He Ekeny Gál Alb Fimiká 13
13
Barnábas ubaa Sáwul gaalí ali fie
1Gál Kiristo Antiokká hé gál Waag hí ˈdéé ka shigicheká ubaa gál gálaat ˈdeeny Yiesu oonisieká hí gaa ije. Gál kinaallá he mú Barnábas, Símion giri Níˈjer#13:1 Níˈjer hélle kieye, Máá dhátká. léká, Lókias giri máá ˈjien Kureneká, Manáyan giri Heróˈde giri les mé ˈdíne ˈdáá tikiˈd mé ki yielká hol ˈgar ká guguđandheká, héétí ubaa Sáwul. 2Gaal hátlé Waag vivite-, af higiteká Hím Naasan Waaˈgiet gáál geeyche, kieye, Barnábas ubaa Sáwul hújích yú kí vieká mé ki kóo, chie. 3Aalé gaal Waag vite-, ubaa af hiteká gaal Barnábas ubaa Sáwul gil ˈdú fie, gáál Waag ki vie, gáál ali fie.
Barnábas ubaa Sáwul Kúburos ki fame
4Aalé Hím Naasan Waaˈgiet Barnábas ubaa Sáwul ali fiiyyeká gaal Selúkia ki fame, đo ál kinaal kadich gaa hile, koro Kuburos mé nie. 5Aalé gaal he ˈjien Salamis ki fameká gaal ény gál Yuuˈdi ˈdiiyiminyká ˈdeeny Waaˈgiet gaa ˈdiiyime. Yuána giri Márko léká úba gáál hol eedhdhe, giri gáál rangʼitle yegetká.
6Gaal koro Kuburos lulle gaa nadhe, ˈjíig Báfos ki fame. Ál kinaal máá Yuuˈdi-, muoro-, gilka he ním ˈgie-, hol máá Waag hí ˈdéé ka shigicheká tág gaa nie-, hódhollé-, gaalí Baryíésu yegie mare arge. 7Máá kinaallá koro Kuburos máállé kansich hinyasich-, gaalí Sérgies Báulos yegie mare he hol onnoy. Aalé máá kansich kinaal ˈdeeny Waaˈgiet mamaleká he fede, đo Barnábas ubaa Sáwul gáál ali ˈdú fie. 8Aalé máá muoro-, gilka he ním ˈgie kinaal giri meenyle af Hellenka gaalí Élimas yegieká hé mú Barnábas nebeney, aalé úba máá giri kansichká chure, giri mu ˈdeeny Yiesu Kiristo mú Barnábas hí ˈdiyeenal iiy ma yegenká.
9Aalé Sáwul giri Báulollé-, Hím Naasan Waaˈgiet hí koch onnoyyeká, Élimas gaa dhaay, mú geey, 10kieye, Kó Sátan inylé-, he lullé ˈdúwaká kídhíchléel! Hé hódhoká ubaa hé điđamoká lúl ˈgayyóol! Kó ˈgíérích ˈdúwa-, Máá Guđo-, lođuđugul yaalal riitisinyle ma haađîny? 11Aaléka ónnob! Máá Guđoká gíl hai ko ˈdu gáá helima, in ha ˈdaabiyya, kó ram ˈdaab mákártaká aadh édhúmle ma aargiriny, mú yie. Ál tikiˈde kinaal mú in hí gaa booroch yie, mu in ˈdabe, mu biiy met ki tune, máá hí gíl mé chichiratká hol gaa ˈgeˈgedhe.
12Aalé máá giri kansichká héél argeká ˈdéé iiy yie, ˈdaa giri mu he onisiny Máá Guđoká af ˈdabeká.
Barnábas ubaa Báulo ˈjien Antiok Bisidiaká ki fame
13Aalé Báulo ubaa gállé hol ˈgieká kadich hile, Báfos gaa kie, Bérga giri lés Bamfiliaká ki fame. Yuána giri Márko léká gáál ál kinaal ki hay, Yerúsalem hol ˈdú nadhe. 14Aalé mú Báulo Bérga gaa kie, Ántiok lés Bisidiaká ki fame. Kúlích Hef ˈGisanká gaal ˈbíl ˈdiiyiminyká hile, les yíéđie. 15Aalé hemuumurit Waag hí Móshe ka shiicheká ubaa gál Waag hí ˈdeem ka shigicheká ˈdeemle túóy hí đuyyeká, ˈbíl ˈdiiyiminyká gállé guguđo-, hí mé ki ˈgieká máádhat mú Báulo ali ˈdú kaay, kieye, Nyaaram kínyia Yuuˈdííllo, har ˈdeeny hí gálallá af ki tatiyyoká hí ˈgayyaka, ka kée, gáál af táa, yie.
16Aalé Báulo les gaa kie, gíl les gaa eey, kieye, Gál Yisirayelallo, ubaa it halúg Waag kikiatáállo, nee kóo. 17Waag kúnnaa Yisirayelká bííy heleká eshim eshimkúnno ká eete, af giri gaal he lés Misirayim gaa ijeká gáál heersiche, gíllé fargogoká les gaa eeyye, gáál Mísirayim yé gáá ˈdeeyche. 18Waag warram tomon afur gaalí ˈbakat gaa ijeká gáál mé ˈdug ki site. 19Aalé mu lés Kanaan kidh met tiiya af ki beeteká, lés kinaal hát aˈjibáátká muí gálle shie. 20Hééllá lulle warram kúˈd afur tómón eiy chenno he eedhdhe.
Héél he beeyká Waag ar gáál met ki ˈgiiyyoká gáál shigiche,#13:20 Bár kinaallá gál Yisirayel hé máá kansich-, hí mé ki yielká mannay. Gaal máá arra gáál ruunyle mé ki yielká Waag hí shigiche. ˈjíig bár giri Sámuel hí máá Waag hí ˈdéé ka shigicheká onnoyká đig. 21Aalé gaal Waag kánsích gaal íín met ki ˈdeˈdeenká ruogone. Waag gáál Sáwul giri iny Kish ˈbíl íl Binyaminká shiiche. Warram Sáwul hí gáál kánsíchle gaa yieká tomonaam afur. 22Aalé Waag Sáwul kansím gaa leesicheká, ˈDáwuˈd gáál kánsíchle hoyche. Mú ˈdeenyle huogote, kieye, Iny Yeshay giri ˈDáwuˈd léká hát he máá ye geer gaa memesuo-, he lullé yú fedoká ye ki ekemeyoká yáá geer ki shuunne, chie. 23Aalé Waag hát he gál Yisirayel af iđicheká, hé Máá Rubach Yíésu hídh ˈDawuˈd yé gáá ˈdeeyche, gál Yisirayel shiiche. 24Yíésu hátlé ma ka yímenká, Yuána gál Yisirayel ki ˈdiiyime, giri gaal héllé ˈdeđewká haađuo-, Waag makan fafaan-, gáál gaalí bie gim nannuoká. 25Yuána hátlé hújíchle ma béésenká kieye, Itín mááya hí ye cheedhe? Yú yáá máá hí taawuyyáállá muuniny. Mu hé geđ giro, yáá ˈduuw ˈguo-, mú koiy ˈgas gaa furoká mánno, he yie.
26It nyaaram chia hídh Abiraayamallo, ubaa it Waag kikiatáállo, fayam rubachietallá múúni Waag hí gáál ali ˈdu gáá kaayye. 27Gál Yerusalem ubaa gállé kaansúoká, Yíésu hát Máá Rubachietká hé ma kimísan. Gaal warˈgasam gál Waag hí ˈdéé ka shigicheká hí veereká ˈdeenyle Kúlích Hef ˈGisanká lullé he nee gaa kokoy, kor hé hélle moonnoy, in đo mú kúfach mure, ˈdéé ˈduwasie. 28Gaal hé ˈdúwa-, muí ˈdú kufunanká har úba mú ma gaa arginyka, mú Bilááto mé ki tie, giri Bilááto mú yegeská. 29Aalé gaal he lullé mú ˈdaalle ˈdugaka gaalí veereká đusieká, mú gálle mú ˈgór gáá leesie, mú ˈguoˈd gaa kaay. 30Kor Waag íín hé mú sídhle hol ˈdú niiyye, mú uushich yé gaa ˈdeeyche. 31Mú rám burnayyeká gál hol Galilááya gáá eedhdhe-, hol Yerúsalem ˈgar sedheká úba hí arge. Gál kinaallá gál mú ˈdúúw ˈdú ˈdie-, káána gálkúnno geđuoká.
32Nyíín Fayam Midhabká ke hí geđia: Waag héle hé eshim eshimkúnno he af iđiche. 33He af iđiny kinaallá múúni ke gáál umlééllá káána muí hélle gáál ká shie, giri mu Yíésu uushich yé gáá ˈdeeyká. Hát káána gaalí warˈgat Arramká káráflé naamaká gaa veere-, kieye,
Kúún he Inychú, kúlíchallá yáá ko ˈdale,#13:33 Warˈgat Arram 2:7
chieká.
34Waag mú uushich yé gáá ˈdeenyle, máálle muí móˈd ma ki haađinyká, ˈdeenylé muí gáál ka geeyká hééllá, kieye,
Áˈján chia ˈdúwa-, yú ˈDáwuˈd af iđieká
úba ha yú hí ká shigia,#13:34 Yisááya 55:3
he chie.
35ˈDáwuˈd úba warˈgat Arramká karaf tikiˈd hatallá he Waag gaa geey, kieye,
Kuun kó máá kua taak koyyeká
mooˈdowká iiy ma chegen,#13:35 Warˈgat Arram 16:10
he yie, Báulo hí yie.
36Aalé Báulo geđi gáál geey, kieye, Aalé ˈDáwuˈd bár giri haryam léká hújíchlé Waag hí shiicheká beeteká đo mán yie, hát giri eshim eshimle gaalí galieká íín úba gaalí galie, moˈdoy. 37Tá Máá Waag hí uushich yé gaa ˈdeeycheká hé ma moˈdôny. 38Nyaaramchú, aaléka, hééllá nee kóo, hé ke hí ki ˈdiiyeenallá máá Yíésu lééllá ađaabano ubaa nyuogim kúnno ˈdaalle ˈdugaka in kufe, giri Waag ađaabano ubaa nyuogim kúnno gáál gaa egeyyoká. 39Aaléka, itín máá Yíésu iiy yeetká he lullé ˈdeeđeneyká ađaablé ubaa nyúógíchlé kinaal Waag haí gaa egeyye, Waag mú máá ˈdúwaká hai ká dhaˈgasanna. Hééllá he hé hemuumurit Moshe hí ma ekemenyká. 40Aaléka tág ˈdée, hé gál Waag hí ˈdéé ka shigicheká hí huogodheká ha il hí árginy, giri kieye,
41Bá dhaayyíe, it afka fichilít ˈgayyáal!
Gil hí af faan, me hí ˈgidho.
Yú bárkícho he ha gaa ekemeye,
hé úba máádhat hí geđînyka,
hí iiy ma chegenká,#13:41 Habákuk 1:5
Waag hí chie-, gaalí yieká, Báulo hí gáál yie.
42Aalé Báulo ubaa Barnábas hátlé giri ˈbíl ˈdiiyiminyká yé gaa ˈdeˈdemeká gaalí gil ki efe, giri Kúlích Hef ˈGisanká geđi hol gáá nannaat-, gáál ˈdeenyéél súm oonisuoká. 43Gaal ˈdiiyiminy eiy gaa kieká gál Yuuˈdi burnayká ubaa gál kidhdho-, nyátál gál Yuuˈdiká tág el gaa igireká Báulo ubaa Barnábas el gaa veere. Báulo ubaa Barnábas gáál ˈdéé net gaa kaay, giri gaal gielmit Waaˈgiet gaa yíéđianká.
44Kúlích Hef ˈGisan-, geđoká ˈjien kinaal gálle gúch hol ˈdu gáá yimie, giri ˈdeeny Waaˈgiet nee kokuoká. 45Aalé gál Yuuˈdi ˈbaal nyesebim argeká, gáál hinááf hí faanne, gaal ˈdeeny Báulo hí hogodheká af ki ˈjierte, ˈdéé fichile. 46Báulo ubaa Barnábas ˈdéé nyaalím ki huogodhe, gaal gáál kieye, ˈDeeny Waaˈgiet erkob it gál Yuuˈdííllá ke hí geđie. Aaléka, it hol ká muˈde, ˈdaa giri hí ˈdéé điita-, gál luolmit biiyoká ma ki ekenenyká hí hol hoycheká. Nyíín aalé kidhdho nyí bala ˈdú nanniyya. 47Waag ˈdeeny ˈdaakínyoka hoteká hééllá, kieye,
Yáá ko kidh met gaa koy,
giri kuun édhúm kidh in kakawká cheget-,
kuun rubach les lúl nyuorsichoká,#13:47 Yisááya 49:6
he chie, mú Baulo hí gáál yie.
48Aalé kidh héél maaleká ger hí gaa meedhe, ˈdeeny Máá Guđoká meey. Ameeny gál giri Waag hí luolmit biiyoká gíl ki helicheká ˈdéé iiy yie. 49ˈDeeny Máá Guđoká lés kinaal lulle eiy bash ki yie. 50Aalé gál Yuuˈdi giri ˈdeeny Yiesu điidheká ˈdeg he súm óg-, hí nyátálle tág el gaa igiˈdeká ubaa ˈjien kinaal gállé guguđoká lulle chure. Gaal Báulo ubaa Barnábas oos mure, gáál lésle gaa arie. 51Aalé Báulo ubaa Barnábas kekemeká gaal ˈgas shére gaa ˈdodhdhe,#13:51 ˈGas shére gaa ˈdoon, hélle kieye, Itlé. gáál ˈgas in ká badhdhe, Ikónio mé nie.
52Aalé gál Yíésu iiy yie-, Ántiok giri Bisidiaká ki ˈgiteká Hím Naasan Waaˈgiet hí koch chie, ger hí gaa meedhe.
अहिले सेलेक्ट गरिएको:
He Ekeny Gál Alb Fimiká 13: dsh
हाइलाइट
शेयर गर्नुहोस्
तुलना
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Bible Translation and Literacy
