Like 21
21
Okuuli owuha
1Jesu okeesi o paani e nde, omoni anga osolo ma leehi ndamini e Njyami nca anguli a mo njo e Njyami. 2Nde se omoni okaasi okuuli owuha, alehi adoro a nkoso vwele ma akyehe. 3Ŋa nde ndi: «Me eduha be sisyele, okaasi okuuli owuha yu omi vʉla abuha aso ompa. 4Obila abuha alehi adoro a bo ma ali kaama kali. Ŋa nde ampi a nde aki na bo aso ma lebihi le nde.»
Jesu atooso ecalihi e njo e Njyami
5Baari ake aki ma wobo mo njo e Njyami, ma aduha ndi yo na owali na akele a yo ma awali, na biibi ma ampi Njyami. Ŋa Jesu ndi: 6«E be lemono bi eso, ecuhu me eje oya, ma aka ma mono kele o yula kele ni. Ma cala jo eso.» 7Bo apɨsi Jesu ndi: «E Nkʉmu maami maa ma aje oya o jini ntini? Ndiimi elaha maami maa eje oka ma?» 8Jesu okaali na bo ndi: «Leesa ayiba, leka nyiliha akiisi be ni! Obila baari kuna ma aya o nkuumi e me, bo aduha ndi: “Yu me Krisi!” Na “Antini ami to!” Ŋa leka lwonoho bo ni. 9Ntini e be leje oyuha ma wobo ma eta, na baari ma saraha, leka monoho vwoho ni, obila ove maami ma asa aya. Ŋa ntini ekini to ni.» 10Ŋa Jesu oluusi ndi: «Osi omo ejwana bɨla osi okɨma, nkani omo se ajwana bɨla nkani okɨma. 11Ncye edɨla onyuha na mpari, me ebiri kuna, na njala eva bɨla angaa a nkala, ma aje omono maami a lwari, bɨla andiimi o yulu. 12Ŋa levusu le maami ma aso, ma kwara be, be lemono ampasi. Ma aje na be nca anjo mavwonoho ma opama be. Omana alehe be mo ongeneŋe. Ma bira be o miisi ma ankani na apatima, obila o me. 13Maami a be leje omono maa, ma mpa be lengulu ma o siisa enwa o me. 14Lelehe nca etima e be mbɨri: be leka sa baana oyeese maami a be leduha ni. 15Obila me anku empa be mbari bɨla ncimi eli abuha ma ombangu i sa ekemi ni, bo aso se i buuna obɨsa yo ni. 16Na ataara a be bɨla anguhu se, na baana ma anguhu, na nkwono bɨla andihi a be, ma aje ompa be na ankani. Bo se ma aje obuma kuna o mpaniŋi e be. 17Baari aso ma bele be obila o me. 18Ŋa si lemfu lemo le ma ocwi a be leka nywoho ni. 19Lesa nkomoho! Lya lemihi le be le eje ovusuha lebihi le be.»
Jesu atooso ecalihi e Jerusaleme
20«Ntini e be le eje omono aworo ma abuha ma ombangu, ama ajenehe Jerusaleme, be leyaa mbɨri ntini eya tuha ma cala Jerusaleme. 21Ŋa baari ma aje oka o Jude, ove bo adimi mpili ekuri. Baari ma aje oka nca onguundu, ove bo acuuhi. Baari ma aje oka nca anguunu i ma nyuniha nca onguundu ni. 22Obila bya ma eje oka ecuhu e mpasi. Maami ma amateende o nca Osaangumu o Njyami, ma aje oya. 23Ecuhu bya, ma eka ecuhu e ndoho ma akaasi ma ali na ayimi, na ma ampa baana abyele! Mpasi yo mini eje oka mo osi ki. Ŋa nkala e Njyami eje oya o yula baari amo osi ki. 24Ma aje obuma ake ma ekwere, ma aje obira bo mbɨri engenehe nca esi eso. Ŋa baari ame esi ekema, acala Jerusaleme, tii ngo antini a baari baa ma aje oyira.»
Ejihi e Mwana mvuuru
25«Andiimi ma aje oka o nca tari bɨla ngondo na anyari. O yula ncye, esi ma eje omono ongwo bɨla vwoho bo mini. Obila ma lesuhu le mpari na epuhi ma okeri onini. 26Baari ma aje okwa mo vwoho o ntini e bo ma cimiha maami ma aje oya o yula ncye. Obila, mpari e biibi ma eli o yulu eso me aje o triha. 27O ŋa ma aje omono Mwana mvuuru aya o nca lengʉri bɨla mpari na lekʉma le nde le eso. 28Ntini e maami maa ma aje obaana oya, be letemehi, lesaari ecwi, obila evusihi e be eya tuha.»
Ncincami oti a figye
29Ŋa Jesu oti bo ncincami ndi: «Lekeese oti a figye bɨla eti ma emo eso. 30Ntini e be lemono ncuusi ebaana ocuuha, be leyaa mbɨri osibi ove oya tuha. 31Mo osuumbu ju jwa, ntini e be lemono maami maa ma aya, ove be lejyabi mbɨri Onkani o Njyami oya tuha. 32Me eduha be sisyele ntini e maami maa ma aje oya, njubu e lobi eka aje okwa eso ni. 33Yulu bɨla ncye me eje oyira, ŋa mbari e me eka aje oyira ni.»
Leeka mwo
34«Leesa ayiba! Lekaa nyiliha otima a be olemi nca acinda na mali a kuna ni, si kali ma ampasi ma lebihi ni, obila cuhu Opami eje oya be o limihi. 35Mva oyere, yo eje oka cuhu e kʉruhu o baari a yula ncye aso. 36Lekaa cyaha tolo ni, levwono antini aso. Ŋa be lebaha okiini o maami ma aje oya aso. Mo vwa be le eje obuuna oka ma etele o mwa Mwana mvuuru.»
37Na mwi, Jesu ayisiha nca njo e Njyami, ŋa na ekikolo nde oyeni yula okuri eti ma Eliive, lempiibi le ciina. 38Ŋa baari aso nkara encyere ayi njo e Njyami mo oyuha nde.
अहिले सेलेक्ट गरिएको:
Like 21: MDT
हाइलाइट
कपी गर्नुहोस्
तुलना
शेयर गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
