Luke 24
24
Te faka masike ranga
(Mat 28.1–10; Mak 16.1–8; Jon 20.1–10)
1I mo vasia i ata i pongi pongi o te Aso e tapu, nga maatua faafine ne kave koa sua sinu ne pena pena ea ratou, o kave ki te tano. 2Ne ratou maua ria te fatu mono o te urufanga ki te tano ku faka rika kese ma te tano. 3Tera koratou ne fe urufi ki roto. Kae se ne ratou maua ina ko te tino o te Ariki Jesus. 4Koratou ku turaki o maanatu vare fuarei, i mo vakanga a taangata e toka rua ku turaki koratou e fe urufi kia suru e maa ila rei. 5A ratou maattaku ku maatea rei, tera ko nga maatua faafine ku punou ki raro ki te kere, i vasia oa taangata e muna atu kia ratou, “Sea na atamai ko kotou e faara ki te tangata ora i te kere tamate? 6#Mat 16.21; 17.22,23; 20.18,19; Mak 8.31; 9.31; 10.33,34; Luk 9.22; 18.31–33.Koia e laavaki i kunei. Koia ku faka masike riaina. Faka maanatu pe nia ma ana ne muna atu kia kotou i Galilee: 7‘Te Tama a Tangata ka soria ina kia rafi rima o nga taangata titisara, ka tukia ria ki fongo raakau, faka masike ria rei i na aso toru.’ ”
8Tera nga maatua faafine ku maanatu ki ana taranga. 9Koratou ne foki mai mai te tano o faka ari ari koa nea kaatoa ki na kau fanonga e tino angafuru ma tasi, ma ki faoa kaatoa rei. 10Nga maatua faafine, ko Mary Magdalene, ma Joanna, ma Mary te nana o James, koratou ma rake maatua faafine ne faka ari ari koa nea nei ki na kau fai fekau. 11Kae te kau fai fekau ku maanatu rei pe nia ma nga maatua faafine ne mmuna e seke atamai, ma koratou si se ne fakatonu kiei. 12Kae ko Peter ne tokai ake, rere arei ki te tano; fatio ifo rei koia, ono rei kia suru e naa i roto tano, siei fokia pe sea. Tera koia ne foki arei, ku mmate ko ana tino kia nea ne faka sasa nei.
Te saere anga ki Emmaus
(Mak 16.12–13)
13I te aso ai, e toka rua koa foi taangata o Jesus koratou e oro ki te noforanga e ati ko Emmaus, e fitu ko ana mael ko na mmao mai ki Jerusalem, 14ma koraua e araara maso koraua kia nea kaatoa ne faka sasa ria. 15I vasia oraua e tau araara saere iei, Jesus maso koia ne au kau fanonga rei koratou oro. 16Koraua ne ono kiei, kae si see rau matea ina koia. 17Fesiri atu rei ko Jesus kia raua, “A nia mo rua noko tau araara saere mai, i toru vasia e oomai iei?”
Turaki faka seemuu arei koraua o pula faka ruru faka arofa. 18Te tangata ia raua, na ingoa ko Cleopas, ne fesiri atu kiei, “Ea, ko kee fuarei matea te nea sokotasi e nofo i Jerusalem si se nai iroa ina pe nia ne fai ia foi aso ku oti?”
19Fesiri atu rei koia kiei, “A nia ne fai?”
Tongoi atu rei koraua, “A nea ne faia ria kia Jesus o Nazareth; te tangata nei te ʻprophetʼ ma e faka tonusia riaina e Tupua ma te kano fenua kaatoa, e manuu tia riaina ko ana taranga ma ana fainga fekau. 20Matou ariki fai kava ma nga fakarongo ranga, ne ratou tukuna koia ke tamatea, ma ne tukia ria ki te raakau. 21Ma komatou e maanatu rei, koia te nea ka nai faka saofia ria ko nga Israel! Ki faasi oa nea kaatoa nei, teinei te toru o ana aso mai na tamatea anga. 22Komatou ku mmate ko amatou tino kia maatua faafine oa matou faoa, ne ufu pongi pongi rei, oro ki te tano, 23kae si se ne ratou maua ria ko na tino. Koratou ne foki mai o mmuna ne ratou ravea ina koa ʻangelʼ ne faka saa o faka ari atu kia ratou, ko Jesus ku ora. 24Rake taangata i matou faoa ne oro ki te tano o maataki, fakapera rei pe nga maatua faafine ne mmuna, kae si se ne ratou ravea ina koia.”
25Tera ko Jesus muna atu rei kia raua, “Totou fai seke atamai, totou fai faka toro maarie i otou fakatonu kia nea kaatoa o nga ʻprophetʼ ne ratou araara fakina! 26Ea, si see fetau fangatasi ki te Ariki Fakaroro ke fakarongo neaisu kia nea nei, ma ke nai urufia ina ko na faka taurekareka?” 27Tera ko Jesus ne faka atetea kia raua pe nia ne munakina kia koia i te Pepa Tapu, ne fakatafito kia Pepa a Moses, ma kia tusi tusi ranga kaatoa o nga ʻProphetʼ.
28Koratou ku oko mai ki te noforanga e oro raua kiei, ma ko Jesus ku fai ke poi arei. 29Kae koraua ne karanga atu kiei, “Au, tatou fare, ku piri piri ke poo.” Tera koia ne poi ke ratou fare. 30Koia ne nofo ki te tepolo ma raua, sau te foi preti, o nai fakatapu ria, tera ne tofi tofi ea koia, o sori kia raua. 31A rau mata ku masara, ma ku rau matea ina, ko Jesus, kae ne faka leku arei i rau faasi. 32Koraua ne mmuna kia raua ia, “Ea, si see fai pe te afi e sunu ia taua, i vasia koia ne araara mai i te ara ma ne nai faka atetea ria ko te Pepa Tapu?!”
33Koraua ne feturaki ake ki runga i vakanga, foki arei, oro ki Jerusalem i ngangea ne fekitei koratou ma te kau fanonga e tino angafuru ma tasi, ku taanaki ki roto ma rake nea. 34Koratou ne mmuna ki raua, “E tonu maori rei, te Ariki ku masike! Koia ne faka saa kia Simon!”
35Tau toka rua faka atetea rei kia ratou pe nia ne faia kia raua i te ara, ma i te vasia ne rau matea ina ko te Ariki i te tofi anga o te foi preti.
Jesus e faka saa ki na kau fanonga
(Mat 28.16–20; Mak 16.14–18; Jon 20.19–23; Act 1.6–8)
36Mo vasia koraua e araara faki kia ratou iei nei, i vakanga te Ariki maso koia ku tuu ia ratou vasia, ma e muna atu kia ratou, “Te roto mafora ke naa ia kotou.”
37Koratou ku marukia ina ia ratou maattaku, ku maanatu rei koratou ku ono ki te atua. 38Kae koia ne muna atu kia ratou, “Sea na atamai kotou e maru kia? Sea na atamai kotou e faka tuka tuka ia otou atamai? 39Pula ki oku rafi rima ma oku vae, ma e ono ta tera kuou teinei. Poo kia kuou ma kotou ka kotou iroa ina, natafito te atua si see fai ko ana kanofi ma ana ivi, pe kotou e ono mai kia kuou oku e fai.”
40Koia ne muna faka peinei, ma ne faka ari atu ko ana rima ma ana vae. 41Koratou e koi fakapou rei, natafito koratou ku mata mau ma e fereki ko aratou mauri. Tera koia ne fesiri atu kia ratou, “Ko kotou e fai pe nia motou ke kai i kunei?” 42Koratou ne sori te faasi ika moso kia koia, 43ne sau ea koia, kai rei ia ratou mata.
44Tera muna atu rei koia kia ratou, “Konei koa nea rei ne faka ari atu kia kotou i oku mo vasia e koi fare kotatou. Ku au maori rei a nea kaatoa ne tusia fakaoti rei kia kuou ia Fono a Moses, ia tusi tusi ranga a nga ʻProphetʼ, ma ia Psalms.”
45Tera ne nai faka masara ria ko aratou atamai, ke atetea ko te Pepa Tapu. 46Ma ne muna atu kia ratou, “Pe nia ne tusia riaina konei: Ko te Ariki Fakaroro ke fakarongo neaisu, ma ka masike mai te mate i na aso toru. 47Ma taranga ki te siaki ranga, ma te faka ngaromia anga oa sara, ke tuufakina i na ingoa ki nga turaurau kaatoa rei, fakatafito i Jerusalem.
48“Ko kotou ne ono mata kia nea nei. 49#Act 1.4.Kuou ka poi ke fakkau ifo kia kotou pe nia ma toku Mmana ne tongi kiei. Kae kotou ke fetari maarie rei i te noforanga lasi, oko rei ki te vasia te makeke kua ifo mai te vaerangi kia kotou.”
Jesus ku kavena ki te vaerangi
(Mak 16.19–20; Act 1.9–11)
50 #
Act 1.9–11. Tera kakave rei ea koia ia koratou ki tua ma te noforanga lasi ke oro mmao rei ki Bethany, i ngangea koia ne rangai ake ko ana rima o fakatapu koratou. 51I mo vasia e fakatapu koratou, koia ne faka mavae kese ma ratou, ku kavena arei ki te vaerangi. 52Koratou ne fakaturou kiei, ma ne foki arei ki Jerusalem, ku maatea rei ratou mata mau. 53Ma e fare mau rei koratou i nga vasia katoa i rota Paito Tapu, o faka ue ue ki Tupua.
လက်ရှိရွေးချယ်ထားမှု
Luke 24: TKP
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2025 Wycliffe Bible Translators, Inc.
