He Ekeny Gál Alb Fimiká 14
14
Báulo ubaa Barnábas Ikónio álle gaa ˈdiiyime
1ˈJien Ikonio álle Báulo ubaa Barnábas hátlé aađaká gál Yuuˈdi ˈbíllé ˈdiiyiminyká hile. Gaal hát ˈdabaanká ˈdéé huogodhe. Gál Yuuˈdi burnayká ubaa gál Hellen burnayká ˈdéé iiy yie. 2Aalé gál giri Yuuˈdi ˈdéé iiy ma yéenká gál giri kidhdhoká ˈbaal chure, gáál gál nyaaram-, Yíésu iiy yieká mé il gaa koy. 3Báulo ubaa Barnábas ál kinaal rám ilishká gaa yíéđie. Gaal Máá Guđo Yíésu ˈdeenyle hát nyaalimoká huogodhe. Máá Guđo Yíésu ˈdeenylé gielmiti-, gaalí huogodhe kinaal ˈduwasie, mu fargogint hélle gálaat hí il ki aargire-, gaalí af ˈdaˈdabe-, gaalí eekemeyká mú Báulo shie.
4Aalé gál ˈjien kinaalloká eiy ˈgiiˈgite, ˈdáá tikiˈd gál Yuuˈdi Yíésu iiy ma yéenká ˈdú fame, ˈdáá tikiˈd gál alb fimiká ˈdú fame. 5Aalé gál kidhdhoká ubaa gállé Yuuˈdiká tá gállé guguđoká ˈdee hí tikiˈd yieká, gaal mú Báulo ˈdéé tág ki nie, giri gáál he ki ekemeyo-, gáál waar ki tuunoká. 6Aalé Báulo ubaa Barnábas gáál điđamlé kinaal maaleká, gaal lés Lukonia ˈjienlé Lustura-, ubaa ˈDerbe-, tá forimlé hí lag ijeká kar ˈdú ˈdoy. 7Gaal ˈjienno kar ˈdú ˈdoy kinaal Fayam Midhab Yiesuká gaa ˈdiiyime.
Báulo ubaa Barnábas Lústura álle máá héljoká gaa bisie
8Lústura állé kinaal máá ameeny ká ˈdalidheká kálta hol ma gaa síen-, ˈgas gáá héljo mare hé hí gaa ije. 9Mu ˈdeeny Báulo hí hogodheká nee koy. Aalé Báulo mú tág gaa dhaayká, mu iiy yeen máálle gaalí biisuoká ˈgaa. 10Aalé Báulo af gaa guđoká mú ki geey, kieye, Le gaa keʼ, ˈgas les ki ˈdíit, yie. Máá giriká đo les gaa kiite, hol gaa seeseme.
11Nyesebich hé ki af ˈdaˈdabo-, Báulo hí ekey kinaallá argeká af gaa guđo-, Lukoniaká ˈdéé ki huogodhe, kieye, Waagam hé yaalmit gálaatká hol tág gáá niiyye, gáál ˈdú gáá leete! gaalí yie. 12Gaal waaglé guđo Sías léká meenylé Sías lé kinaal Barnábas shie. Gaal úba waaglé afo Hérmes léká meenylé Hérmes lé kinaal Báulo shie, ˈdaa giri Báulo he súm ˈdiyimeká. 13Sías ˈbíllé gaalí gaa vivisat-, é sug yielká máállé suoryoká hiit ubaa huraam gaalí ˈguor kállányle tagano gaa nieká é káráfle ká sidhe, giri mu íín ubaa nyésébích kinaal Báulo ubaa Barnábas suor ki ˈgaaloká.
14Aalé Barnábas ubaa Báulo hé gaalí ekemesetal ˈdeenyle maaleká ger hí gaa ˈdeenedhe, hol đafaraam eiy ki fufue, nyesebich ˈdú kirite, gáál ki ˈday, 15kieye, Gál yaab, háteka hí héél ekemeychéel? Nyíín úba nyí gálaat, hát itíni! Nyíín Fayam Midhabká ke hí ˈdú gáá sidhe, giri ke hí geđuo-, hí hé ˈdúúw mánnallá haađicha-, Waag giri úr, les, bás, tá héllé hí gaa ijoká tág niiyyeká hí bala ˈdu gáá nanniyyaká. 16Kíssóótíá mu kidh mé ki hay, giri gaal hátlé fedeká sesemeká. 17Kor mu hé ˈgíérích hí ki kiimisatká hí ma ka rían. Mu hé hí hé midhabká ki eekemey, giri muí ír úr gáá shigie-, ˈguomkícho muí higisieká. Mu hé hí heeymisie, hí ger gaa meemey, gaalí gáál yie. 18Gaal har úba ˈdeeméél lulle huogodheka, gaal hát nyifieto suor gaalí ki ˈgaˈgaleká ali koy.
19Aaléka, gál Yuuˈdi ˈbaal hí Ántiok ubaa Ikónio gáá kie, ény Báulo hí gaa ijeká gálle chure, gaal Báulo waar ki tune. Aalé mú me hí ˈjieká, mu hai kufe, he yie, mú é ˈgas gaa chiˈde, mú biiy sug ki lay. 20Aalé gál Yíésu iiy yie-, láli-, ál kinaal gaa ijeká sedhe, Báulo ki made. Aalé Báulo ka aareká, le gaa kie, é hol ˈdú nadhe. Bííy éíy taaka geđo-, ka biˈdeká mu ubaa Barnábas hol eedhdhe, ˈDérbe mé nie.
Báulo ubaa Barnábas ˈjien Antiok giri lés Siriaká hol ˈdú nadhe
21Báulo ubaa Barnábas ˈjien ˈDerbe Fayam Midhab Yiesuká gaa ˈdiiyime, lali guđo-, Yíésu iiy yieká arge. Aalé gaal đo Lústura, Ikónio tá Ántiok giri lés Bisidiaká hol ˈdú nadhe. 22Gaal ˈjien kinaal gál láliká yiir gaa chiˈde, gáál af tie, giri gaal hát ˈdabaanká iiy yeen tág chiiratká. Gaal gáál geey, kieye, Guch Waaˈgiet ki higiloka, hát hé guđoká il hí gáál aargiˈdoká kí onnow, gaalí yie. 23Báulo ubaa Barnábas aflé higite-, Waag viviteká gál Kiristo ˈjien kinaallo-, alb hí hol ka eiy eiyyeká gállé hí met ki ˈdeenká le gaa shuune. Gaal Máá Guđo Yíésu he iiy yieká gáál gíl geer fie. 24Aalé gaal ˈjien lés Bisidia mé ki ˈdoyká, Bamfília ki fame. 25Gaal Máá Guđo Yíésu ˈdeenyle ˈjien Berga gaa ˈdiiyimeká, gaal ˈjien Atalia mé nie.
26Gaal ˈjien Atalia kinaal kadich gaa hile, Ántiok giri lés Siriaká hol ˈdú nadhe. Ál kinaallá he ál erkob gaalí gáál gielmit Waaˈgiet ˈdú hay-, hújích káána gaalí beetéél gaalí gáál mé ki koyká. 27Aalé gaal he ál Antiok kinaal ki fameká gaal gál Kiristoká hol ˈdú vie. Gaal hát Waag hol ˈgie-, Waag hí hujich ki nannasate-, tá kár giri kidh hí Kirísto iiy ki yegetká Waag hí af ki fuˈdeká, fayamle lulle gáál shie. 28Aalé gaal ubaa gál láli-, al kinaalloká hol súm af yíéđie.
अहिले सेलेक्ट गरिएको:
He Ekeny Gál Alb Fimiká 14: dsh
हाइलाइट
शेयर गर्नुहोस्
तुलना
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
