John 1
1
Te “Taranga” o te ora
1Mai i te fakatafito ranga rei te “Taranga” ku nofo, te “Taranga” ma Tupua, ma te “Taranga” ko Tupua. 2Mai te fakatafito ranga rei te “Taranga” e nofo ma Tupua. 3A nea katoa rei ne fai mai e Tupua ia koia. E siei rei ni nea ne faka tupu kae koia e laavaki iei.
4Te “Taranga” te fakkau o te ora, ma te ora nei ne nai aumai ina ko te maarama ki te kano fenua kaatoa. 5Te maarama e aata i te kau pouri, kae te kau pouri se ne nai ufia ria.
6 #
Mat 3.1; Mak 1.4; Luk 3.1,2. Tupua ne fakkau tana kave rongo, te tangata na ingoa ko John. 7Koia ne au ke faka ari ki te kano fenua te maarama; e laoi te kano fenua kaatoa ke fakarongo ma ke fakatonu. 8Koia maso koia siei te maarama, kae koia ne au ke faka ari te maarama. 9Ta teinei te maarama maori rei, te maarama ku au kia taangata nei, ke ata ata ki nga taangata kaatoa.
10Te “Taranga” ku nofo ia taangata nei. Maafa rei onia Tupua ne faka tupu koa taangata ia koia, kae koa taangata nei se ne ratou matea ina koia. 11Koia ne au ki na fenua maori, kae na kee tinoi fenua maori se ne ratou faka afea ria koia. 12Kae tera rake faoa ne ratou faka afea ria koia, ma ne fakatonu kiei; ta koia ne nai faka patino ria rei koratou te tonu ke fare a tama a Tupua. 13Koratou se ne fai pe a tama a Tupua ia riu ara faka taangata, na atamai koratou se ne faanau i te mmana faka taangata, kae tera Tupua maso koia rei te ratou Mmana.
14Te “Taranga” ne faka tino pe tangata noko nofo ma tatou e pii rei i te roto laoi ma te tonu. Ne matou ravea ko na maarama taurekareka, te taurekareka ne sau ea koia pe te fua tasi a Tupua te Mmana.
15Ko John noko tara kiei. Koia ne forua, “Teinei koia noko araara faki atu ea kuou i toku vasia noko muna atu iei, ‘Koia ka au i oku tua, kae koia e maurunga sapa rei ma kuou, natafito koia ne mataki nofo rei kae faanau mai raa kuou.’ ”
16Ta i te katoa ranga o na roto laoi, koia ku nai fakatapu ria kotatou kaatoa, ku sori mai kia tatou ko te fakatapu e fe tao maki fuarei. 17Tupua ne sori koa Fono kia Moses, kae te taurekareka ma te tonu maori ne fakatafito ia Jesus Christ. 18Siei pe koai rei ne ono mata ki Tupua. Te tama fangasere maori koia e sokotasi ma Tupua, koia e nofo i faasi o te Mmana, koia ne nai faia koia ke iroa ina.
Te tuufaki ranga a John te Faka uku
(Mat 3.1–12; Mak 1.1–8; Luk 3.1–18)
19A fakarongo ranga o nga Jew i Jerusalem ne fakkau nga pure fai kava ma nga Levite ke oro kia John o feesiri kiei, “Ko kee koai?”
20Ko John si se ne faka tuka tuka ke tongoi, kae koia ne muna faka mafora fora ma e faka atetea ke atetea rei o muna atu, “Kuou siei te Ariki Fakaroro.”
21Ta feesiri atu rei koratou, “Ko kee rei ia, koai? Ko kee naa ko Elijah?”
Tongoi atu rei ko John, “Siei, kuou siei.”
Ta feesiri atu rei koratou fokia, “Ko kee te ʻProphetʼ?”
Tongoi atu rei koia, “Siei.”
22Ta muna atu rei koratou, “Faka ari mai rei kia matou pe ko kee rei koai, ke matou foki o faka ari tau tongoi ki te faoa ne fakkau mai komatou ke oomai kia ko kee nei. Ta ko kee e muna faka fefea kia ko kee maso kee?”
23Tera tongoi atu rei ko John kia muna muna ranga a ʻprophetʼ ko Isaiah,
“Kuou te reo o koia e forua i te ngangea tulaavaki:
Pena faka tonu ko te riu ara mo te Ariki Tapu ke poi iei!”
24Nga kave rongo ne fakkau mai e nga Pharisee, 25ta feesiri atu rei kia John, “Ta ko kee siei te Ariki Fakaroro, siei ko Elijah, siei te ʻProphetʼ, sea rei na atamai ko kee e faka ukuuku?”
26Tongoi atu rei ko John, “Kuou e faka uku ma vai, kae te tangata sokotasi e tuu ma kotou naa si see kotou iroa ina. 27Tera koia e au i oku tua, kuou si see tau fangatasi rei ke kau vetea ki tua ko ana rafi vae.”
28A nea katoa nei ne saa ki tua i Bethany i te faasi Vai saria i Jordan e anga ki te tonga, i ngangea o John noko fai te faka uku iei.
Te Tamai manu a Tupua
29I take aso ko John ne ono atu ko Jesus e au kia koia, nai karanga tia arei, “Teinei te Tamai manu a Tupua, koia ka nai sau kesea koa sara oa taangata nei. 30Teinei koia noko araara faki atu ea kuou i toku vasia noko muna atu iei: ‘Te tangata ka au i oku tua, ta koia e maurunga sapa rei ma kuou, natafito koia ne mataki nofo rei kae faanau mai raa kuou.’ 31Kuou si se kau iroa koia ka pe koai, kae kuou e au o faka uku ma vai, e laoi ke iroa ina e te kano fenua o Israel ia koia.”
32Ta ko John ne tara kia Jesus: “Kuou ne ono te Mauri o Tupua ne fena ifo mai te vaerangi pe te rupe o tuu kia koia. 33Kuou siki kau iroa ina ta koia tera, kae Tupua ne fakkau mai kuou ke faka uku kia vai, ne faka ari mai kia kuou, ‘Ko kee ka ono ki toku Mauri ka fena ifo o nofo ki te tangata; ta tera koia ka faka uku uku ki te Mauri Tapu.’ 34Ta kuou ku kau ravea ina raa, tera kuou e faka ari atu koia ta te Tama a Tupua.”
Mataki kau fanonga o Jesus
35I take aso, ko John e tuu i ngangea fokia ma na kau fanonga e toka rua. 36Vasia koia ne nai ravea ria ko Jesus e faka sara, ta muna atu arei koia, “Pula, teenaa te Tamai manu a Tupua.”
37Vasia na kau fanonga e toka rua ne fakarongo kia koia e muna faka peinei, koraua tautari arei kia Jesus. 38Tafuri ake rei ko Jesus, nai ravea rei koraua e tautari atu kia koia. Fesiri atu arei, “A nia mo rua e sakiri kiei?”
Tongoi atu rei koraua, “Ko kee e nofo i fea, Rabae ee?” (na atamai: te Fakaako.)
39Jesus ne tongoi atu rei, “Oomai, ke koru ono.” (I te vasia ai te raa ku faa i raa pare pare.) Tera koratou ne oro ki na noforanga o fare iei te aso naa.
40Take tangata ia raua ko Andrew, te taina o Simon Peter. 41I mo vasia nai maua rei na taina ko Simon, ta muna atu rei kiei, “Komaua ku mau maua ko te Ariki Fakaroro.” (Na atamai: “Christ”.) 42Tera kave rei ea koia ko Simon kia Jesus.
Ta kareu atu rei ko Jesus kia koia, muna atu rei, “Tou ingoa ko Simon, te tama a John. Kae ko kee ka ati ko Cephas.” (te ingoa nei si see kese ake ma Peter, na atamai: “Te Mato”.)
Te karanga tia ranga o Philip ma Nathanael e Jesus
43I take aso ko Jesus ku maanatu ke poi ki Galilee. Mau ea koia ko Philip, muna atu rei kiei, “Au, tau oro.” 44Ko Philip te foi Bethsaida, te taoni ko Andrew ma Peter e fare iei. 45Ko Philip ne nai maua ko Nathanael ta muna atu rei kiei, “Matou ku matou maua koia ko Moses ne tusi ma e rongo rongo saki ea koia i te Pepa oa Fono, ma nga ʻprophetʼ fokia noko tusi arafaki ea ratou. Koia ko Jesus, te tama a Joseph o Nazareth.”
46Ta fesiri rei ko Nathanael, “Ka ma fai ki ni nea laoi ke aumai mai Nazareth?”
Tongoi atu rei ko Philip, “Au, o ono!”
47Vasia Jesus ne ono atu kia Nathanael e au kia koia, ta muna atu rei koia kiei, “Teinei te tino i Israel maori rei, siei ko se mata mata sara anga rei iei.”
48Fesiri atu rei ko Nathanael kiei, “Ko kee e kee iroa kuou faka fefea?”
Tongoi atu rei ko Jesus, “Kuou ne ono kia kee i araro o te raakau te ʻfigʼ, oti kae karanga atu raa ko Philip kia kee.”
49Tongoi atu rei ko Nathanael, “Fakaako ee, ko kee te tama a Tupua, te Tii o Israel!”
50Muna atu rei ko Jesus, “Ko kee ku fakatonu, natafito kuou ne faka ari atu kia kee, kuou ne kau ravea vasia ko kee i araro raakau te ʻfigʼ. Ko kee ka ono kia nea ka sapa kese ma a nea nei.” 51Ta muna atu rei koia kia ratou, “Kuou e faka ari atu kia kotou te maori: Kotou ka ono te vaerangi ka masara ma nga ʻangelʼ o Tupua e oro ki runga ma e ifo saere ki raro ki te Tama a Tangata.”
လက်ရှိရွေးချယ်ထားမှု
John 1: TKP
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2025 Wycliffe Bible Translators, Inc.
