Like 24
24
Enyusihi e Jesu
1Cuhu e ncomi nca ecuhu ncaami e janja#24.1 Cuhu jya mva cuhu e pulu na saabe. E bo ma baana janja. nkara encyere, akaasi ayeni ancwo. Bo abiri maari bɨla eyombo e bo ma ayeesi. 2Bo amoni ndi kele ledibihi onwa a muuma, ami buuna o paani. 3Bo anyuniŋi ŋa bo aka basaha obiimi o Jesu a Nkʉmu ni. 4Bo aki i yaa jaa oduha ni. Abalaha vwele ayi na e bo ama laasa amfa ma kyeme. 5Akaasi amoni vwoho, apiisi miisi o ncye. Abalaha ba na bo ndi: «Be lesaha mvuuru ali mwo o mpaniŋi akwi mo oma? 6Nde kuuni onyaŋa, nde oma nyusiha. Leyibaha maami a nde aduhi be o ntini e nde aki okini o Ngalili. 7Nde aduhi ndi: “Ove ampi Mwana mvuuru o jyala ma anga ambiini akomi nde ma lembanji, ŋa cuhu otari nde onyusihi nca leku.”» 8Ŋa akaasi ayibihi mbari e Jesu. 9Bo acyehi ancwo ayeni na aduha na antuma akuumi na omo bɨla alwoni maamo aso. 10Eki na Mariya a Madala, na Jaane bɨla Mariya a nguhu a Jake. Ŋa eki na akaasi akɨma ma ayeni na aduha maami maa na antuma. 11Ŋa antuma acimihi ndi bo ma aduha maami mo oca. Bo se aka yalaha maami a bo ma aduhi ni. 12Ŋa Pyere otemihi oyeni ancwo o nciini. Nde okemiha bu, omoni amfa atu ma aki ma ama poroho obiimi. Emana nde ovurihi njo nca lekimi mo maami ma ayiri.
Alwoni vwele o njila Emayise
13Ŋa o cuhu ji jya, alwoni vwele o nca bo, ayeni na mpuhu ma cwoloho ma Emayise. Osa atari mwele a jwe ma oto Jerusaleme. 14Bo aki ma awobo o mpaniŋi e bo o maami ma ayiri aso. 15Ntini e bo ma wobihi o mpaniŋi e bo, Jesu nde anku ociini, oya alaana bɨla bo. 16Bo ma mono nde, okoroho bo i yiimba nde ni. 17Jesu opɨsi bo ndi: «Be oma lejyehe na owobo?» O ŋa bo asuri, bo aya ma mono obi. 18Omo o mpaniŋi e bo a vwele, a nkuumi Klopase okaali nde ndi: «Ali i yaa maami ma ayiri o Jerusaleme me ecuhu bi ni, mini we otu?»
19Nde opɨsi bo ndi: «Mo ama?» Bo akaali nde ndi: «Maami ma ayiri o Jesu a Najarete! Nde aki owobi a mbari e Njyami onini. Mbari e nde eki na mpari. Nde osi maami a lwari, o miisi a Njyami bɨla a baari aso. 20Ankʉmu ma asi ma avwoŋi a saabe bɨla ankʉmu maamo, ama mpa nde ndi abuma nde, emana ama komo nde ma lembanji. 21Bisi leki na tari mbɨri nde avusaha Isayele. Ŋa lobi cuhu otari e maami maa ma asi yira. 22Bisi lema kima, akaasi ake a bɨla bisi ama aje ancwo nkara encyere. 23Ŋa bo aka mono obiimi o nde ni. Bo ayi na avuriha, aduhi ndi bo ami mono abaanji. Abaanji ami duha na bo ndi nde oli mwo. 24Abuha a bɨla bisi ake se ama aje ancwo. Bo amoni maami mo osuumbu akaasi ma aduhi bo. Ŋa bo aka mono nde ni.» 25Ŋa Jesu na bo ndi: «Be baari leli oyalihi kaali. Be ma oyalaha maami ma awobi a mbari e Njyami ma duhi nca etima e be ŋa onono! 26Eki mbaa ove Krisi osi amono ambaba, omana nde onyunihi nca lekʉma le nde?» 27Ŋa Jesu obaani oduha bo maami ma wobihi o nde nca Esaangumu e Njyami eso. Mo obaana ma esaangumu e Moyise, tii ngo esaangumu ma awobi a mbari e Njyami eso.
28Ŋa bo aciina tuha na mpuhu e bo ma yenihi, Jesu osi mva alabaha na bo. 29Ŋa bo akanihi nde ndi: «Ka bɨla bisi, cuhu eya ekolo, lempiibi leya le eya.» O ŋa nde onyunihi nca njo, na aka bɨla bo. 30Nde okuma tanda bɨla bo, nde oyahi lempeembe. Ovwoni, nde ocebi ompi bo lo. 31O ŋa bo miisi anahi, bo ayiimbi nde. Emana nde onywoŋi o miisi a bo. 32Bo aya ma wobo o mpaniŋi e bo vwele ndi: «Saawe leka mono mbaa nca etima e saawe o biri e nde awobihi na saawe o njila, na o nde awobihi saawe o mbari e Njyami eli nca Esaangumu ni?»
33Bo asarihi asisari, avurihi Jerusaleme. Bo amoni antuma a kuumi na omo ama kusaha abuha bɨla abuha akɨma. 34Bo aduhi ndi: «Jaa jaa Nkʉmu ama nyusiha! Nde ama laha nyuru na Simo!» 35Ŋa bo aduhi maami a bo ma moni o njila. Na osuumbu a bo ma yiimbi Jesu, o ntini e nde acebi lempeembe.
Jesu alaha nyuru na alwoni a nde
36Bo aki akini ma wobo vwa Jesu nde anku owasihi o mpaniŋi e bo, na bo ndi: «Oduusu oka bɨla be!» 37Bo amoni ongwo bɨla vwoho yo mini, bo aki ndi odidima obi. 38Ŋa Jesu na bo ndi: «Be lemono ongwo mo oma? Ŋa ekemi nca etima e be buni? 39Lekeese jyala e me bɨla nyiili. Be lemono mbɨri me! Letiila me be lemono. Odidima akabi kali, eyesi kali. Okoroho be lemono mbɨri me na jo.» 40Nde oduha vwa, nde olahi bo jyala bɨla nyiili e nde. 41Bo aki akini nca oswere na lekimi. Bo akini oyalaha ni. Ŋa nde opɨsi bo ndi: «Be kuuni na kiila ma oja?» 42Bo ampi nde otini o ncu ma ama kaanga. 43Nde oyahi co, oji o miisi a bo.
44Emana nde na bo ndi: «Lemono maami a me ewobihi ntini eme eki ekini bɨla be. Maami ma amateende o me nca ekele e Moyise, na Awobi a mbari e Njyami bɨla a Soome, ove amoni mo.» 45Emana nde onaani oyeri o bo mo oyuha maami ma amateende nca Esaangumu e Njyami. 46Ŋa nde na bo ndi: «Ama teende ndi, Krisi ove omoni ambaba, omana o cuhu otari nde onyusihi nca akwi. 47Ma aje otooso mbari o nkuumi e nde, me esi eso. Baari akaala eku, nde oboloho ambiini a bo, mo obaana o Jerusaleme. 48Be baari le siisa enwa o maami maa aso. 49Ŋa me etuma be ndayi e Taara a me alehi be. Be lesa aka nca onguundu, tii ngo e mpari e yulu ewuha be.»
Jesu aje yulu
50Emana nde obiri bo mpili e Betani. Nde osaari jyala na yulu mo ompa bo andosoho. 51Ntini e nde ampihi bo andosoho, nde ocyehi bɨla bo, oyeni yulu. 52Bo amana okumuha ma ovwono o miisi a nde, bo avurihi na Jerusaleme bɨla oswere enini. 53Ŋa bo akiihi antini aso nca Njo e Njyami mo osiha aluumu a Njyami.
अहिले सेलेक्ट गरिएको:
Like 24: MDT
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
