŋa ma amfemfe?» 49Baari ma kihi bɨla Jesu amono vwa, bo na nde ndi: «E Nkʉmu, bisi lebeere bo ma ampele ma abaha a bisi?» 50Ŋa omo o mpaniŋi e bo, obeeri ojanji osi avwoŋi onini, emana ocebi nde cwi le kwoho olumi. 51Ŋa Jesu ndi: «Lenyila vwa!» Nde otiili cwi le balaha jya, osalihi nde. 52Emana Jesu oduhi na ankʉmu ma asi ma avwoŋi bɨla ankʉmu ma akyelehe njo e Njyami, na akuuru ma ayi na kwara nde ndi: «Be leyaha me mva ombeŋe, eli be lema aya bɨla abaha na ankʉmuha? 53Me eki bɨla be ecuhu eso o nca njo e Njyami, be leka saha okwara me ni. Ŋa ji eya ntini e be bɨla mpari lempiibi.»
Pyere atuna Jesu
54Ŋa bo akwari Jesu, ayeni ŋa nde nca njo osi avwoŋi onini. Pyere aki alwono nde o lala. 55O mwa lebuhu, aki ama vwa mbaa, baari ali ma anci ama ajenehe yo. Pyere oya o nci bɨla bo. 56Ojanji omo okaasi omoni Pyere o nci tuha ŋa mbaa, okeesi nde yemiŋi ndi: «Balaha ji se eki bɨla Jesu!» 57Ŋa Pyere otuni, na nde ndi: «Kali me i yaa nde ni.» 58Antini ayira, mvuuru okɨmaomoni nde, oduhi ndi: «We se a bɨla bo!» Pyere okaali na balaha jya ndi: «Kali, me ka a bɨla bo ni.» 59Tari mo eyira, okɨmaovurihi ojisihi ndi: «Sisyele yu se aki bɨla nde, obila nde se osi Ngalili.» 60Ŋa Pyere okaali ndi: «Me i yaa a we ŋa saha oduha ni.» O ŋiŋa nde aki okini awobo, ncusu okwohi. 61Nkʉmu okalihi, okeesi Pyere, o ŋa Pyere oyibihi mbari e Nkʉmu aduhi na nde ndi: «Ncusu ancomi aka sa kwoho ni, we atuna me amihi atari.» 62Pyere ocuuhi, oyiha alila kuna.
Lebeere na letuha le Jesu
63Abalaha ma kyelihi Jesu aki ma lelehe nde, bo se ma beere nde. 64Bo adibihi nde olya ma amfa, emana aya ma pɨsa nde ndi: «Owobi a mbari e Njyami, Mvuuru abeeri we na? Ma yiimba!» 65Ŋa bo aselihi otuha nde.
Jesu o mwa ankani ma anini
66Cuhu eca, akuuru mo okuha bɨla asi ma avwoŋi ma anini, na ayisihi me ekele, akusihi abuha. Bo ayeni na Jesu mpili ankani ma anini, ma opama nde. 67Bo apɨsi nde ndi: «Yuhu we Krisi duha bisi.» Nde okaali bo ndi: «Me oduha be, be lekaa yalaha me ni. 68Ŋa me se olehe be oduhi, be leka kaala me ni. 69Ŋa mo obaana o cuhu e lobi, Mwana mvuuru aka o nci mo kwoho olumi o Njyami a mpari.» 70Bo aso apɨsi nde ndi: «We ŋa njaa Mwana Njyami?» Nde okaali bo ndi: «Be anku leduha mbɨri me Mwana a Njyami.» 71O ŋa bo aduhi ndi: «Bisi kaama mo mvuuru asiisa enwa kali! Bisi anku lemi yuha mbari e ma onwa a nde!»
अहिले सेलेक्ट गरिएको:
Like 22: MDT
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
